ភ្នំពេញ ថ្ងៃទី២៣ ខែមីនា ឆ្នាំ២០២០ — ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាលបានបង្ហាញក្តីសង្ឃឹមថា កម្ពុជានឹងប្រយុទ្ធ ប្រឆាំងជំងឺកូវីដ-១៩ ប្រកបដោយប្រសិទ្ធភាពជាមួយជំនាញការក្រុមគ្រូពេទ្យចិន ដែលទើបមកដល់កម្ពុជាចំនួន៧រូប។
ថ្លែងប្រាប់ក្រុមអ្នកសារព័ត៌មានចំពោះមុខក្រុមគ្រូពេទ្យចិននៅអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី២៣ ខែមីនា ឆ្នាំ២០២០នេះ ឯកឧត្តម ម៉ម ប៊ុន ហេង បានគូសបញ្ជាក់ថា ក្រុមគ្រូពេទ្យចិនដែលទើបមកដល់នេះសុទ្ធតែអ្នកមានបទពិសោធន៍ខ្ពស់ក្នុងការទប់ស្កាត់ជំងឺកូវីដ-១៩។ ឯកឧត្តមបានថ្លែងថា “ខ្ញុំសូមស្វាកមន៍ក្រុមគ្រូពេទ្យទាំងអស់ដែលអញ្ជើញមកទីនេះ ដែលនេះជាសញ្ញាមួយនៃមិត្តភាពសាមគ្គីភាពនៃបងប្អូនប្រជាជនចិននិងប្រជាជនកម្ពុជាក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ពេលលំបាកគាត់មកជួយយើងភ្លាម។ ដូច្នេះយើងមានអ្នកឯកទេសសាធារណរដ្ឋប្រជាមានិតចិន យើងរៀនសូត្រពីសាធារណរដ្ឋប្រជាមានិតចិន គាត់មានបទបិសោធន៍ច្រើន”។ ឯកឧត្ដមរដ្ឋមន្រ្ដីបានថ្លែងអំណរគុណយ៉ាងជ្រាលជ្រៅបំផុតចំពោះក្រុមគ្រូពេទ្យចិនដែលបានអញ្ជើញមកដល់កម្ពុជានាថ្ងៃនេះ ហើយយើងសង្ឃឹមថានឹងធ្វើកិច្ចសហប្រតិបត្តិការជាមួយគ្នា ជាពិសេសសំណូមពរបងប្អូនប្រជាពលរដ្ឋកុំភិតភ័យហួស យើងនឹងប្រយុទ្ធនឹងជំងឺកូវីដ-១៩នេះប្រកបដោយប្រសិទ្ធភាព។
សូមបញ្ជាក់ថា ក្រុមជំនាញការពេទ្យចិនទាំង៧រូបនេះដឹកនាំដោយលោក AI Xiang អនុប្រធាននាយកដ្ឋានថែទាំសុខភាពនៃគណៈកម្មាធិការសុខាភិបាលតំបន់ស្វយ័តខេត្តក្វាងស៊ី។ ជាមួយគ្នានេះ ក្រុមជំនាញបាននាំមកជាមួយនូវសម្ភារបរិក្ខារវេជ្ជសាស្ត្រមួយចំនួនដូចជា៖ ស្រោមដៃចំនួន៧.០០០, ម៉ាស់វះកាត់ចំនួន៥៨.០០០, ម៉ាស់វេជ្ជសាស្ត្រចំនួន៥៥.០០០, ម៉ាស់ N95ចំនួន៥.០០០, មួកចំនួន១៨.៥០០, គម្របស្បែកជើងចំនួន៤.០០០, អាវអ៊ាមចំនួន១.៣០០, សម្លៀកបំពាក់សុវត្ថិភាពមន្ត្រីសុខាភិបាលចំនួន១.២៥០, របាំងមុខវេជ្ជសាស្ត្រចំនួន៥០, ទែម៉ូមែត្រវាស់កម្តៅប្រើអ៊ិនហ្រ្វារ៉េត និងវ៉ែនតាសុវត្ថិភាពចំនួន២.២៨០៕