សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជាថ្មីម្តងទៀតបានផ្តល់នូវកិត្តិយសយ៉ាងធំធេង ដល់សាសនិកឥស្លាម-កម្ពុជា ដោយបានអញ្ជើញចូលរួមក្នុងការទទួលទានអាហារស្រាយបួស រ៉ាម៉ាឌនជាមួយសាសនិកឥស្លាមចំនួន៤៧០០នាក់ នៅមជ្ឈមណ្ឌលកោះពេជ្រ នាល្ងាចថ្ងៃ ទី១៥ ខែមិថុនា ឆ្នាំ២០១៧នេះ។
សូមជំរាបជូនថា ឆ្នាំនេះជាឆ្នាំទី៤ហើយ ដែលរាជរដ្ឋាភិបាលកម្ពុជា បានរៀបចំធ្វើពិធីស្រាយបួសប្រចាំឆ្នាំថ្នាក់ជាតិសម្រាប់សាសនិកឥស្លាមនៅកម្ពុជាដែលលើកទី១ធ្វើឡើងកាលពីឆ្នាំ២០១៤។ តាមការបញ្ជាក់ពីឯកឧត្តមឧកញ៉ា អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានគណៈកម្មការរៀបចំពិធីពិសាអាហារស្រាយបួសបានអោយដឹងថា រ៉ាម៉ាឌនជា ខែបុណ្យដ៏វិសេសជាងគេរបស់សាសនិកឥស្លាមទូទាំងសកលលោកចំពោះអ្នកដែលពេញវ័យត្រូវអនុវត្តការបួស តមអាហារ និងតមការទទួលទានអ្វីទាំងអស់ប្រមាណ១៤ម៉ោងក្នុង១ថ្ងៃ ដែលចាប់ផ្តើមពីវេលាទាបភ្លឺរហូតដល់ថ្ងៃលិច។ ក្នុងសាសនាឥស្លាមបួស គឺជាការដាក់ខ្លួន អោយស្មើភាពរបស់មនុស្សគ្រប់ស្រទាប់វណ្ណៈទោះក្នុងឋានៈណា ក៏ត្រូវតែទទួលនូវភាពហេវ ហត់ អត់ឃ្លាននៅពេលថ្ងៃ រយៈពេលមួយខែពេញដូចជាអ្នកក្រក្សត់ដទៃទៀតដែរ។ កាលណាគាត់ដឹងពីទុក្ខលំបាក នៃការអត់អាហារ គឺគាត់ដឹងពីទុក្ខធុរៈអ្នកដទៃ ដែលរស់នៅក្នុងភាពខ្វះខាត ហើយក៏ជាឱកាស នៃការបរិច្ចាគរបស់គាត់ទៅជនក្រីក្រច្រើនជាងឱកាសផ្សេងៗទាំងអស់។
តាមក្បួនច្បាប់របស់សាសនាឥស្លាមនិយាយថា បួសមិនមែនមាមតែការតមអាហារប៉ុណ្ណោះទេ តែជាការតមនូវការនិយាយស្តីអាក្រក់ ការបៀតបៀន ការរំលោភលើសិទ្ឋិសេរីភាព និងកិត្តិយសអ្នកដទៃ ក៏ដូចជាការប្រព្រឹត្តិនូវបទល្មើសទាំងឡាយទោះតូច ឬធំផងដែរ។ បួសក៏ជាការដាក់អោយមានតុល្យភាពរបបអាហារតាមពេលវេលាជាក់លាក់ ជាពិសេសការចាត់អោយ ប្រព័ន្ឋរំលាយអាហារធ្វើការសម្អាត ការរំលាយ និងច្រោះចេញនូវកាកសំណល់ជាតិពុល ទាំងឡាយ ដែលនៅសេសសល់ក្នុងខ្លួនមនុស្សផងដែរ។
