បាត់ដំបង ថ្ងៃទី១៤ ខែមីនា ឆ្នាំ២០២០ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានថ្លែងក្នុងនាមរាជរដ្ឋាភិបាលកម្ពុជាសម្ដែងនូវការអបអរសាទរ ជាមួយនឹងសាធារណរដ្ឋប្រជាមានិតចិន ចំពោះវឌ្ឍនភាពនៃការខិតខំប្រឹងប្រែង ដើម្បីជម្នះនូវគ្រោះមហន្តរាយនៃជំងឺកូវីដ-១៩។
ថ្លែងក្នុងពិធីអបអរសាទរបុណ្យទន្លេលើកទី៦ ក្រោមប្រធានបទ«ទន្លេនៃសន្តិភាព ទន្លេនៃវិបុលភាព» នារសៀលថ្ងៃទី ១៤ ខែមីនាឆ្នាំ២០២០ នៅក្រុងបាត់ដំបង ខេត្តបាត់ដំបង សម្ដេចតេជោ ហ៊ុន សែន មានប្រសាសន៍ថា ឥឡូវនេះមិនមែនប្រទេសចិនទៀតទេដែលជាប្រទេសផ្ទុះចេញនូវមេរោគ កូវីដ-១៩ ប៉ុន្តែតំបន់អឺរ៉ុបទៅវិញទេដែលអង្គការសុខភាពពិភពលោកបានប្រកាសដាក់ទៅក្នុងភាពអាសន្នមួយ ដែលជាចំណុចកណ្ដាលនៃការផ្ទុះកូវីដ-១៩ ។សម្ដេចតេជោបានបន្តថា ក្នុងនាមរាជរដ្ឋាភិបាលនៃព្រះរាជាណាចក្រកម្ពុជា យើងក៏សូមសម្ដែងនូវការអបអរសាទរជាមួយនឹងសាធារណរដ្ឋប្រជាមានិតចិន ចំពោះវឌ្ឍនភាពនៃការខិតខំប្រឹងប្រែង ដើម្បីជម្នះនូវគ្រោះមហន្តរាយនេះ។ សម្ដេចតេជោបានបន្ដទៀតថា បើគិតពេញមួយថ្ងៃម្សិលមិញនេះ អាត្រាស្លាប់របស់ប្រជាជនដោយសារជំងឺកូវីដ-១៩គឺសូន្យ ក្នុងខណៈពេលដែលប្រទេសអ៊ីតាលី ក្នុងមួយថ្ងៃដូចគ្នាមមានអ្នកស្លាប់រហូតទៅដល់ជាង២០០នាក់ឯណ្ណោះ។ ដូច្នេះសាធារណរដ្ឋប្រជាមានិតចិនបានរំដោះខ្លួន ហើយកំពុងតែឈានទៅជួយដល់ប្រទេសផ្សេងទៀតផងដែរ ដើម្បីទប់ស្កាត់មេរោគដ៏សាហាវនេះ។ សម្ដេចតេជោគូសបញ្ជាក់ថា សម្រាប់កម្ពុជា ដែលមកដល់ពេលនេះ យើងមានពលរដ្ឋខ្មែរតែម្នាក់គត់នៅខេត្តសៀមរាប ដែលបានឆ្លងនៅជំងឺនេះ។ ប៉ុន្តែជាអកុសលគឺ យើងក៏បានរកឃើញជនជាតិបរទេសចំនួន៥នាក់ផ្សេងទៀតដែលមានជំងឺនេះ នោះគឺជនជាតិអង់គ្លេសចំនួន០៣នាក់ ជនជាតិកាណាដា០១នាក់ និងជនជាតិប៊ែលហ្សិក០១នាក់ដែលកើតជំងឺនេះនៅក្នុងប្រទេសរបស់យើង។ សម្ដេចតេជោបានបន្ថែមថា