សម្តេច​តេជោ នាយក​រដ្ឋមន្ត្រី អញ្ជើញ​បើកកិច្ច​ប្រជុំរ​ដ្ឋមន្ត្រី​ទេសចរណ៍ នៃដៃ​គូសន្ទនា​សហប្រតិ​បត្តិការ​អាស៊ី​លើកទី២ និង​សន្និសីទ​អន្តរជាតិ​លើកទី១

ទីក្រុងសៀមរាប​បានធ្វើជា​ម្ចាស់ផ្ទះ នៃកិច្ចប្រជុំ​រដ្ឋមន្ត្រី​ទេសចរណ៍ នៃដៃគូសន្ទនា​សហប្រតិ​បត្តិការ​អាស៊ី​លើកទី២ និងសន្និសីទ​អន្តរជាតិ​លើកទី១ ស្ដីពី​ទេសចរណ៍​ប្រកប​ដោយ​និរន្តរ​ភាព និង​ទីក្រុង​បេតិភណ្ឌ ក្រោមប្រធានបទ៖ ការអភិរក្ស និងការការពារ​ទីក្រុង​បេតិកភណ្ឌ ដោយទទួល​បាន​នូវត្តមាន​ដ៏ខ្ពង់ខ្ពស់​សម្តេច​អគ្គមហា​សេនាប​តីតេជោ ហ៊ុន សែន នាយករដ្ឋ​មន្ត្រីនៃព្រះ​រាជា​ណា​ចក្រកម្ពុជា អញ្ជើញថ្លែងនូវសុន្ទរ​កថាគន្លឹះ​បើកកិច្ចប្រជុំ និងសន្និសីទអន្តរ​ជាតិ​នេះ នាព្រឹកថ្ងៃទី១២ មិថុនា នៅសណ្ឋាគារ​សុខាសៀមរាប។

រដ្ឋមន្ត្រីក្រសួង​ទេសចរណ៍​កម្ពុជា​ឯកឧត្តម ថោង ខុន មានប្រសាសន៍​ថា៖ កិច្ច​ប្រជុំ​រដ្ឋ
មន្ត្រី​ទេសចរណ៍ នៃដៃគូ​សន្ទនា​សហ​ប្រតិបត្តិការ​អាស៊ី​​លើកទី២ និង​សន្និសីទ​អន្តរជាតិ​លើក
ទី១​ស្ដីពី​ទេសចរណ៍​ប្រកប​ដោយ​និរន្តរភាព និងទីក្រុង​បេតិភណ្ឌ​នាពេលនេះរៀ​បចំ​ឡើង​ដោយ ក្រសួង​ទេសចរណ៍ និងក្រសួង​វប្បធម៌ និងវិចិត្រ​សិល្បៈកម្ពុជា សហការ​ជាមួយ​អង្គការ​ទេស
ចរណ៍​ពិភពលោក និងអង្គការ​យូណេស្កូ ដោយមានការ​ចូលរួម​ពីថ្នាក់​ដឹកនាំ និង​គណៈ​ប្រតិភូ នៃ​វិស័យ​ទេស​ចរណ៍ និងវប្បធម៌​មកពី ២២ប្រទេស រួមនឹងវា​គ្មិនជាតិ-អន្តរជាតិល្បីៗ អ្នកស្រាវ
ជ្រាវ សិស្ស និស្សិត សរុបប្រមាណជាង ១ពាន់នាក់។ ឯកឧត្តមថា កិច្ចប្រជុំថ្នាក់​រដ្ឋមន្ត្រី​ទេស ចរណ៍ នៃដៃគូសន្ទនា​សហប្រតិ​បត្តិការអាស៊ី​លើកទី២ និងសន្និសីទ​អន្តរជាតិ​លើកទី១​នេះនឹង ផ្តោត​ទៅលើ ទី១)ស្វែងយល់ពីកាលានុវត្តភាព និងបញ្ហាប្រឈមក្នុងគោល​បំណង​ជម្រុញភាព ជាដៃគូ​យុទ្ធសាស្ត្រ និងកិច្ចសហប្រតិបត្តិ​ការលើវិស័យ​ទេសចរណ៍ និងវប្បធម៌ ព្រមទាំង ពង្រីក​ការតភ្ជាប់ រួមនឹងការប្តេជ្ញា​ពង្រឹងរចនា​សម្ព័ន្ធស្ថាប័ន​រវាងប្រទេស​សមាជិក​នៃដៃ​គូសន្ទ
នា​សហប្រតិ​បត្តិការអាស៊ី, ទី២)ពិភាក្សាគំរូថ្មីៗនៃភាពជាដៃគូ និងតួនាទី អភិបាលកិច្ចល្អ ក្នុងការគ្រប់គ្រង ការការពារ ការអភិរក្ស និងការអភិវឌ្ឍប្រកប​ដោយនិរន្តរភាព នៃទីក្រុងបេតិក ភណ្ឌ, និងទី៣)ដាក់ចេញនូវ​សេចក្តី​ថ្លែងការណ៍ និងសេចក្តី​សម្រេច ដើម្បីជម្រុញ​ការអភិវឌ្ឍ វិស័យ​ទេសចរណ៍ និងវប្បធម៌ប្រកប​ដោយ​និរន្តរភាព។

