ក្នុងឱកាសនៃដំណើរទស្សនៈកិច្ចផ្លូវការ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជានៅទីក្រុងតូក្យូ ប្រទេសជប៉ុន នាសៀលថ្ងៃទី០៨ ខែ សីហានេះ សម្តេចបានដឹកនាំគណៈប្រតិភូជាន់ខ្ពស់រាជរដ្ឋាភិបាល និងសមាជិកសភាពាណិជ្ជកម្មកម្ពុជា ដែលបានធ្វើដំណើរអមសម្តេចនាយករដ្ឋមន្រ្តីអញ្ជើញចូលរួមសិក្ខាសាលា ស្តីពីការយល់ដឹងពីបច្ចុប្បន្នភាពរបស់កម្ពុជា ដែលរៀបចំដោយសមាគម ជប៉ុន-កម្ពុជា និងអង្កការពាណិជ្ជកម្មក្រៅប្រទេស ដោយមានការចូលរួមពីបណ្តាវិនិយោគិនជប៉ុន វិនិយោគិនបរទេសជាច្រើន ដើម្បីស្វែងយល់ និងទទួលបានសារគន្លឹះរបស់សម្តេចតេជោនាយករដ្ឋមន្រ្តី ស្តីពីឱកាស និងសក្កានុពលវិនិយោគនៅកម្ពុជា។
នៅក្នុងពិធីនេះលោក ហ្វូមីគី តាកាហាស៊ី ប្រធានសមាគមជប៉ុន កម្ពុជា បានមានប្រសាសន៍ ថ្លែងរៀបរាប់ប្រាប់បណ្តាវិនិយោគិនជប៉ុន វិនិយោគិនបរទេសជាច្រើន អំពីប្រវត្តិសាស្រ្តកម្ពុជាដែលធ្លាប់រងគ្រោះដោយសារសង្រ្គាម ប៉ុន្តែនៅពេលដែលលោកបានធ្វើការងារទូតរបស់ជប៉ុនប្រចាំកម្ពុជាកំឡុងឆ្នាំ២០០៣ ដល់ឆ្នាំ២០០៧នោះ លោកបានឃើញប្រទេសកម្ពុជាមានការរីកចំរើនជាបន្តបន្ទាប់ ជាពិសេសកំណើនសេដ្ឋកិច្ចកើនឡើងគួរឱ្យកត់សម្គល់ ដោយឡែកចំនួនប្រជាជនជប៉ុនកាលកំឡុងឆ្នាំ២០០៣ ដល់២០០៧នោះ ចំនួនធ្វើការងារ និងរស់នៅបរទេសកម្ពុជាមិនដល់១ពាន់នាក់ផង និងមានក្រុមហ៊ុនជប៉ុនតិចជាង៣០ក្រុមហ៊ុន ។ លោកបានបន្តថា ក្រោយមកកម្ពុជាមានកិច្ចសហប្រតិបត្តិការកាន់តែខ្លាំងក្លាជាមួយប្រទេសជប៉ុន ហើយចំនួនក្រុមហ៊ុន ជប៉ុន ជាច្រើនបានដាក់ទុនវិនិយោគនៅកម្ពុជា ដោយរយៈពេល១០ឆ្នាំចុងក្រោយនេះកម្ពុជាមានការរីកចំរើនគួរជាទីមោទនៈ។
នៅក្នុងឱកាសនេះផងដែរដើម្បីជាការផ្តល់សារគន្លឹះបណ្តាវិនិយោគិនជប៉ុន វិនិយោគិនបរទេសជាច្រើន ដើម្បីស្វែងយល់ និងទទួលបានសារគន្លឹះរបស់សម្តេចតេជោនាយករដ្ឋមន្រ្តី ស្តីពីឱកាស និងសក្កានុពលវិនិយោគនៅកម្ពុជា សម្តេចតេជោនាយករដ្ឋមន្រ្តីបានមានប្រសាសន៏ ថ្លែងប្រាប់ដល់វិនិយោគិនជប៉ុន និងបរទេសថា កម្ពុជាគឺធ្លាប់រងគ្រោះដោយសារសង្រ្គាម ហើយសម្តេចផ្ទាល់បានយកជីវិតធ្វើដើមទុនដើម្បីរំដោះប្រទេសពីសង្រ្គាម និងខិតខំតាំងពីកម្ពុជាជាប្រទេសក្រីក្រ១០០ភាគរយ រហូតដល់មានកំណើនសេដ្ឋកិច្ចរង្វង់ជាង៧ភាគរយ ដែលនេះមិនមែនជារឿងចៃដន្យទេ។
សម្តេចតេជោនាយករដ្ឋមន្រ្តីបានបន្តថា ពីមុនភ្ញៀវទេសចរណ៏ជប៉ុនទៅលេងកម្ពុជា គឺខាងទូតជប៉ុនបានប្រាប់ថា កុំដើរទៅតំបន់ណាក្រៅពីភ្នំពេញ និងសៀមរាប ព្រោះខ្លាចគ្រោះថ្នាក់នានា ប៉ុន្តែពេលនេះកម្ពុជាមានហេដ្ឋារចនាសម្ព័ន្ធគ្រប់បែបយ៉ាងធ្វើដំណើរគ្រប់ទិសទី ប្រព័ន្ធដឹកជញ្ជូនក៏មាន ដូច្នេះហើយសម្តេចតេជោបានពន្យល់ និងជំរុញឱ្យបណ្តាវិនិយោគិនជប៉ុន វិនិយោគិនបរទេសជាច្រើនទៀតនោះ មកប្រទេសកម្ពុជាដើម្បីស្វែងយល់ និង ឱកាស និងសក្កានុពលវិនិយោគនៅកម្ពុជា។
