ភ្នំពេញ ថ្ងៃទី១៦ ខែមករា ឆ្នាំ២០២០ — លោកជំទាវ Obuchi Chizuko ភរិយាអតីតនាយករដ្ឋមន្ត្រីជប៉ុន អូប៊ូជី បានលើកឡើង នៅចំពោះមុខសម្តេចតេជោ ហ៊ុន សែន ថា កម្ពុជាបានទទួលនូវសុខសន្តិភាពពិតប្រាកដ និងការអភិវឌ្ឍ ហើយប្រជាជនកម្ពុជាមានទឹកមុខស្រស់ស្រាយ និងរស់រវើក។
នេះបើយោងតាមការឱ្យដឹងរបស់ ឯកឧត្ដម អ៊ាង សុផល្លែត ជំនួយការសម្ដេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ Obuchi Chizuko ភរិយាអតីតនាយករដ្ឋមន្ត្រីជប៉ុន អូប៊ូជី ចូលជួបសម្ដែងការគួរសម និងពិភាក្សាការងារ នាព្រឹកថ្ងៃទី ១៦ ខែមករា ឆ្នាំ២០២០ នៅវិមានសន្តិភាព។
លោកជំទាវអូប៊ូជី បានគោរពជម្រាបជូនសម្ដេចតេជោថា លោកជំទាវ ពិតជាមានសេចក្ដីសោមនស្សរីករាយយ៉ាងខ្លាំង ដែលបានមកធ្វើទស្សនកិច្ច នៅកម្ពុជា ក្នុងខួប២០ឆ្នាំ បន្ទាប់ពីលោកជំទាវ និងស្វាមី បានមកកាន់កម្ពុជា កាលពី២០ឆ្នាំមុន។ លោកជំទាវបានថ្លែងអំណរគុណ ជូនសម្ដេចតេជោ ដែលតំណាងឱ្យព្រះមហាក្សត្រ នៃព្រះរាជាណាចក្រកម្ពុជា បានបំពាក់នូវគ្រឿងឥស្សរិយយស ជូនលោកជំទាវ។ លោកជំទាវ បានលើកឡើងថា លោកជំទាវមានការចងចាំយ៉ាងរស់រវើក អំពីដំណើរទស្សនកិច្ចរបស់លោកជំទាវ ទៅកាន់អង្គការ CMAC កាលពី២០ឆ្នាំមុន ជាមួយនឹងស្វាមីរបស់លោកជំទាវ ហើយក្នុងដំណើរទស្សនកិច្ចលើកនេះ ក៏បានទៅធ្វើទស្សនកិច្ច នៅ CMAC ផងដែរ។ លោកជំទាវបានកត់សម្គាល់ថា ក្នុងដំណើរទស្សនកិច្ចមកកាន់កម្ពុជា និងដំណើរទស្សនកិច្ចទៅ CMAC លោកជំទាវបានកត់សម្គាល់ឃើញថា កម្ពុជា បានទទួលនូវសុខសន្តិភាពពិតប្រាកដ ហើយជាងនេះទៀត ប្រជាជនកម្ពុជា មានទឹកមុខស្រស់ស្រាយនិងរស់រវើក។ លោកជំទាវបានបន្ដថា នេះគឺជាជោគជ័យដ៏ពិតប្រាកដ ដ៏ធំធេងរបស់កម្ពុជា។ ក្នុងន័យនេះដែរ លោកជំទាវ និងប្រតិភូបានជូនពរ ឱ្យចំណងមិត្តភាព រវាងកម្ពុជានិងជប៉ុន កាន់តែស្អិតរមួតរឹងមាំថែមទៀត។ លោកជំទាវក៏បានគោរពជូនពរសម្ដេចតេជោផងដែរ សូមឱ្យបារមីដ៏ស័ក្ដិសិទ្ធ ជួយដល់មាតាក្មេករបស់សម្ដេចតេជោ ក៏ដូចជាមាតាបង្កើត របស់សម្ដេចកិតិ្តព្រឹទ្ធបណ្ឌិត បានជាសះស្បើយ យ៉ាងឆាប់រហ័សនាពេលខាងមុខនេះ។
ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូន ចំពោះលោកជំទាវ និងប្រតិភូ ដែលបានជូនពរឱ្យមាតាក្មេក បានជាសះស្បើយឆាប់ៗ នៅពេលខាងមុខ។ សម្ដេច តេជោក៏បានលើកឡើងពីអតីតកាលដែលនៅពេលនោះ ឯកឧត្តម អូប៊ូជី បានមកទស្សនកិច្ចនៅកម្ពុជា ហើយក្នុងទស្សនកិច្ចនោះផងដែរ មានតែឯកឧត្តមអូប៊ូជីនិងលោកជំទាវទេ ដែលជាជនជាតិបរទេស បានធ្វើទស្សនកិច្ច ទៅមើលសកម្មភាពដោះមីន និងអង្គការស៊ីម៉ាក់ ហើយមានតែឯកឧត្តម អូប៊ូជី ទេ ដែលបានយកចិត្តទុកដាក់យ៉ាងខ្លាំង លើបញ្ហាដោះមីននេះ។ សម្ដេចតេជោ ក៏បានរម្លឹកអំពីអតីតកាលផងដែរ នោះគឺឯកឧត្តមអូប៊ូជី រដ្ឋាភិបាលជប៉ុន និងប្រជាជនជប៉ុន បានដើរតួនាទីយ៉ាងសំខាន់ ក្នុងការជួយដល់កម្ពុជា ឱ្យមានការបោះឆ្នោត នៅឆ្នាំ១៩៩៨ បន្ទាប់ពីកម្ពុជា មានជម្លោះប្រដាប់អាវុធ នៅឆ្នាំ១៩៩៧។ សម្ដេចតេជោបន្តថា ឯកឧត្តម អូប៊ូជី ជានាយករដ្ឋមន្ត្រីទី២ ក្នុងប្រវត្តិសាស្ត្រ មកកាន់កម្ពុជា ដោយនាយករដ្ឋមន្ត្រីជប៉ុនទី១ បានមកកម្ពុជា នៅទសវត្សរ៍៥០ ហើយបន្ទាប់មក ឯកឧត្តមអូប៊ូជី ដែលបានមកកាន់កម្ពុជា កាលពី២០ឆ្នាំមុន។ នៅក្នុងដំណាក់កាលរបស់ឯកឧត្ដម អូប៊ូជី ជានាយករដ្ឋមន្ត្រី ឯកឧត្តមបានជួយដល់កម្ពុជាយ៉ាងច្រើន ជាពិសេសក្នុងការជំរុញ ឱ្យមានការផ្ដល់ថវិកាទ្រទ្រង់ដល់កម្ពុជា គឺឯកឧត្តមជាអ្នកសម្រេច និងជាអ្នកប្រកាស នៅក្នុងដំណើរទស្សនកិច្ចរបស់ឯកឧត្តម មកកាន់កម្ពុជា៕
ដោយ ជឹម ណារី
