ថ្ងៃទី១៦ ខែតុលា ឆ្នាំ២០១៩ — ឯកឧត្ដម ប៊ួយកូ បូរីសូវ (Boyko Borissov) នាយករដ្ឋមន្ត្រីប៊ុលហ្គារី និងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញធ្វើជាសាក្សីនៃពិធីចុះហត្ថលេខាលើឯកសារសំខាន់ៗចំនួន៣ នាព្រឹកថ្ងៃទី១៦ ខែតុលា ឆ្នាំ២០១៩ នៅទីក្រុងសូហ្វីយ៉ា សាធារណរដ្ឋប៊ុលហ្គារី ដើម្បីជំរុញទំនាក់ទំនងប្រទេសទាំងពីរកម្ពុជា-ប៊ុលហ្គារី ឲ្យកាន់តែរឹងមាំរីកចម្រើនទ្វេឡើងថែមទៀត ក្នុងដំណើរទស្សនកិច្ចផ្លូវការរបស់សម្ដេចតេជោ ហ៊ុន សែន ទៅកាន់សាធារណរដ្ឋប៊ុលហ្គារីនោះ។ (នេះបើយោងតាមការឱ្យដឹងរបស់អ្នកយកព័ត៌មានទូរទស្សន៍ជាតិកម្ពុជា)។
ឯកសារសំខាន់ៗទាំងនោះរួមមានទី១ កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច វិទ្យាសាស្រ្ត និងបច្ចេកទេស រវាងរាជរដ្ឋាភិបាល នៃព្រះរាជាណាចក្រកម្ពុជា ជាមួយនិងរដ្ឋាភិបាល នៃសាធារណរដ្ឋប៊ុលហ្គារី ។ ទី២ កម្មវិធីសម្រាប់ កិច្ចសហប្រតិបត្តិការវប្បធម៌ រវាងក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា និង ក្រសួងវប្បធម៌ នៃសាធារណរដ្ឋប៊ុលហ្គារី និង ទី៣ អនុស្សារណ:យោគយល់គ្នា រវាងវិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ ព្រះរាជាណាចក្រកម្ពុជា និងវិទ្យាស្ថានការទូត នៃក្រសួងការបរទេសប៊ុលហ្គារី។ ក្នុងដំណើរទស្សនកិច្ចផ្លូវការនៅសាធារណរដ្ឋប៊ុលហ្គារី សម្តេចតេជោនាយករដ្ឋមន្រ្តី ត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុត ពីសំណាក់សមភាគីនាយករដ្ឋមន្រ្តីប៊ុលហ្គារី ឯកឧត្តម ប៊ួយកូ បូរីសូវ (Boyko Borissov) នៅវិមាន រដ្ឋាភិបាលក្នុងទីក្រុងសូហ្វីយ៉ា។ សម្តេចតេជោនាយករដ្ឋមន្រ្តី និងសមភាគីនាយករដ្ឋមន្រ្តីប៊ុលហ្គារី បានអញ្ជើញធ្វើជំនួបកំពូលចង្អៀត និងកិច្ចប្រជុំកំពូលទ្វេភាគី ក្នុងបរិយាកាសស្និទ្ធស្នាលរាក់ទាក់បំផុត។ ក្នុងជំនួបកំពូលដ៏មានសារសំខាន់នោះ ថ្នាក់ដឹកនាំនៃប្រទេសទាំងពីរកម្ពុជា-ប៊ុលហ្គារី បានធ្វើការពិភាក្សាគ្នាយ៉ាងយកចិត្តទុកដាក់លើវិស័យនានានៃទំនាក់ទំនងទ្វេភាគី និងបានផ្លាស់ប្តូរយោបល់លើបញ្ហាតំបន់ និងពិភពលោក ដែលជាប្រយោជន៍រួមសម្រាប់ប្រទេសទាំងពីរ។ ជាមួយគ្នានេះ ថ្នាក់ដឹកនាំទាំងពីរក៏បានបង្ហាញពីការពេញចិត្ត ចំពោះទំនាក់ទំនងមិត្តភាព និងកិច្ចសហប្រតិបត្តិការដ៏ល្អប្រសើរ រវាងប្រទេសទាំងពីរ។
