ព្រៃវែង ថ្ងៃទី១៤ ខែកក្កដា ឆ្នាំ២០២០ — សម្ដេចចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឱ្យក្រសួងកសិកម្ម រុក្ខាប្រមាញ់ និងនេសាទ និងស្ថាប័ន ពាក់ព័ន្ធត្រូវខិតខំ ជំរុញចំនួនកសិករធ្វើវារីវប្បកម្មឱ្យបានច្រើន ហើយសម្តេចតេជោ បានប្រកាសនឹងបន្ថែម ថវិកាវិនិយោគបន្ថែមទៀត លើវិស័យនេះប្រសិនបើមានតម្រូវការបន្ថែម។
ក្នុងឱកាសអញ្ជើញចុះពិនិត្យមើលវឌ្ឍនភាពនិងផែនការអភិវឌ្ឍន៍ នៃការធ្វើវារីវប្បកម្មនៅកម្ពុជា នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាបរបស់រដ្ឋបាល ជលផល ដែលមានទីតាំងស្ថិត នៅភូមិបាទី ឃុំពាមរក៍ ស្រុកពាមរក៍ ខេត្តព្រៃវែង នាព្រឹក ថ្ងៃអង្គារ ៩រោចខែអាសាឍ ឆ្នាំជូត ទោស័ក ពុទ្ធសករាជ ២៥៦៤ត្រូវនឹងថ្ងៃទី១៤ ខែកក្កដា ឆ្នាំ២០២០ សម្ដេចតេជោ ហ៊ុន សែន បានលើកឡើងថា នៅសម័យមុនត្រីគ្រប់ប្រភេទមានច្រើន មនុស្សតិច តែបច្ចុប្បន្នមនុស្សច្រើន ត្រីតិចទៅវិញ នេះជាភាពផ្ទុយគ្នារវាងកំណើនមនុស្ស និងម្ហូបអាហារ ដូច្នេះហើយដើម្បីបំពេញសេចក្តីត្រូវការនេះ គឺចាំបាច់ត្រូវរៀបចំឱ្យមានការផ្គត់ផ្គង់ម្ហូបអាហារក្នុងស្រុកឱ្យបានគ្រប់គ្រាន់តាមរយៈការរៀបចំកម្មវិធីលែងកូនត្រី និងជំរុញការចិញ្ចឹមកង្កែប ត្រីគ្រប់ប្រភេទ ជាពិសេសត្រីអណ្តែង ហើយនៅក្នុងគម្រោងនៃការគាំពាំវារីវប្បកម្មនេះ រាជរដ្ឋាភិបាលបានទម្លាក់កញ្ចប់ថវិកាជាច្រើនដោយការចំណាយអស់ ៥០លានដុល្លារអាម៉េរិក ដើម្បីគាំទ្រដល់វិស័យវារីវប្បកម្ម។ បើតាមសម្តេចតេជោ ហ៊ុន សែន បច្ចុប្បន្នមានកសិករចិញ្ចឹមត្រី ប្រមាណ ៤ម៉ឺន ៦ពាន់គ្រួសារ ហើយសម្តេច ចង់ពង្រីកឱ្យបានដល់១០ម៉ឺនគ្រួសារ ដើម្បីបង្កើនការចិញ្ចឹមត្រី ផ្គត់ផ្គង់តម្រូវការទីផ្សារក្នុង ស្រុក។ ក្នុងន័យនេះ សម្តេចតេជោ បានជំរុញឱ្យក្រសួងកសិកម្មនិងស្ថាប័ន ពាក់ព័ន្ធត្រូវខិតខំជំរុញលើការពង្រីក ចំនួនកសិករចិញ្ចឹមត្រីនេះ ហើយសម្តេចតេជោ បានប្រកាសនឹងបន្ថែមថវិកាវិនិយោគបន្ថែមទៀត លើការចិញ្ចឹមត្រីនេះ ប្រសិនបើមានតម្រូវការបន្ថែម។
សម្តេចតេជោ ហ៊ុន សែន បានគូសបញ្ជាក់បន្ថែមថា ការទម្លាក់ថវិកាវិនិយោគលើ ការចិញ្ចឹមត្រីក្នុងស្រុកនេះ ជាការផ្តល់ការងារជូនប្រជាពលរដ្ឋ និងការបង្កើនប្រាក់ចំណូលជូនប្រជាពលរដ្ឋ ហើយសម្តេចតេជោក៏បានជំរុញឱ្យពលរដ្ឋដែលត្រលប់មកពីប្រទេសថៃ និងពលរដ្ឋដែលរងផលប៉ះពាល់ដោយកូវីដ-១៩ អាចងាកមកចាប់មុខរបរចិញ្ចឹមត្រី ដោយ រដ្ឋ នឹងផ្តល់នូវកូនត្រី រួមនឹងជួយបណ្តុះបណ្តាល បច្ចេកទេសចិញ្ចឹមត្រីបន្ថែមផងដែរ។
សម្ដេចតេជោបានជំរុញឱ្យរដ្ឋមន្ត្រីក្រសួងកសិកម្ម សហការជាមួយក្រសួង ស្ថាប័ន ពាក់ព័ន្ធដទៃទៀត ត្រូវជំរុញមន្ត្រីជំនាញរបស់ខ្លួន ឆាប់រហ័សរៀបចំបញ្ជូនអ្នកជំនាញ បច្ចេកទេសចុះបង្ហាត់បង្រៀនដល់ប្រជាកសិករ ដោយផ្ទេរនូវចំណេះដឹង និងជំនាញដល់ប្រជាកសិករដោយផ្ទាល់។ សម្ដេចតេជោបានថ្លែងបញ្ជាក់បន្ថែមថា ជំងឺកូវីដ-១៩ មិនអាចសម្លាប់ជីវភាពរបស់ប្រជាជនកម្ពុជាបាននោះទេ ពីព្រោះជីបចររបស់ប្រទេសកម្ពុជា គឺវិស័យកសិកម្មដែលប្រជាជនកម្ពុជាមិនពឹងផ្អែកតែទៅលើវិស័យឧស្សាហកម្មទាំងស្រុងនោះទេ ដូច្នេះរួមគ្នាត្រូវខិតខំជំរុញវិស័យកសិកម្មឱ្យក្លាយទៅជាវិស័យមួយ កាន់តែមានសក្តានុពលថែមទៀត៕
ដោយ ជឹម ណារី
