ក្នុងពិធីបិទសន្និបាតបូកសរុបការងារ ឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា នៅព្រឹកថ្ងៃទី៦ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត បានឆ្លើយតបទៅអ្នករិះគន់រាជរដ្ឋាភិបាលដែលថា រដ្ឋគិតតែពីយកលុយទៅជួយប្រជាជន បង្កើតវប្បធម៌ពឹងផ្អែក មិនគិតបង្កើតកម្មវិធីឱ្យពលរដ្ឋអាចរស់ដោយខ្លួនឯង ដែលចំណុចនេះ ត្រូវបានសម្តេចធិបតី គូសបញ្ជាក់ថា រាជរដ្ឋាភិបាលត្រូវគិតគូរពីកម្រិតគោលនយោបាយដើម្បីជួយប្រជាពលរដ្ឋក្រីក្រ ដោយមិនបង្កើតនូវការពឹងផ្អែកនោះឡើយ។
សម្តេចធិបតី ហ៊ុន ម៉ាណែត បានគូសបញ្ជាក់ថា ការអភិវឌ្ឍសេដ្ឋកិច្ច ប្រកបដោយចីរភាពនីមួយៗ គឺត្រូវបង្កើតវប្បធម៌ និងលក្ខណៈសម្បត្តិឱ្យប្រជាជនអាចមានសមត្ថភាពរស់ដោយខ្លួនឯងបាន មិនអាចទុកឱ្យរដ្ឋចិញ្ចឹមគាត់រហូតនោះទេ។
ទន្ទឹមនោះ សម្តេចធិបតី ហ៊ុន ម៉ាណែត បានសង្កត់ធ្ងន់ថា សេដ្ឋកិច្ចរបស់ប្រទេសកម្ពុជា គឺសេដ្ឋកិច្ចទីផ្សារសេរី ដោយយើងត្រូវធ្វើយ៉ាងណាឱ្យប្រជាពលរដ្ឋអាចរកត្រីខ្លួនឯងបាន ប៉ុន្តែយើងក៏ត្រូវទទួលស្គាល់ដែរថា នៅក្នុងប្រទេសកម្ពុជា នៅតែមានអ្នកដែលមិនអាចរកត្រីបានផងដែរ ដោយសារកត្តាសុខភាព បញ្ហាកាយសម្បទា ចាស់ជរា ជនពិការ កុមារកំព្រាជាដើម ដែលទាមទារនូវការយកចិត្តទុកដាក់ខ្ពស់ពីរាជរដ្ឋាភិបាល៕