ក្នុងជំនួបនោះដែរ សម្តេចតេជោនាយករដ្ឋមន្រ្តី មានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះរដ្ឋាភិបាលនិងប្រជាជនប៊ុលហ្ការី ដែលធ្លាប់បានផ្តល់ជំនួយ និងការគាំទ្រដ៏ឧត្តុង្គឧត្តមជូនកម្ពុជាក្នុងអំឡុងពេលដ៏លំបាក បន្ទាប់ពីសង្រ្គាមនិងរបបប្រល័យពូជសាសន៍ ពិសេសអរគុណចំពោះការបញ្ជូនកងកម្លាំងមួកខៀវប៊ុលហ្គារី ក្នុងប្រតិបត្តិការអ៊ុនតាក់នៅកម្ពុជា កាលពីដើមឆ្នាំ១៩៩០។
សម្តេចតេជោមានប្រសាសន៍បន្តថា ការបើកឲ្យដំណើរការឡើងវិញនូវស្ថានទូតកម្ពុជា នៅទីក្រុងសូហ្វីយ៉ាក្នុងឆ្នាំ២០១៩នេះ សបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការផ្តល់បន្ថែម ដល់ទំនាក់ទំនងមិត្តភាពជាប្រពៃណីជិតស្និទ្ធ និងកិច្ចសហប្រតិបត្តិការរវាងប្រទេសទាំងពីរ ដោយផ្អែកលើគោលការណ៍ប្រយោជន៍រួម ការគោរពគ្នាទៅវិញទៅមក ការទុកចិត្តគ្នាទៅវិញទៅមក និងភាពស្មើគ្នា។ ទទួលស្គាល់ពីសារសំខាន់ ក្នុងការពង្រីកកិច្ចសហប្រតិបត្តិការផ្នែកសេដ្ឋកិច្ច ប្រមុខរដ្ឋាភិបាលនៃប្រទេសទាំងពីរ បានស្វាគមន៍ចំពោះការចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការលើវិស័យសេដ្ឋកិច្ច វិទ្យាសាស្រ្ត និងបច្ចេកទេស រវាងកម្ពុជា និងប៊ុលហ្គារី នឹងបានណែនាំឲ្យក្រសួងពាក់ព័ន្ធអនុវត្តកិច្ចព្រមព្រៀងនេះ ប្រកបដោយប្រសិទ្ធភាព និងផលិតភាព ដើម្បីពង្រីកវិសាលភាព នៃទំហំពាណិជ្ជកម្មទ្វេភាគី ដែលបច្ចុប្បន្នកំពុងមានកម្រិតទាបនៅឡើយ។
ក្នុងជំនួបពិភាក្សាគ្នានោះដែរ ប្រមុខដឹកនាំរដ្ឋាភិបាលនៃប្រទេសទាំងពីរ បានបង្ហាញពីការ ពេញចិត្តចំពោះការចុះហត្ថលេខាលើអនុស្សារណ:យោគយល់គ្នា ស្តីពីកិច្ចសហប្រតិបត្តិការលើវិស័យ ទេសចរណ៍រវាងប្រទេសទាំងពីរ កាលពីឆ្នាំកន្លងទៅ ដែលសំដៅជំរុញទំនាក់ទំនងរវាងប្រជាជន និង ប្រជាជន និងការផ្លាស់ប្តូរអ្នកទេសចរណ៍រវាងប្រទេសទាំងពីរ។ ភាគីទាំងពីរក៏បានបង្ហាញពីការប្តេជ្ញា ចិត្តរបស់ខ្លួន ក្នុងការពង្រីកលំហូរនៃអ្នកទេសចរណ៍រវាងប្រទេសទាំងពីរ និងការជួយគ្នាក្នុងការសម្របសម្រួលបញ្ហាទាក់ទិននឹងការផ្លាស់ប្តូរអ្នកទេសចរណ៍ នៃប្រទេសទាំងពីរ។ ជាមួយគ្នានេះ ភាគី ទាំងពីរ បានឯកភាពគ្នាពង្រីកទំនាក់ទំនងវប្បធម៌រវាងប្រទេសទាំងពីរ ដោយជំរុញឲ្យមានការផ្លាស់ប្តូរ វប្បធម៌ចម្រុះ រវាងប្រជាជននៃប្រទេសទាំងពីរ និងបានស្វាគមន៍ចំពោះការចុះហត្ថលេខាលើកម្មវិធី ស្តីពីកិច្ចសហប្រតិបត្តិការវប្បធម៌ រវាងក្រសួងវប្បធម៌ប៊ុលហ្ការី និងក្រសួងវប្បធម៌ និងវិចិត្រសិល្បៈ កម្ពុជា សម្រាប់ឆ្នាំ២០១៩-២០២១។
សម្រាប់វិស័យអប់រំ ភាគីទាំងពីរបានផ្តល់ពីសារសំខាន់ ចំពោះការអភិវឌ្ឍធនធានមនុស្ស នៃប្រទេសទាំងពីរ ក្នុងនោះសម្តេចតេជោនាយករដ្ឋមន្រ្តី បានសម្ដែងនូវការអរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនប៊ុលហ្គារី ដែលកន្លងមកបានផ្តល់អាហារូបករណ៍ដល់និស្សិតកម្ពុជា ទៅសិក្សានៅប៊ុលហ្គារី និងសង្ឃឹមថាមានអាហារូបករណ៍បន្ថែមទៀត ដល់សិស្ស និស្សិតកម្ពុជា នាពេលអនាគត ក្នុងនោះថ្នាក់ដឹកនាំទាំងពីរ បានគាំទ្រដល់ទំនាក់ទំនងរវាងសកលវិទ្យាល័យភូមិន្ទភ្នំពេញ ជាមួយនិងសាកលវិទ្យាល័យសូហ្វីយ៉ា ដែលអាចជំរុញបន្ថែមនូវ កិច្ចសហប្រតិបត្តិការវាងកម្ពុជា និងប៊ុលហ្គារី។
ក្នុងជំនួបគ្នានោះ សម្តេចតេជោនាយករដ្ឋមន្រ្តី បានជម្រាបជូនដល់សមភាគីប៊ុលហ្គារីថា រដ្ឋសភាកម្ពុជាទើបតែបានបង្កើតក្រុមមិត្តភាពសភា កម្ពុជា-ប៊ុលហ្គារី ក្នុងគោលបំណងផ្តើមឲ្យមានកិច្ចសន្ទនារ និងកិច្ចសហប្រតិបត្តិការរវាងសភា នៃប្រទេសទាំងពីរ ពិសេសភាគីទាំងពីរបានឯកភាពគាំទ្រឲ្យមាន ទំនាក់ទំនងរវាងស្ថាប័ននីតិប្បញ្ញត្តិ នៃប្រទេសទាំងពីរ។ ក្នុងជំនួបគ្នានោះដែរ ឯកឧត្តមនាយករដ្ឋមន្រ្តីប៊ុលហ្គារី បានបង្ហាញពីជំនឿទុកចិត្ត ចំពោះលទ្ធផល នៃដំណើរទស្សនកិច្ចរបស់សម្តេចតេជោនាយករដ្ឋមន្រ្តី នៅសាធារណរដ្ឋប៊ុលហ្គារី ដែលបានរួមចំណែកក្នុងការពង្រឹងបន្ថែមទៀត នូវទំនាក់ទំនងមិត្តភាព និងកិច្ចសហប្រតិបត្តិការលើ គ្រប់វិស័យ រវាងកម្ពុជានិងប៊ុលហ្គារី ក្នុងបណ្តាឆ្នាំខាងមុខ។
ក្នុងជំនួបគ្នានេះ សម្តេចតេជោនាយករដ្ឋមន្រ្តី បានអញ្ជើញឯកឧត្តមនាយករដ្ឋមន្រ្តីប៊ុលហ្គារី មកបំពេញទស្សនកិច្ចផ្លូវការនៅកម្ពុជា ក្នុងពេលវេលាសមស្របណាមួយ ហើយ ឯកឧត្តមនាយករដ្ឋមន្រ្តីបានទទួលយកនូវការអញ្ជើញនេះ ប្រកបដោយសេចក្តីសាមនស្សរីករាយបំផុត៕
ដោយ ជឹម ណារី