នៅក្នុងពិធី​បើក​សន្និសីទ​ព្រឹកមិញនេះ សម្តេចតេជោ ហ៊ុន សែន បានមាន​ប្រសាសន៍​ថា​សន្និសិទ​ និង​កិច្ចប្រជុំ​អន្ដរ​ជាតិ​នេះគឺជា​វេទិកា​សំខាន់​សម្រាប់​ការ​ពិភាក្សានិងផ្លា​ស់​ប្តូរ​បទ​ពិសោធន៍ក្នុង​ចំណោម​ស្ថាប័ន​ជាតិ​ និងអន្តរជាតិ​អ្នកជំនាញ និងអ្នកស្រាវជ្រាវ​ដើម្បី​ដាក់​ចេញ​នូវវិធានការ​ថ្មី និងគោលដៅ​សម្រាប់ការធ្វើ​ពិពិធកម្ម​ផលិត​ផលទេ​សចរណ៍ និងការណែនាំ​ការ​អភិវឌ្ឍប្រកប​ដោយ​ចីរភាព នៃបេតិកភណ្ឌនិងទេសចរណ៍​វប្បធម៍​នៅកម្ពុជា។ សម្តេចតេជោ ហ៊ុន សែន បានការ​កោតសរ​សើរ​ចំពោះ លេខាធិការ​អង្គ UNESCO, UNWTO, សមាគម​អាស៊ី​ប៉ាស៊ីហ្វិក​ទេសចរណ៍ (PATA) និងសាកល​វិទ្យាល័យ Sunshine Australia សម្រាប់កិច្ច​សហការយ៉ាងជិតស្និទ្ធជា​មួយរាជ​រដ្ឋាភិបាល​កម្ពុជា​ក្នុង​ការ​រៀប​ចំកិច្ច​ប្រជុំ​នេះនិង សន្និសីទអ​ន្ដរជាតិ​លើទឹកដីអង្គរ​ដែល​ជាបេតិកភ​ណ្ឌល្បីល្បាញ​លើពិភព​លោក។

នៅក្នុង​ស្មារតីនេះ​ប្រទេស​កម្ពុជា​គាំទ្រ​ចំពោះ “ការអភិរក្ស និងការពារ​ទីក្រុង​បេតិកភ័ណ្ឌ” ដែលផ្តោត​លើ: 1)ការស្វែងរក​ឱកាស​និងបញ្ហា​ប្រឈម​ជាមួយ​នឹងគោល​បំណង​ដើម្បី​លើក​កម្ពស់ភាព​ជាដៃ​គូយុទ្ធ​សាស្ត្រ និងកិច្ចសហប្រ​តិបត្តិការ​លើវិស័យ​ទេសចរណ៍ និងវប្បធម៍ ដើម្បីពង្រីក​ការភ្ជាប់​បណ្តា​សា្ថប័ន ក្នុង​ចំណោម​រដ្ឋជា​សមាជិក ACD។ 2)ពិភាក្សា​អំពីម៉ូ ដែលភាព​ជាដៃគូ​ថ្មី និងតួនាទី នៃអភិបាលកិច្ច​ល្អក្នុងការ​គ្រប់គ្រង​ការការពារ​ការអភិរក្ស និងការ​អភិវឌ្ឍ នៃទីក្រុង​បេតិកភ័ណ្ឌ​ប្រកប​ដោយ​ចីរភាពនិង 3)ណែនាំការ​សម្រេចចិត្ត និងសេចក្តីថ្លែង​ការណ៍នៅ​ក្នុង​គោល​បំណង​ដើម្បីលើក​កម្ពស់​ការអភិវឌ្ឍ​ប្រកប​ដោយ​ចីរភាព នៃវិស័យ​ទេសច​រណ៍និង​វប្បធម៍។ លើសពីនេះទៀត​កម្ពុជាគាំទ្រ​យ៉ាងពេញ​លេញ​ចំពោះ​យុទ្ធសាស្ត្រ” ខ្សែ​ក្រវាត់មួយ​ផ្លូវ” ផ្តួចផ្តើម​ដែលជា​ក្របខ័ណ្ឌ​គោល​នយោបាយ​ឈ្នះឈ្នះ​របស់ប្រទេស​ចិន ដែលបានគ្រប​ដណ្តប់​នៅលើ​ខ្សែក្រវាត់​សេដ្ឋកិច្ច​ផ្លូវជំនួញ​សូត្រ​និង​សតវត្សរ៍ទី២១ ផ្លូវជំនួញ​សូត្រ​សមុទ្រនេះ​ដោយ​សារតែ​យើង​ជឿថា​គោល​នយោបាយ​ធំនេះ នឹងជួយលើក​កម្ពស់​ការអភិវឌ្ឍ នៃវិស័យ​ទេសចរណ៍។

ដូច្នេះ​តាម​សន្និសីទ​នេះ នឹង​ទទួលបាននូ​វការ​ចែក​រំលែក​ចំណេះ​ដឹង​ជំនាញ​ និង​បទ​ពិសោធន៍យ៉ាងរស់​រវើករួម នឹងសេចក្តីថ្លែងការណ៍សម្រេចលើ “វិស័យទេសចរណ៍​ប្រកប​ដោយ​និរន្តរភាព​និង​ជាទីក្រុង​បេតិកភ័ណ្ឌ” ដែលបាន​គាំទ្រ​ដោយ UNESCO និង​ UNWTO ដើម្បីរួម​គ្នាកសាង​អនាគត​មួយប្រកប​ដោយ និរន្តរភាព​សម្រាប់​វិស័យ​ទេសចរណ៍ និងវប្បធម៍៕

ពត៌មានទាក់ទង

ពត៌មានផ្សេងៗ