ភ្នំពេញ ថ្ងៃទី០៣ ខែវិច្ឆិកា ឆ្នាំ២០១៩ — ជាមួយនឹងការសម្ដែងនូវការអបអរសាទរដល់កម្ពុជាដែលបានប្រែក្លាយពីប្រទេសមួយ ដែលធ្លាប់ទទួលទាហានមួកខៀវរបស់អង្គការសហប្រជាជាតិមកជួយ ទៅជាប្រទេសមួយដែលបញ្ជូនកងទ័ពទៅជួយបណ្ដាប្រទេសផ្សេងនៅក្រោមឆ័ត្ររបស់អង្គការសហប្រជាជាតិនោះ លោកជំទាវ ល្វីស មូស៊ីគីវ៉ាបូ អគ្គលេខាធិការនៃអង្គការអន្តរជាតិហ្វ្រង់កូហ្វូនី បានលើកទឹកចិត្តឱ្យកម្ពុជាចូលរួមឱ្យកាន់តែខ្លាំងឡើងថែមទៀត ក្នុងកិច្ចប្រតិបត្តិការថែរក្សាសន្តិភាពក្រោមឆ័ត្ររបស់អង្គការសហប្រជាជាតិ។
នេះបើយោងតាមការឱ្យដឹងរបស់ឯកឧត្ដម អ៊ាង សុផល្លែត ជំនួយការសម្ដេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ លោកជំទាវ ល្វីស មូស៊ីគីវ៉ាបូ អគ្គលេខាធិការនៃអង្គការអន្តរជាតិហ្វ្រង់កូហ្វូនី និងគណៈប្រតិភូ ចូលជួបសម្ដែងការគួរសម និងពិភាក្សាការងារ នាព្រឹកថ្ងៃទី ០៣ ខែធ្នូ ឆ្នាំ២០១៩ នៅវិមានសន្តិភាព។
លោកជំទាវអគ្គលេខាធិការនៃអង្គការអន្តរជាតិហ្វ្រង់កូហ្វូនី បានមានប្រសាសន៍ជម្រាបជូនសម្ដេចតេជោនាយករដ្ឋមន្ត្រីអំពីសកម្មភាពរបស់កម្ពុជានៅក្នុងអង្គការអន្តរជាតិនិយាយភាសាបារាំង ដោយបានបញ្ជាក់ថា កម្ពុជាពិតជាចូលរួមក្នុងសកម្មភាពយ៉ាងសកម្មជាទីបំផុត ក្នុងនាមជាបិតាស្ថាបនិកនៃអង្គការអន្តរជាតិនិយាយភាសាបារាំងនេះ។ ក្នុងន័យនេះដែរលោកជំទាវក៏បានគោរព និងថ្លែងអំណរគុណ និងស្នើសុំធ្វើយ៉ាងណាឱ្យកម្ពុជាមានសកម្មភាពកាន់តែខ្លាំងឡើងថែមទៀត។ លោកជំទាវបានបន្ដថា ដំណើរទស្សនកិច្ចរបស់លោកជំទាវមកចូលរួមក្នុងកិច្ចប្រជុំនៃបណ្ដាប្រទេសនិយាយភាសាបារាំងនាពេលនេះ គឺដើម្បីធ្វើយ៉ាងណាជំរុញទំនាក់ទំនងរវាកម្ពុជា និងអង្គការអន្តរជាតិនិយាយភាសាបារាំងឱ្យមានកិច្ចសហប្រតិបត្តិការកាន់តែខ្លាំងឡើងថែមទៀត។ លោកជំទាវក៏នឹងជំរុញនូវគម្រោងទាំងឡាយឱ្យមានភាពជាក់លាក់ និងស្នើឱ្យកម្ពុជាចូលរួមអនុវត្តន៍គម្រោងដែលមានភាពជាក់លាក់នោះ ដែលរួមមាន ទី១ ការលើកស្ទួយការបង្រៀនភាសាបារាំង ទី២ ការលើកស្ទួយពាណិជ្ជកម្មរវាងប្រទេសនិយាយភាសាបារាំង និងទី៣ ដើម្បីរៀបចំនៅខួបទី៥០ឆ្នាំនៃការបង្កើតអង្គការអន្តរជាតិនិយាយភាសាបារាំង ដែលគ្រោងនឹងរៀបចំនៅក្នុងខែមីនា និងខែ ធ្នូ ឆ្នាំ២០២០ ដែលនឹងមានរៀបចំកិច្ចប្រជុំកំពូលមួយផងដែរ។ លោកជំទាវ ល្វីស មូស៊ីគីវ៉ាបូ ក៏បានសម្ដែងនូវការអបអរសាទរដល់កម្ពុជា ដែលបានប្រែក្លាយពីប្រទេសមួយ ដែលធ្លាប់ទទួលទាហានមួកខៀវរបស់អង្គការសហប្រជាជាតិមកជួយ ទៅជាប្រទេសមួយដែលបញ្ជូនកងទ័ពទៅជួយបណ្ដាប្រទេសផ្សេងនៅក្រោមឆ័ត្ររបស់អង្គការសហប្រជាជាតិឡើងវិញ។ លោកជំទាវក៏បានលើកទឹកចិត្តឱ្យកម្ពុជាចូលរួមឱ្យលកាន់តែខ្លាំងឡើងថែមទៀត ក្នុងកិច្ចប្រតិបត្តិការថែរក្សាសន្តិភាពក្រោមឆ័ត្ររបស់អង្គការសហប្រជាជាតិ។
ជាការឆ្លើយតប សម្ដេចតេជោនាយករដ្ឋមន្ត្រី ហ៊ុន សែន បានមានប្រសាសន៍ថា កម្ពុជាក្នុងនាមជាស្ថាបនិកមួយនៃការបង្កើតអង្គការអន្តរជាតិនិយាយភាសាបារាំង នឹងបន្តធ្វើសកម្មភាពយ៉ាងសកម្មថែមទៀតនៅក្របខ័ណ្ឌនៃអង្គការនេះ ហើយកម្ពុជាក៏នឹងចូលរួមក្នុងការរៀប ចំខួបទី៥០ឆ្នាំរបស់អង្គការអន្តរជាតិនិយាយភាសាបារាំង តាមគោលការណ៍ និងតាមការរៀបចំឡើងរបស់អង្គការនេះ។ ទន្ទឹមនេះ កម្ពុជាក៏នឹងអាចរៀបចំឱ្យនិស្សិតកម្ពុជាដែលរៀនភាសាបារាំងនៅប្រទេសបារាំងរៀបចំសកម្មភាពផ្សេងៗ ដើម្បីចូលរួមអបអរសាទរក្នុងខួបទី៥០ឆ្នាំនៃការបង្កើតអង្គការអន្តរជាតិនេះផងដែរ។ សម្ដេចតេជោក៏បានលើកឡើងផងដែរថា ចំពោះកិច្ចសហប្រតិបត្តិការរវាងបណ្ដាប្រទេសនិយាយភាសាបារាំងនេះ គប្បីណាពិនិត្យជាក់លាក់លើគម្រោងមួយចំនួនដែលអាចធ្វើទៅបាន ដោយធ្វើយ៉ាងណាលើកស្ទួយទំនាក់ទំនងលើវិស័យសេដ្ឋកិច្ច ពាណិជ្ជកម្ម និងវិនិយោគ រវាងបណ្ដាប្រទេសនិយាយភាសាបារាំង ព្រោះថាទំនាក់ទំនងនយោបាយ គឺចាប់ផ្ដើមឡើងពីទំនាក់ទំនងសេដ្ឋកិច្ច៕
ដោយ ជឹម ណារី
