សម្ដេចតេជោ ហ៊ុន សែន៖ កម្ពុជាប្រកាន់ជំហរដាច់ខាតក្នុងការកសាងព្រំដែនកម្ពុជា-វៀត ណាម​​ ឈរគោលការណ៍ខ្សែព្រំដែនមិនកែប្រែ ដែលអាណា​និគមបានបន្សល់ទុក

26

ភ្នំពេញ ថ្ងៃទី០៥ ខែតុលា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បាន​ប្រ​កា​សថា ដំណោះស្រាយបន្តនៅតំបន់ដែលមិនទាន់បានខណ្ឌសីមា និងបោះបង្គោល​ព្រំ​ដែ​​ន និងតំបន់​ដែលមិនទាន់ឯកភាពគ្នាលើខ្សែព្រំដែន រាជរដ្ឋាភិបាលកម្ពុជាប្រកាន់ជំហរ​ដាច់​ខា​​​តក្នុងការ​កសាងព្រំដែនកម្ពុជា-វៀតណាម ឈរលើមូលដ្ឋានច្បាប់ជាតិ និងច្បាប់អន្តរជាតិ និ​​ង​​ការ​អនុវត្តជាអន្តរជាតិ ស្ដីពីការទទួលស្គាល់គោលការណ៍ខ្សែព្រំដែនមិនកែប្រែ ដែលអា​ណា​​និគម​បានបន្សល់ទុកឱ្យ សម្រាប់ធ្វើជាមូលដ្ឋានរឹងមាំបន្តទៀត ដើម្បីដោះស្រាយបញ្ចប់ប​ញ្ហា​​​ព្រំដែន​រវាងប្រទេសទាងពីរ។

