នៅរសៀលថ្ងៃទី២៧ ខែមករា ឆ្នាំ២០២០ នៅទីស្តីការគណៈរដ្ឋមន្ត្រី ឯកឧត្តមកិត្តិនីតិកោសល បណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអនុញ្ញាតឱ្យ ឯកឧត្តម W.Patrick Murphy ឯកអគ្គរដ្ឋទូតវិសាមញ្ញ និងពេញសមត្ថភាពនៃសហរដ្ឋអាម៉េរិកប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ។
ឯកឧត្តមកិត្តិនីតិកោសលបណ្ឌិត ប៊ិនឈិន ឧបនាយករដ្ឋមន្ត្រីប្រចាំការ បានសម្តែងនូវការស្វាគមន៍ និងកោតសរសើរចំពោះឯកឧត្តម W.Patrick Murphy ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសហរដ្ឋអាម៉េរិកប្រចាំព្រះរាជាណាចក្រកម្ពុជា ហើយឯកឧត្តមឧបនាយករដ្ឋមន្ត្រីប្រចាំការ មានសុទិដ្ឋិនិយមថា ក្នុងបេសកកម្មការងារការទូតរបស់ឯកឧត្តម W.Patrick Murphy នៅកម្ពុជានឹងធ្វើឱ្យទំនាក់ទំនងកម្ពុជា និងសហរដ្ឋអាម៉េរិក នឹងមានភាពល្អប្រសើរឡើង។
ជាមួយនឹងការវាយតម្លៃខ្ពស់អំពីបទពិសោធន៍ការងារ និងភាពប៉ិនប្រសប់របស់ឯកអគ្គរដ្ឋទូតសហរដ្ឋអាមេរិក ដែលឯកឧត្តមកិត្តិនីតិកោសលបណ្ឌិតឧបនាយករដ្ឋមន្ត្រីប្រចាំការបានចាត់ទុក ឯកឧត្តម W.Patrick Murphy ជាបុគ្គលមានចរិកមូលដ្ឋាន និងជាឥស្សរជនអាម៉េរិកដែលបានរៀនសូត្រ និងយល់ដឹងច្រើនពីប្រជាពលរដ្ឋ ខណៈដែលជាញឹកញាប់ ឯកឧត្តម W.Patrick Murphy តែងតែចុះទៅកាន់ទីជនបទ ដើម្បីការសិក្សាស្វែងយល់បញ្ហាជាច្រើនអំពីប្រជាជនកម្ពុជា ក៏ដូចជាការស្វែងរកកិច្ចសហការ ដើម្បីពង្រឹងទំនាក់ទំនងទ្វេភាគីរវាងកម្ពុជា‑ អាម៉េរិកលើវិស័យជាច្រើនទៀត ទាំងក្នុងក្របខណ្ឌអភិវឌ្ឍ ក៏ដូចជាពង្រឹងចំណងការទូត។
ឯកឧត្តម W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ក៏បានលើកឡើងផងដែរ អំពីជំនួបពិភាក្សាគ្នាជាវិជ្ជមានលើសកម្មភាពការងារជាច្រើនដែលសហរដ្ឋអាមេរិក បាននិងកំពុងធ្វើរួមគ្នាជាមួយក្រសួងអប់រំ យុវជន និងកីឡា ក្រសួងកសិកម្ម រុក្ខាប្រមាញ់ និងនេសាទ ពិភាក្សាអំពីការកសាងផ្លូវនៅតំបន់ជនបទ និងជួបជាមួយយុវជនកម្ពុជា ហើយចុងក្រោយនេះ ឯកឧត្តម W.Patrick Murphy ក៏បានជួបជាមួយរដ្ឋមន្ត្រីមួយចំនួនក្នុងរាជរដ្ឋាភិបាលកម្ពុជា ក្នុងនោះដូចជា ឯកឧត្តម ឧបនាយករដ្ឋមន្ត្រីរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ រដ្ឋមន្ត្រីក្រសួងអភិវឌ្ឍជនបទជាដើម ជាពិសេស ឯកឧត្តម W.Patrick Murphy ក៏បានរម្លឹកអំពីជំនួបជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយដែលភាគីទាំងពីរបានបង្ហាញនូវគោលជំហរដូចគ្នាជាច្រើនអំពីការតាំងចិត្តខ្ពស់ក្នុងការធ្វើឱ្យមានទំនាក់ទំនងកាន់តែរឹងមាំ និងល្អប្រសើរឡើងរវាងកម្ពុជា និងសហរដ្ឋអាម៉េរិក។ ឯកឧត្តម W.Patrick Murphy បានចាត់ទុកការពិភាក្សាគ្នាទៅវិញទៅមកដែលមានលក្ខណៈជាវិជ្ជមាននេះ ថាជាការផ្តល់នូវស្មារតីល្អប្រសើរជាងមុន។ ឯកឧត្តម W.Patrick Murphy ឯកអគ្គរដ្ឋទូតសហរដ្ឋអាម៉េរិកប្រចាំនៅកម្ពុជា បានឱ្យដឹងទៀតថា នៅក្នុងពេលឆាប់ៗខាងមុខនេះ នឹងមានពាណិជ្ជករមួយចំនួនរបស់សហរដ្ឋអាម៉េរិកនឹងមកកាន់កម្ពុជា ដើម្បីសិក្សាស្វែងរកឱកាសវិនិយោគនៅកម្ពុជាផងដែរ។ បន្ថែមពីលើនេះ ឯកឧត្តម W.Patrick Murphy ក៏បានឱ្យដឹងទៀតថា នៅខែមីនាខាងមុខនេះ សម្តេចអគ្គមហាសេនាបតីតេជោ ហ៊ុន សែន នឹងអញ្ជើញទៅចូលរួមកិច្ចប្រជុំកំពូលអាម៉េរិក អាស៊ាន ហើយដែលក្នុងឱកាសនោះ ឯកឧត្តម W.Patrick Murphy សង្ឃឹមថា ថ្នាក់ដឹកនាំនៃប្រទេសទាំងពីរអាម៉េរិក-កម្ពុជា នឹងបានរិតចំណងសាមគ្គីភាពកាន់តែល្អថែមទៀត ក៏ដូចជាចូលរួមដោះស្រាយបញ្ហាក្នុងតំបន់ និងពិភពលោកផងដែរ។
ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ក៏បានមានប្រសាសន៍លើកឡើងអំពីអនុស្សាវរីយ៍មួយដ៏មានអត្ថន័យយ៉ាងធំធេង ក្នុងពេលនៃការផ្តួចផ្តើមឱ្យមានកិច្ចព្រមព្រៀងបង្កើត និងដំណើរការកាត់សេចក្តីរបស់អង្គជំនុំជម្រះវិសាមញ្ញក្នុងតុលាការកម្ពុជា( អ.វ.ត.ក) ក្នុងន័យថា សហរដ្ឋអាម៉េរិកត្រូវបានចាត់ទុកថា ជាឆ្មបមួយ ( Midwife) ដែលបានជួយតាក់តែងកិច្ចព្រមព្រៀងស្តីពីការបង្កើតឱ្យមាន អ.វ.ត.ក ឬហៅកាត់ថា សាលាក្តីខ្មែរក្រហម។ ឯកឧត្តមកិត្តិនីតិកោសលបណ្ឌិត ប៊ិន ឈិន បានរម្លឹកថា កាលណោះ អ្នកជំនាញផ្នែកច្បាប់ និងជាឥស្សរជនសំខាន់របស់សហរដ្ឋអាម៉េរិកដែលបានចូលរួមដោយផ្ទាល់ គឺឯកឧត្តម David Scheffer ដែលជាអ្នកបានជួយធ្វើកិច្ចការងារនេះ ហើយសហរដ្ឋអាម៉េរិកក៏ជាអ្នកផ្តល់ជំនួយចំណាត់ថ្នាក់ទី៤ ដែលបានផ្តល់ថវិកាសរុបចំនួន៣២,២លានដុល្លាអាមេរិក សម្រាប់ភាគីអន្តរជាតិ នៃអ.វ.ត.ក ផងដែរ៕ 
