សម្តេចធិបតី ហ៊ុន ម៉ាណែត បានថ្លែងថា គេត្រូវគិតគូរពីផលប៉ះពាល់ជាមុន តាំងពីមុនសាងសង់ ពេលសាងសង់ និងនៅក្រោយពេលសាងសង់ ទៅលើបរិស្ថាន ព្រៃឈើ អេកូឡូស៊ី និងជាពិសេសផលប៉ះពាល់លើប្រជាពលរដ្ឋ។ សម្ដេចធិបតីបានបន្តថា គេក៏ត្រូវថ្លឹងថ្លែងពីផលដែលបានពីការវិនិយោគ ការផលិតសេដ្ឋកិច្ច និងការអភិវឌ្ឍសង្គម ថាតើវាសមស្របទៅនឹងផលប៉ះពាល់អវិជ្ជមានទៅលើប្រជាពលរដ្ឋដែរឬទេ។
សម្តេចធិបតី ហ៊ុន ម៉ាណែត បានថ្លែងដូចនេះនៅព្រឹកថ្ងៃទី៣០ ខែវិច្ឆិកា ឆ្នាំ២០២៣ ក្នុងឱកាសអញ្ជើញជាអធិបតីក្នុងពិធីបិទស្ទឹង និងបើកការដ្ឋានសាងសង់ «ទំនប់វារីអគ្គីសនីស្ទឹងតាតៃលើ» ដែលមានអនុភាព ១៥០ មេហ្គាវ៉ាត់ នៅក្នុងស្រុកថ្មបាំង ខេត្តកោះកុង។
សម្តេចធិបតី ហ៊ុន ម៉ាណែត បានថ្លែងបន្តថា ពិតណាស់ យើងត្រូវការអគ្គិសនីដែលផលិតខ្លួនឯង ដោយមិនចាំបាច់ពឹងដង្ហើមគេដកគ្រប់ពេលទេ ពោលបើនៅថ្ងៃណាមួយ ប្រទេសជិតខាងផលិតលែងបាន នោះវានឹងបង្កគ្រោះថ្នាក់ដល់យើងជាក់ជាមិនខាន៕