ក្នុងពីធីចុះហត្ថលេខាជាផ្លូវការសន្ធិសញ្ញាបំពេញបន្ថែម លើសន្ធិសញ្ញាកំណត់ព្រំដែន​រដ្ឋ​ឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារ​ណ​រដ្ឋសង្គមនិយមវៀតណាម នៅរដ្ឋធានីហាណូយ នាព្រឹកថ្ងៃទី០៥ ខែតុលា ឆ្នាំ២០១៩ សម្ដេចតេជោ ហ៊ុន សែន បានមានប្រសាសន៍ថា ពិធីចុះហត្ថលេខាលើឯកសារជាប្រវត្តិ​សាស្ត្រ​ទាំ​ង​​ពីរថ្ងៃនេះ បានបញ្ជាក់យ៉ាងច្បាស់ថា ដំណោះស្រាយព្រំដែនរវាង ប្រទេស​យើងទាំងពីរ បានបោះ​ជំ​ហានទៅមុខជាលំដាប់គួរឱ្យមោទនភាព។ សម្ដេចតេជោបញ្ជាក់ថា ក្នុងអំឡុងពេល១៤ឆ្នាំកន្លងមក បន្ទាប់ពីការ​ចុះ​ហត្ថ​លេខាលើសន្ធិសញ្ញាបំពេញបន្ថែម​ឆ្នាំ២០០៥ រហូតមកដល់ពេលនេះ យើ​ងសម្រេចបាន​ល​ទ្ធ​ផលប្រមាណជា ៨៤ភាគរយ នៅ​សល់​​តែ ១៦ភាគរយ ទៀត ដែលនឹងខិតខំបន្តដោះស្រាយបញ្ចប់​នាពេ​ល​ខា​ងមុខ។ ​សម្ដេចតេ​ជោបន្តថា សមិទ្ធផលផ្លែផ្កាដ៏ធំធេងដែលប្រទេសយើង​ទាំង​ពីរសម្រេច​បា​ន​នេះ កើតចេញមក​ដោ​យ​ការស្វះស្វែងរកដំណោះស្រាយរួមប្រកបដោយភាតរភាព និងការ​យោ​គយល់គ្នា​ទៅវិញ​ទៅមក ក្នុងភាពជាបងប្អូន ជាមិត្តភាពរាប់សិបឆ្នាំកន្លងមកហើយ។ សម្ដេចតេជោបន្ថែមថា ជា​ការ​ពិត ប្រសិនបើយើងមិនប្រឹងប្រែងបញ្ចប់បញ្ហាព្រំដែននេះទេ ប្រទេសយើងទាំងពីរ​នឹងនៅ​តែ​​កើតមានទំនាស់ព្រំដែនមិនដាច់ស្រេចរាប់ជំនាន់តទៅមុខទៀត ងាយក្លាយជាកម្មវត្ថុ​ប្រជែង​ផ្នែ​កនយោបាយទៀតផង ហើយភាពសុខសាន្ត និងការអភិវឌ្ឍនៅតាមព្រំដែន​នឹងអាចមិន​កើ​ត​​មានទេ។ ទន្ទឹមនេះ ជាការចាំបាច់ ដែលប្រទេសយើងទាំងពីត្រូវសហប្រតិបត្តិការស្អិតរមួត រវាងថ្នាក់​ដឹក​នាំនៃប្រទេសទាំងពីរ រវាងគណៈកម្មការចម្រុះព្រំដែន និងរវាងអាជ្ញាធរពាក់ព័ន្ធ​គ្រប់លំដាប់​ថ្នា​ក់​នៃប្រទេសទាងពីរ ដែលជាការរួមចំណកដ៏ធំធេង មិនត្រឹមតែលើការងារ​​ព្រំដែនប៉ុណ្ណោះទេ ប៉ុ​ន្តែបានជួយបង្កើន និងជំរុញកំណើនសេដ្ឋកិច្ចជាតិ ជួយលើកកម្ពស់ជីវ​ភាពរស់នៅ​របស់​ប្រ​ជា​​ពលរដ្ឋ តាមរយៈការប្រែក្លាយតំបន់ព្រំដែនដែលធ្លាប់តែជាទី​លាន​ប្រយុទ្ធចំការមីន តំបន់​គេ​​បោះបង់ចោល គ្មានមនុស្សរស់នៅ គ្មានហេដ្ឋារចនាសម្ព័ន្ធ និងគ្មាន​ការអភិវឌ្ឍអ្វីសោះនោះ ឱ្យ​ទៅជាតំបន់សេដ្ឋកិច្ច ពាណិជ្ជកម្ម និងការអភិវឌ្ឍ​ ដើម្បី​លើកកម្ពស់ជីវភាពរស់នៅ និង​ភាព​សុខសាន្តរបស់ប្រជាពលរដ្ឋនៃប្រទេសយើងទាំងពីរ។ សម្ដេចតេជោគូសបញ្ជាក់ទៀតថា ក្នុ​ង​នា​​មរាជរដ្ឋាភិបាលកម្ពុជា សម្ដេចពិតជាមានមោទ​នភាព ដោយយើងទម្លុះនូវការលំបាក និង​ស្ទើរ​តែ​ប​ញ្ចប់ទាំងស្រុងព្រំដែន​គោករវាប្រទេស​យើង​ទាំងពីរ។ សម្ដេចតេជោបានបញ្ជាក់បន្ថែមថា “​ខ្ញុំសូមសម្ដែងនូវការកោតសរសើរ និង​វាយ​តម្លៃខ្ពស់ចំពោះគណៈកម្មការចម្រុះព្រំដែននៃប្រទេសយើងទាំងពីរ ដែលសម្រេចបាន​ល​ទ្ធ​​​ផលគួរឱ្យមោទនភាព ទាំងការងារនៅលើដីជាក់ស្ដែង និងការចងក្រងឯកសារច្បាប់ជាប្រវត្តិ​សា​​ស្ត្របានដោយហ្មត់ចត់ប្រកបដោយគុណតម្លៃខ្ពស់”។ ជាមួយយគ្នានេះ រាជរដ្ឋាភិបាល​កម្ពុជា នឹងប្រែក្លាយ​ខ្សែ​​ព្រំដែនកម្ពុជា-វៀតណាម ក៏ដូចជាព្រំដែនកម្ពុជាជាមួយឡាវ និងថៃ ឱ្យទៅជាព្រំដែនអន្តរ​ជាតិ​ពិតប្រាកដ ដើម្បីបញ្ចប់នូវបាតុភាពព្រំដែន រួមគ្នាប្រែក្លាយតំបន់​ព្រំដែនឱ្យទៅជាតំបន់​គ្មាន​ការ​ភ័យ​ខ្លាច ទៅជាតំបន់ដែលមានជីវភាពធូរធា​ និងជាតំបន់មាន​ការអភិវឌ្ឍសុខដុមបនីយកម្ម រុង​រឿ​ងតរៀងទៅ។ សម្ដេចតេជោនាយករដ្ឋមន្ត្រីក៏បាន អំពាវនាវដល់អាជ្ញាធរដែនដី ក៏ដូចជា​ប្រ​ជា​ពលរដ្ឋនៃប្រទេសទាងពីរ ចូលរួមថែរក្សា​បង្គោលព្រំដែនឱ្យបានស្ថិតស្ថេរគង់វង្ស និងរួមគ្នា​ប្រែ​ក្លាយតំបន់ព្រំដែនឱ្យ​ទៅជាព្រំដែន​សន្តិភាព មិត្តភាព សហប្រតិបត្តិការ និងការអភិវឌ្ឍ​ជា​និ​ច្ច​និរន្តន៍ ដើម្បីភាពសុខសាន្ត​របស់ប្រជាជន និងប្រទេសយើងទាំងពីរតរៀងទៅ។

