សម្តេចធិបតី ហ៊ុន ម៉ាណែត បានថ្លែងថា សម្រាប់វិស័យហេដ្ឋារចនាសម្ព័ន្ធ ពីនេះទៅមុខ រដ្ឋាភិបាលនឹងមិននៅស្ងៀមនោះទេ ពោលគឺយើងនឹងខិតខំសាងសង់ និងកែលម្អបន្ថែមទៀត។ ជាមួយគ្នានេះអ្វីដែលមានស្រាប់ យើងនឹងខិតខំថែរក្សា ថែទាំ ដើម្បីឱ្យប្រើប្រាស់ឱ្យបានយូរ ហើយបើមិនទាន់គ្រប់ស្តង់ដារទេ យើងត្រូវខិតខំពង្រីក និងពង្រឹងបន្ថែម។
សម្តេចធិបតី ហ៊ុន ម៉ាណែត បានថ្លែងបន្ត ក្នុងអណត្តិទី ៧ នេះ រដ្ឋាភិបាលនឹងបន្តជំរុញគម្រោងវិនិយោគធំៗ ទាំងតាមរយៈការប្រើប្រាស់ធនធានវិនិយោគរបស់វិស័យឯកជន ព្រមទាំងឥណទានមួយចំនួនទៀត ដើម្បីយកមកបម្រើដល់ការពង្រីកហេដ្ឋារចនាសម្ព័ន្ធដើម្បីតភ្ជាប់សសៃឈាមរបស់យើង និងឱ្យសសៃឈាមទាំងនេះ កាន់តែរីកធំធាត់ដើម្បីចិញ្ចឹមប្រជាពលរដ្ឋទូទាំងប្រទេស។
សម្តេចធិបតី ហ៊ុន ម៉ាណែត បានមានប្រសាសន៍បន្ថែមថា អាទិភាពសំខាន់បំផុតគឺពង្រឹងផ្លូវដែកខាងជើង (ភ្នំពេញ-ប៉ោយប៉ែត) និងខាងត្បូង (ភ្នំពេញ តាកែវ កំពត ព្រះសីហនុ)។
សម្ដេចធិបតី ហ៊ុន ម៉ាណែត បានថ្លែងដូចនេះក្នុងឱកាសអញ្ជើញជាអិបតីសម្ពោធបើកអោយប្រើប្រាស់ជាផ្លូវការ «កំណាត់ផ្លូវជាតិលេខ ៥ ចាប់ពីព្រែកក្តាមទៅដល់បាត់ដំបងប្រវែងសរុប ២៤៦,១៥គ.ម និងបើកការដ្ឋានសាងសង់កំណាត់ផ្លូវជាតិលេខ ៥ ចាប់ពីសិរីសោភ័ណ្ឌទៅដល់ប៉ោយប៉ែតប្រវែង ៣៥,១៤ គ.ម» នាព្រឹកថ្ងៃទី២២ វិច្ឆិកា ឆ្នាំ២០២៣៕
