នំពេញ ថ្ងៃទី០៤ ខែកុម្ភៈ ឆ្នាំ២០២០ — ឯកឧត្ដម Patrick Murphy ឯកអគ្គរដ្ឋទូតវិសាមញ្ញ និងពេញសមត្ថភាពនៃសហរដ្ឋអាមេរិក ប្រចាំនៅកម្ពុជាបានបង្ហាញពីការពង្រឹង និងពង្រីកកិច្ចសហប្រតិបត្តិរវាងប្រទេសទំាងពីរសហ រដ្ឋអាមេរិក និងកម្ពុជា ឱ្យកាន់តែរឹងមាំឡើងថែមទៀត តាមរយៈបេសកកម្មការទូតរបស់ឯកឧត្ដមឯកអគ្គរដ្ឋទូតថ្មីនៅកម្ពុជា។ ការបញ្ជាក់នេះធ្វើឡើងក្នុងឱកាស ចូលជួបសម្តែងការជា មួយសម្តេចអគ្គមហាពញាចក្រី ហេង សំរិន ប្រធានរដ្ឋសភា នៅវិមានរដ្ឋសភា នាព្រឹកថ្ងៃទី០៤ ខែកុម្ភៈ ឆ្នាំ២០២០។
ឯកឧត្ដម Patrick Murphy បានវាយតម្លៃខ្ពស់ដល់ស្ថាប័នរដ្ឋសភា ដែលជាស្ថាប័នកំពូល និងជាតំណាងឱ្យប្រជាពលរដ្ឋ ហើយកម្ពុជានិងសហរដ្ឋអាមេរិកមានចំណុចជាច្រើនក្នុងប្រព័ន្ធដឹកនាំរដ្ឋដូចគ្នា ក្នុងនោះដូចជាការចែងអំពីលទ្ធិប្រជាធិបតេយ្យនៅក្នុងរដ្ឋធម្មនុញ្ញ ហើយអំណាចដឹកនាំរដ្ឋទំាងបី ចែកដាច់ពីគ្នា។ ឯកឧត្ដម ឯកអគ្គរដ្ឋទូតបានបន្ដថា កម្ពុជានិងសហរដ្ឋអាមេរិក បានកសាងសមិទ្ធផលជាច្រើនជាមួយគ្នារួចមកហើយ ដែលនៅឆ្នាំ២០២០នេះ គឺជាឱកាសកាន់តែសំខាន់ទៀត ដែលប្រទេសទំាងពីរមានលទ្ធភាពនៅក្នុងការពង្រឹងកិច្ចសហប្រតិបត្តិការជាមួយគ្នា ជាពិសេសឆ្នាំ២០២០នេះ គឺជាខួប៧០ឆ្នាំ នៃទំនាក់ទំនងការទូតរវាងប្រទេសទំាងពីរ។
សម្តេចអគ្គមហាពញាចក្រី ហេង សំរិន បានស្វាគមន៍ និងអបអរសាទរចំពោះឯកឧត្តម ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសហរដ្ឋអាមេរិក ប្រចាំព្រះរាជាណាចក្រកម្ពុជា។ សម្តេចប្រធានបានគូសបញ្ជាក់ថា បេសកកម្មការទូតរបស់ ឯកឧត្ដម ឯកអគ្គរដ្ឋទូត គឺពិតជាមានសារៈសំខាន់ខ្លាំងណាស់ ដល់ការបន្តថែរក្សា និងលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសកម្ពុជា-សហរដ្ឋអាមេរិក ឱ្យកាន់តែរឹងមាំ និងរីកចម្រើនខ្លាំងក្លាថែមទៀត។ សម្តេចប្រធានរដ្ឋសភាក៏បានអបអរសាទរចំពោះវឌ្ឍនភាពទាំងឡាយ ដែលប្រសូត្រចេញពីកិច្ចខិតខំប្រឹងប្រែងពង្រឹង និងពង្រីកកិច្ចសហប្រតិបត្តិការរវាងរដ្ឋាភិបាលនៃប្រទេសទាំងពីរជាបន្តបន្ទាប់មកនេះ ដែលបាននាំមកនូវផលប្រយោជន៍យ៉ាងធំធេង ដល់ប្រជាជាតិទាំងសងខាង។
សម្តេចប្រធានបានបន្ថែមថា រដ្ឋសភាកម្ពុជា សូមអបអរសាទរចំពោះការផ្លាស់ប្តូរសារលិខិតដ៏មានតម្លៃ និងមានអត្ថន័យដ៏ជ្រាលជ្រៅរវាងឯកឧត្ដមប្រធានាធិបតីសហរដ្ឋអាមេរិក និងសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា កាលពីពេលថ្មីៗនេះ៕
ដោយ ប៊ុនរិទ្ធ