គួរបញ្ជាក់ដែរថា កម្ពុជា និងវៀតណាម មានព្រំដែនគោកជាមួយគ្នាប្រវែងប្រមាណ ១.២​៧០គីឡូម៉ែត្រ ដោយយោងទៅតាមការកំណត់ក្នុងផែនបោនខ្នាត១ លើ១០០ពាន់ ដែល ​ប​ន្ស​ល់​ទុកពីសម័យអាណានិគម និងបានតម្កល់ទុកនៅអង្គការសហប្រជាជាតិ។ ជាមួយគ្នា​នេះ ប្រទេសទាំ​ងពីរ​ក៏​បានចុះសន្ធិសញ្ញារួមគ្នាមួយកំណត់ព្រំដែនប្រទេស​ទាំងពីរកាលពី​ឆ្នាំ១៩៨៥ និងបានធ្វើ​សន្ធិ​ស​​ញ្ញាបំពេញបន្ថែមមួយទៀតកាលពីឆ្នាំ២០០៥កន្លងទៅ ដើម្បី​ឈាន​ទៅការកំណត់ព្រំសីមា និ​ង​​ការបោះបង្គោលព្រំដែនរួមគ្នា។ នៅក្នុងពិធីនេះដែរ នាយក​រដ្ឋមន្ត្រីនៃ​ប្រទេសទាំ​ង​ពី​រ(កម្ពុ​ជា​​-វៀតណាម) ក៏បាន​ចុះ​ហត្ថ​លេខាទទួលស្គាល់ផែនទីថ្មីខ្នាត ១លើ២៥ពាន់ចំនួន៩២ផ្ទាំង ដែ​ល​ផលិតឡើងដោយប្រើបច្ចេកវិទ្យាខ្ពស់ បង្ហាញពីបង្គោល​ព្រំដែន និងខ្សែខណ្ឌសីមានៃ​ប្រ​ទេ​សទាំងពីរ។

បើតាមឯកឧត្ដមទេសរដ្ឋមន្ត្រី វ៉ា គឹមហុង បានអះអាងថា ផែនទីនេះ នឹង​ត្រូ​វ​យ​ក​​​ទៅតម្កល់​នៅអង្គការសហប្រជាជាតិផងដែរ៕

ដោយ ជឹម ណារី