បើគិតទាំងជនជាតិចិន០១នាក់ដែលយើងព្យាបាលជាសះស្បើយ ហើយវិលត្រឡប់ទៅស្រុកវិញនោះ ចំនួនអ្នកមានវីរុសកូវីដ-១៩នៅកម្ពុជាទើបតែមានចំនួន០៧នាក់តែប៉ុណ្ណោះ។ សម្ដេចតេជោលើឡើងថា ពិតហើយមានក្រុមប្រតិកិរិយាមួយក្រុម បាននិយាយអំពីបញ្ហាការលាក់ទិន្ន័យរបស់កម្ពុជា ក៏ប៉ុន្តែសម្ដេចគ្រាន់តែបញ្ជាក់ជូនប្រជាពលរដ្ឋកម្ពុជាឱ្យបានជ្រាបថា កម្ពុជាបានធ្វើការយ៉ាងជិស្និទ្ធជាមួយដៃគូទាំងអស់ ជាពិសេសជាមួយនឹងអង្គការសុខភាពពិភពលោក ហើយរឿងទាំងអស់គ្មានការចាំបាច់ណាមួយដើម្បីលាក់លៀមជាមួយនឹងអ្នកដែលកើតនិងជំងឺនោះទេ។ ប្រសិនបើរារដ្ឋាភិបាលចង់លាក់ ក៏មិនអាចលាក់បានដែរ នេះគឺជារឿងពិត ព្រោះសាម៉ីខ្លួនគេៗដឹងថាឈឺ ឬមិនឈឺ។ ផ្ទុយទៅវិញរាជរដ្ឋាភិបាលអង្វករ និងអំពាវនាវឱ្យប្រជាពលរដ្ឋដែលមានការសង្ស័យថាមានជំងឺឆ្លង សុំឱ្យទាក់ទងទៅនឹងវិស័យសុខាភិបាល ដើម្បីពិនិត្យនូវជំងឺនោះ។
សម្ដេចតេជោនាយករដ្ឋមន្ត្រី បានអំពាវនាវដល់បងប្អូនជនរួមជាតិសូមរក្សានូវភាពស្ងៀមស្ងាត់ ការពារសុខភាព ធ្វើអនាម័យជាប្រចាំដើម្បីសុខភាពខ្លួនឯងផ្ទាល់និងក្រុមគ្រួសារ ហើយអាចការពារបាននូវជំងឺគ្រប់ប្រភេទ។ សម្ដេចក៏បានស្នើឱ្យបងប្អូនជនរួមជាតិផ្សព្វផ្សាយឱ្យបានទូលំទូលាយ នូវព័ត៌មានពិត ដើម្បីបំបាត់នូវព័ត៌មានក្លែងក្លាយដែលធ្វើឱ្យមានភាពចលាចលវឹកវរ និងអសន្តិសុខសង្គម។ ជាមួយគ្នានេះ រាជរដ្ឋាភិបាល ដែលមានក្រសួងសុខាភិបាលជាសេនាធិការបានធ្វើកិច្ចសហប្រតិបត្តិការជាមួយអង្គការសុខភាពពិភពលោក និងដៃគូនានា ដោយមានវិធានការយ៉ាងម៉ឺងម៉ាត់បំផុតក្នុងការការពារនិងត្រៀមលក្ខណៈសម្បត្តិដើម្បីប្រឈមនឹងជំងឺសកលនេះ។
សម្ដេចតេជោក៏សូមឱ្យបងប្អូនប្រជាពលរដ្ឋទូទាំងប្រទេសចូលរួមទាំងអស់គ្នាការពារ សុខភាពររៀងៗខ្លួន និងក្រុមគ្រួសារឱ្យបានល្អប្រសើរជាជាងការភ័យខ្លាចដែលធ្វើឱ្យប៉ះពាល់ដល់ជីវភាពរស់នៅ សុខុមាលភាពសង្គម៕
ដោយ ជឹម ណារី
