ថ្ងៃស្អែក គឺជាថ្ងៃទី០៩ ខែវិច្ឆិកា ឆ្នាំ២០២៣ ដែលជាថ្ងៃដែលប្រជាពលរដ្ឋកម្ពុជាទូទាំងប្រទេស ចងចាំបានថាជាថ្ងៃដែលកម្ពុជាបានទទួលឯករាជ្យភាព ពីនឹមអាណានិគមនិយមបារាំង ប៉ុន្តែសូមកុំភ្លេចមោទកភាពជាតិរបស់កម្ពុជា ក៏ត្រូវការមានសន្តិភាព និងការអភិវឌ្ឍផងដែរ។
សង្គមមួយដែលមានមោទកភាពជាតិ និងវឌ្ឍនភាពសង្គមជានិរន្តន៍បាន គឺត្រូវការជាចាំបាច់នូវមូលបទទាំងបីនេះ គឺឯករាជ្យភាព សន្តិភាព និង ការអភិវឌ្ឍ ដូច្នេះយើងទាំងអស់គ្នាត្រូវតែយកចិត្តទុកដាក់ និងត្រូវធ្វើយ៉ាងណាពូនជ្រុំក៏ដូចជាថែរក្សាមូលបទទាំងបីឱ្យបន្តមាននៅក្នុងសង្គមកម្ពុជាជានិច្ច។
ឯករាជ្យភាព សន្តិភាព និង ការអភិវឌ្ឍ នេះ គឺត្រូវការគ្នាទៅវិញទៅមក មិនអាចអត់មួយណាបានឡើយ ។ នៅក្នុងដំណើរវិវត្តន៍ទៅមុខរបស់សង្គមមនុស្ស ការបាត់បង់ឬក៏អន់ថយនៅចំណុចណាមួយ នៃមូលបទទាំងបី គឺពិតជាប៉ះពាល់ដល់តម្លៃ និងមូលដ្ឋាននៅក្នុងការទ្រទ្រង់មោទកភាពជាតិនៅថ្ងៃអនាគតជាមិនខាន។
ជាការពិត ប្រសិនបើកម្ពុជាមិនទទួលបានឯករាជ្យពេញលេញ នៅថ្ងៃទី០៩ ខែវិច្ឆិកា ឆ្នាំ១៩៥៣ នោះទេ ក៏គ្មានជាតិសាសន៍ និងអត្តសញ្ញាណជាតិខ្មែរមកដល់បច្ចុប្បន្ននេះឡើយ ដូច្នេះការដែលយើងជួបជុំគ្នា រម្លឹកខួប៧០ឆ្នាំ នៃព្រឹត្តិការណ៍ប្រវត្តិសាស្រ្ត ដែលជាស្នាព្រហស្ថ និងព្រះរាជបូជនីយកិច្ចដឹកនាំដ៏ក្លៀវក្លារបស់ព្រះមហាវីរក្សត្រខ្មែរ ព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ គឺជារឿងដែលយើងត្រូវតែធ្វើនៅក្នុងនាមជាកុលបុត្រខ្មែរ ជាម្ចាស់ជោគវាសនានៃព្រះរាជាណាចក្រកម្ពុជា។
ព្រឹត្តិការណ៍នេះ បង្ហាញពីសមត្ថភាព និងថាមពល ដែលពលរដ្ឋកម្ពុជាអាចមានសមត្ថភាពដណ្តើមបានមកវិញនូវសិទ្ធិសេរីភាព និងភាពជាម្ចាស់ទឹកដីរបស់ប្រជាជាតិកម្ពុជា ក្រោយពេលដែលបានបាត់បង់នូវឥស្សរភាព តាំងតែពីថ្ងៃទី១១ ខែសីហា ឆ្នាំ១៨៦៣ មកនោះ។
