ភ្នំពេញ ថ្ងៃទី០២ ខែវិច្ឆិកា ឆ្នាំ២០១៩ — លោកជំទាវ Angela Corcoran ឯកអគ្គរដ្ឋទូតអូស្ត្រាលីប្រចាំនៅព្រះរាជាណាចក្រកម្ពុជា បានមានប្រសាសន៍ថា រដ្ឋាភិបាលអូស្ត្រាលីបានត្រៀមខ្លួនជាស្រេចក្នុងការបន្តជួយ និងចូលរួមចំណែកក្នុងការជំរុញ និងពង្រីកពាណិជ្ជកម្ម សេដ្ឋកិច្ចជាមួយប្រទេសកម្ពុជាឱ្យកាន់តែរឹងមាំ ហើយក៏ត្រៀមជាស្រេចក្នុងការជំរុញកិច្ចសហប្រតិបត្តិការ ជាពិសេសរវាងយុវជននិងយុវជនរបស់ប្រទេសទាំងពីរផងដែរ។
នេះបើតាមការឱ្យដឹងរបស់ឯកឧត្ដម អ៊ាង សុផល្លែត ជំនួយការសម្ដេចតេជោ បន្ទាប់ពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោកជំទាវ Angela Corcoran ឯកអគ្គរដ្ឋទូតអូស្ត្រាលីប្រចាំកម្ពុជា ដែលត្រូវបានបញ្ចប់អាណត្តិបេសកកម្មការទូត ចូលជួបសម្ដែងការគួរសម និងជម្រាបលា នាព្រឹកថ្ងៃចន្ទ ៦កើត ខែមិគសិរ ឆ្នាំកុរ ឯកស័កព.ស.២៥៦៣ ត្រូវនឹងថ្ងៃទី០២ ខែធ្នូ ឆ្នាំ២០១៩ នៅវិមានសន្តិភាព។
ក្នុងជំនួបនោះ លោកជំទាវ Angela Corcoran បានគោរពសម្ដែងនូវការអរគុណយ៉ាងជ្រាលជ្រៅជាទីបំផុតជូនចំពោះសម្ដេចតេជោ ដែលបានចំណាយពេលវេលាជួបពិភាក្សាការងារជាមួយលោកជំទាវនាពេលនេះ មុននឹងលោកជំទាវចាកចេញពីព្រះរាជាណាចក្រកម្ពុជា។ ជាមួយនោះដែរលោកជំទាវឯកអគ្គរដ្ឋទូតបានសម្ដែងនូវអំណរគុណចំពោះ រាជរដ្ឋាភិបាលកម្ពុជា ដែលបានបំពាក់មេដាយ ជូនលោកជំទាវសម្រាប់ការចូលរួមចំណែកក្នុងការអភិវឌ្ឍកម្ពុជា ជាពិសេសលើវិស័យបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះ។ លោកជំទាវក៏បានសម្ដែងនូវអំណរសាទរយ៉ាងខ្លាំងដល់កម្ពុជា ដែលបានទទួលការអភិវឌ្ឍយ៉ាងឆាប់ រហ័ស ជាទីបំផុតក្នុងរយៈពេលប៉ុន្មានឆ្នាំចុងក្រោយនេះ។ លោកជំទាវ Angela Corcoran បានលើក ឡើងថា លោកជំទាវបានអញ្ជើញមកកម្ពុជាកាលពីឆ្នាំ១៩៩៣ និង១៩៩៤ ដោយពេលនោះគឺ ទីក្រុងភ្នំពេញ គឺជាទីក្រុងដែលមិនមានមនុស្សរស់នៅច្រើនទេ ក៏ប៉ុន្តែពេលនេះ លោកជំទាវ មានការភ្ញាក់ផ្អើល ហើយក៏បានកត់សម្គាល់ឃើញថា កម្ពុជាពេលនេះមានការអភិវឌ្ឍគួរ ជាទីមោទនៈជាទីបំផុត។ លើសពីនេះទៀតលោកជំទាវក៏បានសម្តែងនូវការសប្បាយរីករាយ ដែលប្រទេសអូស្ត្រាលីបានចូលរួមចំណែកក្នុងការអភិវឌ្ឍកម្ពុជាឱ្យមានការរីកចម្រើនរហូតដល់ថ្ងៃនេះ។ លោកជំទាវក៏បានជម្រាបជូនសម្ដេចតេជោនាយករដ្ឋមន្ត្រីផងដែរថា រដ្ឋាភិបាលអូស្ត្រាលីបានត្រៀមខ្លួនជាស្រេចក្នុងការបន្តជួយ និងចូលរួមចំណែកក្នុងការជំរុញ និងពង្រីកពាណិជ្ជកម្ម សេដ្ឋកិច្ចកម្ពុជាឱ្យកាន់តែរឹងមាំនិងធំធាត់ថែមទៀត ហើយក៏ត្រៀមជាស្រេចក្នុងការជំរុញកិច្ចសហប្រតិបត្តិការ ជាពិសេសរវាងយុវជននិងយុវជនរបស់ប្រទេសទាំងពីរផងដែរ។
ជាការឆ្លើយតប សម្តេចតេជោនាយករដ្ឋមន្ត្រី ហ៊ុន សែន បានសម្តែងនូវភាពរីករាយ និងអរគុណផងដែរចំពោះការបំពេញបេសកកម្មការទូតរបស់លោកជំទាវនៅកម្ពុជា ដែលតាម រយៈបេសកកម្មរបស់លោកជំទាវ គឺបានជំរុញនិងពង្រឹងកិច្ចសហប្រតិបត្តិការរវាងប្រទេស ទាំងពីរ ដោយក្នុងនោះលោកជំទាវបានជំរុញឱ្យមានទំនាក់ទំនងរវាងយុវជន និងយុវជន និង ដំណើរទស្សនកិច្ចសិក្សារបស់យុវជនអូស្ត្រាលីមកកាន់កម្ពុជា ហើយនឹងជំរុញឱ្យមានការអនុញ្ញាតឱ្យមានការនាំចូលទំនិញប្រមាណជា៩០ភាគរយ ទៅ៩៧ភាគរយ ពីកម្ពុជាចូលទៅ អូស្ត្រាលីផងដែរ។ សម្ដេចតេជោបានមានប្រសាសន៍ថា នេះគឺជាមូលដ្ឋានល្អដែលយើងអាចលើកស្ទួយទំនាក់ទំនងរវាងប្រទេសទាំងពីរ តាមរយៈការជំរុញពាណិជ្ជកម្ម និងការវិនិយោគរវាងប្រទេសទាំងពីរ។ សម្ដេចតេជោក៏បានថ្លែងអំណរគុណផងដែរ ចំពោះរដ្ឋាភិបាលអូស្ត្រាលី ដែលកន្លងមកបានជួយដល់កម្ពុជា ជាពិសេសអូស្រ្តាលីបានជួយលើផ្នែកកសិកម្ម ដោយបានបង្កើតវិទ្យាស្ថានCADI ដើម្បីធ្វើការស្រាវជ្រាវ ធ្វើឱ្យកម្ពុជាមានអង្ករកម្ពុជាទទួលបានចំណាត់ថ្នាក់លេខ១ នៅក្នុងឆាកអន្តរជាតិរយៈពេល៣ឆ្នាំជាប់ៗគ្នានេះ៕
ដោយ ជឹម ណារី
