សម្តេចតេជោ ឆ្លៀតជួបនិស្សិតសិក្សានៅគុយបា និងណែនាំឱ្យខិតខំសិក្សាយកចំណេះបម្រើជាតិ

 

(ហាវ៉ាណា)៖ ក្នុងដំណើរទស្សនកិច្ចនៅប្រទេសគុយបា បើទោះបីមមាញឹកជាមួយកម្មវិធីនានាយ៉ាងណាក្តី សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅតែឆ្លៀតជួបនិស្សិតកម្ពុជាកំពុងសិក្សានៅគុយបា និងផ្តល់ដំបូន្មានមួយចំនួនដល់ពួកគេ។

ក្នុងជំនួបជាមួយនិស្សិត៦រូបកំពុងសិក្សានៅគុយបា សម្តេចតេជោនាយករដ្ឋមន្ត្រី បានណែនាំដល់និស្សិតកម្ពុជាទាំងអស់ ត្រូវខិតខំសិក្សាលើផ្នែកសុខាភិបាល ព្រោះថា គុយបា ជាប្រទេសមានភាពជឿនលឿនលើការបណ្តុះបណ្តាលលើវិស័យសុខាភិបាល។

សម្តេចតេជោ បានណែនាំឱ្យពួកគេត្រូវខិតខំប្រឹងប្រែងសិក្សារៀនសូត្រ ដើម្បីយកចំណេះវិទ្យាមកបម្រើប្រទេសវិញ។ ជាមួយគ្នានោះត្រូវមានទំនាក់ទំនងល្អជាមួយប្រជាពលរដ្ឋគុយបា និស្សិតរៀនក្នុងថ្នាក់ សិស្សរៀនក្នុងសាលាជាមួយ និងនិស្សិតមកពីបរទេសដូចគ្នា។

សម្តេចតេជោនាយករដ្ឋមន្ត្រី ក៏បានឧបត្ថម្ភថវិកាមួយចំនួន ជូនដល់និស្សិតទាំង៦រូបផងដែរ។ តំណាងនិស្សិត បានថ្លែងអំណរគុណជូនចំពោះសម្តេចតេជោ ដែលបានផ្តល់ឱកាស និងអនុញ្ញាតឱ្យក្មួយៗ បានចូលជួបសំដែងការគួរសម ដើម្បីបានស្តាប់ដោយផ្ទាល់នូវ ប្រសាសន៍ណែនាំ។ តំណាងនិស្សិតក៏ បានថ្លែងអំណរគុណសម្តេចតេជោ ដែលបានខិតខំដំឡើងប្រាក់អាហារូបករណ៍ ដល់ការសិក្សារបស់និស្សិតនៅក្រៅប្រទេស៕

ពត៌មានទាក់ទង

ពត៌មានផ្សេងៗ