ព្រឹត្តិការណ៍ថ្ងៃទី០៩ ខែវិច្ឆិកា ឆ្នាំ១៩៥៣ គឺជាសក្ខីភាពនៃវីរភាពរបស់កុលបត្រខ្មែរ លើអាណានិគមនិយមបារាំង ប៉ុន្តែឥស្សរភាពនេះបានស្រអាប់ជាបន្តបន្ទាប់ប្រមាណជាជិត ៣ទស្សវត្សរ៍ ដោយសារយើងមិនទុកចិត្តគ្នា ហើយនាំគ្នាធ្វើឱ្យសន្តិភាពមានភាពរង្គោះរង្គើ ប្រទេសធ្លាក់នៅក្នុងភ្នក់ភ្លើងសង្រ្គាមស៊ីវិល ចាប់តាំងពីរដ្ឋប្រហារថ្ងៃទី១៨ ខែមីនា ឆ្នាំ១៩៧០ រហូតដល់ធ្លាក់ខ្លួននៅក្នុងរបបវាលពិឃាត ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី០៦ ខែមករា ឆ្នាំ១៩៧៩ និងការបែកបាក់ទឹកដីជាដុំ រហូតដល់ថ្ងៃទី២៩ ខែធ្នូ ឆ្នាំ១៩៩៨ ទើបកម្ពុជាមានសន្តិភាពពេញបរិបូណ៍ ។
ក្រោយពេលដែលមានឯករាជ្យ មានសន្តិភាពនេះហើយ ទើបបានជាចរន្តនៃការអភិវឌ្ឍកម្ពុជាមានសន្ទុះឡើងយ៉ាងឆាប់រហ័ស និងបន្តកើតមានជាបន្តបន្ទាប់ ហើយប្រាក់ចំណូលមធ្យមសម្រាប់ពលរដ្ឋម្នាក់ៗ រំពឹងថានឹងឡើងពី ១ ៩១៧ដុល្លារ នៅឆ្នាំ២០២៣ ទៅដល់២ ០៧១ ដុល្លារនៅឆ្នាំ២០២៤ ខណៈដែលទុនបម្រុងអន្តរជាតិកើនឡើងពី ១៩ ៤៣៧ ដុល្លារទៅដល់ ២១ ២៨៥ លានដុល្លារ រីឯអតិផរណា ស្ថិតនៅក្នុងរង្វង់ត្រឹមតែ ២,៥ភាគរយ ខណៈដែលនៅប្រទេសមួយចំនួន សូម្បីតែប្រទេសមហាអំណាចក៏លើសនេះ២ដងឯណោះក៏មាន។
សមិទ្ធផលចាប់តាំងពីមានសន្តិភាពរហូតមកដល់ពេលនេះ នៅមានច្រើនថែមទៀត ជាពិសេសគឺហេដ្ឋារចនាសម្ព័ន្ធរូបវ័ន្តជាស្ពាន និងផ្លូវថ្នល់ អាកាសយានដ្ឋាន គឺសុទ្ធតែកសាងថ្មី មិនមែនកម្ពុជាបន្តរស់នៅក្នុងកេរ្តិ៍ដំណែលពីមុនឡើយ។ សំណង់អគារខ្ពស់ៗ កើតមានមិនត្រឹមតែនៅរាជធានីភ្នំពេញ និងខេត្តព្រះសីហនុនោះទេ គឺនៅតាមខេត្តនានា ក៏កំពុងតែរីកដុះដាលជាច្រើនផងដែរ។ កម្រិតជីវភាព ក៏ដូចជាស្តង់ដារជីវភាពរស់នៅរបស់ប្រជាពលរដ្ឋកម្ពុជា ក៏មានការប្រែប្រួលគួរជាទីកត់សម្គាល់ ហើយសក្ខីភាពនេះគឺយើងបានឃើញនៅក្នុងអំឡុងពេលនៃការរីករាលដាលនៃមេរោគកូវីដ១៩ ខណៈដែលប្រទេសជាច្រើនមានអ្នកជំងឺគ្មានកន្លែងសម្រាក តែកម្ពុជា អាចទ្រទ្រង់សភាពការណ៍បាន ហើយនៅពេលនេះនៅសល់មូលនិធិ ដែលអាចបម្លែងទៅជាមន្ទីរពេទ្យឯកទេស និងសាងសង់មន្ទីរពេទ្យប្រមាណមួយម៉ឺនគ្រែ សម្រាប់ត្រៀមផងដែរ។
សរុបមកវិញសូមឱ្យស្មារតីនៃឯករាជ្យជាតិបន្តស្ថិតស្ថេរ ប៉ុន្តែកុំភ្លេចបន្តពូនជ្រុំ និងថែទាំ ព្រមទាំងការពារឱ្យបាននូវសន្តិភាព ដែលជាមូលដ្ឋានគ្រឹះនៃការអភិវឌ្ឍ ដូច្នេះក្នុងករណីបាត់បង់មូលបទណាមួយ តម្លៃនៃមោទកភាពជាតិនឹងប្រែប្រួលទៅតាមនោះ ហើយកិត្យានុភាព និងកិត្តិនាមជាតិក៏នឹងស្រអាប់ផងដែរ៕
ប្រភព៖ AKP