ថ្លែងទៅកាន់អង្គពិធីក្នុងឱកាសដ៏វិសេសវិសាលនេះប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានគូសបញ្ជាក់ថា៖ សម្តេច និងភរិយាពិតជាមានភាពសប្បាយរីករាយជា ខ្លាំងចំពោះការជួបជុំ របស់សាសនិកឥស្លាមកម្ពុជានៅក្នុងពិធីពិសាអាហារស្រាយបួសប្រចាំឆ្នាំ នាពេលនេះ។ សម្តេចបានបន្តថា អ្វីដែលបាន និងកំពុងកើតមាននៅលើទឹកដីនៃព្រះរាជាណាចក្រកម្ពុជា នោះគឺសុខដុមនីយកម្មរវាងជនជាតិ និងសាសនា ដែលនៅលើពិភពលោកបច្ចុប្បន្ន ពោរពេញទៅដោយភាពចលាចលនៅតំបន់ខ្លះ ផ្នែកខ្លះ និងប្រទេសខ្លះ ដែលមានការ រើសអើង និងប្រកាន់និន្នាការខុសៗគ្នា។ ដោយឡែកសម្រាប់កម្ពុជា បញ្ហានេះមិនស្ថិតនៅក្នុង របៀបវារៈនៃនយោបាយ ដែលត្រូវដោះស្រាយនោះទេ ក៏ប៉ុន្តែវាស្ថិតនៅក្នុងរបៀបវារៈនៃការថែទាំ ដើម្បីពង្រឹងនូវសុខដុមនីយកម្ម ពង្រឹងនូវសាមគ្គីភាព ដើម្បីអភិវឌ្ឍប្រទេសរបស់ខ្លួនទៅវិញទេ។
សម្តេចតេជោ នាយករដ្ឋមន្ត្រីបានយកឱកាសនេះថ្លែងការកោតសសើរ និងអរគុណជា ថ្មីម្តងទៀតចំពោះសាសនិកឥស្លាមកម្ពុជាដែលបានគាំទ្រចំពោះរាជរដ្ឋាភិបាល ពិសេសបាន បោះឆ្នោតជូនគណបក្សប្រជាជនកម្ពុជា ដោយសម្តេចបានបញ្ជាក់ថា ការដែលបងប្អូនឥស្លាម កម្ពុជាបោះឆ្នោតជូនគណបក្សប្រជាជនកម្ពុជា គឺស្មើនឹងការបោះឆ្នោតថ្វាយព្រះអល់ឡោះ និងបោះឆ្នោតឲ្យខ្លួនឯងផងដែរ។ ជាមួយគ្នានេះសម្តេចបានបញ្ជាក់យ៉ាងច្បាស់ថា ការធានាក្នុង ការលើកស្ទួយដល់សាសនិកឥស្លាមនៅកម្ពុជា គឺអាចធ្វើទៅបានតាមរយៈគណបក្សប្រជាជនកម្ពុជា តែចំពោះគណបក្សផ្សេងវិញគឺសម្តេចមិនដឹងទេ។
សម្តេចតេជោ នាយករដ្ឋមន្ត្រី បានអំពាវនាវដល់អ្នកបន្តវេនរបស់គណបក្សប្រជាជនកម្ពុជាជំនាន់ក្រោយឲ្យបន្តយកចិត្តទុកដាក់់ដល់សុខដុមនីយកម្មសាសនានៅកម្ពុជា កុំឲ្យមាន ការប្រកាន់ពូជសាសន៍ ដូចអ្វីដែលគណបក្សប្រជាជនកម្ពុជាបានធ្វើក្នុងរយៈពេល៣៨ឆ្នាំមក ហើយនេះ។ សម្តេចបានសង្កត់ធ្ងន់ថា នៅកម្ពុជាគ្មានការរើសអើង គ្មានការប្រកាន់ពូជសាសន៍ និងសាសនាអ្វីទាំងអស់ នេះក៏ដោយសារយើងចង់ឲ្យមានការរួបរួមគ្នា ដើម្បីការអភិវឌ្ឍរបស់ ប្រទេសជាតិ។ ជាមួយគ្នានេះសម្តេចបានហៅការជួបជុំរបស់សាសនិកឥស្លាមកម្ពុជាក្នុងពិធី ស្រាយបួសរ៉ាម៉ាឌននាពេលថាជាភ្ញៀវរបស់រាជរដ្ឋាភិបាល ហើយបន្ទាប់មកសម្តេចចង់ធ្វើ ជាភ្ញៀវរបស់វិហារឥស្លាមវិញម្តង៕
