ភ្នំពេញ ថ្ងៃទី០៣ ខែកញ្ញា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន និងឯកឧត្ដមបណ្ឌិត មហាធា មហាម៉ាត់ នាយករដ្ឋមន្ត្រីនៃប្រទេសម៉ាឡេស៊ី បានសម្ដែងនូវការពេញចិត្តចំពោះការរីកចម្រើនគួរឱ្យកត់សម្គាល់ នៃទំនាក់ទំនងមិត្តភាព និងកិច្ចសហប្រតិបត្តិការទ្វេភាគីរវាងកម្ពុជានិងម៉ាឡេស៊ីលើគ្រប់វិស័យ រួមមាន សន្តិសុខ សេដ្ឋកិច្ចពាណិជ្ជកម្ម វិនិយោគ ទេសចរណ៍ អប់រំ ការងារ និងវប្បធម៌។ល។ និងបានប្ដេជ្ញាពង្រឹងនិងពង្រីកថែមទៀត និងកិច្ចសហប្រតិបត្តិការជិតស្និទ្ធទាំងក្របខ័ណ្ឌទ្វេភាគី និងពហុភាគី ដើម្បីផលប្រយោជន៍ ប្រជាជនប្រទេសទាំងពីរ និងដើម្បីរួមចំណែកដល់សន្តិភាព ស្ថិរភាព និងវិបុលភាពនៅក្នុតំបន់ និងនៅលើពិភពលោក។
ថ្លែងក្នុងសន្និសីទសារព័ត៌មានរួមគ្នា ក្រោយពីបញ្ចប់ជំនួបចរចាទ្វេភាគីនាព្រឹកថ្ងៃអង្គារ ៥កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៣ ខែកញ្ញា ឆ្នាំ២០១៩ នៅវិមានសន្តិភាព ក្នុងខណៈដែលឯកឧត្ដមបណ្ឌិត មហាធា មហាម៉ាត់ ដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវការនៅព្រះរាជាណាចក្រកម្ពុជានោះ សម្ដេចតេជោ ហ៊ុន សែន បានថ្លែថានេះជាដំណើរទស្សនកិច្ចលើកទីមួយរបស់ ឯកឧត្ដម មហាធា មហាម៉ាត់ នៅព្រះរាជាណាចក្រកម្ពុជាក្នុងអាណត្តិបច្ចុប្បន្ន ដោយសម្ដេចតេជោបានវាយតម្លៃខ្ពស់ចំពោះទស្សនកិច្ចផ្លូវការជាប្រវត្តិសាស្ត្រនេះ ហើយទស្សនកិច្ចនេះគឺជាតឹកតាងបង្ហាញអំពី មិត្តភាព សាមគ្គីភាព និងភាពរឹងមាំនៃទំនាក់ទំនងទ្វេភាគីកម្ពុជា-ម៉ាឡេស៊ី។ សម្ដេចតេជោបានអបអរសាទរយ៉ាងកក់ក្ដៅចំពោះសមិទ្ធផលដ៏ធំធេងដែលប្រទេស ម៉ាឡេស៊ីសម្រេចបាន ក្រោមមាគ៌ាដឹកនាំដ៏ក្លៀវក្លារបស់ឯកឧត្ដមនាយករដ្ឋមន្ត្រី។
សម្ដេចតេជោ ជឿជាក់ថា ជាមួយសន្ទុះនៃការអភិវឌ្ឍ និងគោលដៅទំនើបកម្ម ព្រមទាំងគោលនយោបាយអភិវឌ្ឍន៍លើគ្រប់វិស័យ ប្រទេសម៉ាឡេស៊ីនឹងសម្រេចបានគោល ដៅឈានទៅរកឋានៈជាប្រទេសអភិវឌ្ឍន៍ ជាខ្លាសេដ្ឋកិច្ចក្នុងតំបន់អាស៊ី ហើយនឹងចូលរួមដើរតួនាទីកាន់តែសកម្ម និងសំខាន់ថែមទៀត នៅក្នុងតំបន់ និងនៅលើឆាកអន្តរជាតិ។ សម្ដេចតេជោនាយករដ្ឋមន្ត្រីក៏បានថ្លែង អបអរសាទរចំពោះទិវាបុណ្យជាតិឯករាជ្យលើកទី៦២ របស់ម៉ាឡេស៊ី ក៏ដូចជាទិវាផ្សារភ្ជាប់ទំនាក់ទំនងការទូតរវាងប្រទេសកម្ពុជា និងម៉ាឡេស៊ី ដែលជាព្រឹត្តិការណ៍កើតឡើងនៅថ្ងៃតែមួយ គឺ៣១ ខែសីហា ឆ្នាំ១៩៥៧។
សម្ដេចតេជោ ហ៊ុន សែន មានប្រសាសន៍ថា បច្ចុប្បន្នទំនាកទំនងពាណិជ្ជកម្ម និងវិនិយោគរវាងប្រទេសទាំងពីរ(កម្ពុជា-ម៉ាឡេស៊ី)មានលក្ខណៈល្អប្រសើរ និងមានវត្តមានធុរកិច្ចម៉ាឡេស៊ីជាច្រើននៅកម្ពុជា។ ក្នុងឆ្នាំ២០១៨ ទំហំពាណិជ្ជកម្មនៃប្រទេសទាំងពីរមានចំនួនប្រមាណជា ៥០០លានដុល្លារអាម៉េរិក ហើយគ្រាន់តែក្នុងឆមាសទី១ ឆ្នាំ២០១៩ ទំហំនេះបានកើនឡើងដល់ជាង៤០០លានដុល្លារអាម៉េរិក។ ដើម្បីបង្កើនទំហំពាណិជ្ជកម្ម និងវិនិយោគកម្ពុជា -ម៉ាឡេស៊ី ខ្ញុំ និងឯកឧត្ដម មហាធា មហាម៉ាត់ បានឯកភាពឱ្យស្ថាប័នពាក់ព័ន្ធប្រទេសទាំងពីរ រិះរកវិធីពង្រីកសហប្រតិបត្តិការក្នុងវិស័យនេះបន្ថែមទៀត។
សម្ដេចតេជោនាយករដ្ឋមន្ត្រី បានថ្លែងអំណរគុណ ចំពោះឱកាសការងារ ដែលម៉ាឡេស៊ីផ្ដល់ឱ្យពលករចំណាកស្រុករបស់កម្ពុជា និងបានលើកទឹកចិត្តឱ្យស្ថាប័ន ពាក់ព័ន្ធនៃប្រទេសទាំងពីរ បន្តពង្រឹងក្របខ័ណ្ឌដែលបានព្រមព្រៀងគ្នាក្នុងវិស័យការងារ និងជំរុញបន្ថែមទៀត នូវកិច្ចសហប្រតិបត្តិការ និងសម្របសម្រួល កាន់តែជិតស្និទ្ធ រវាងស្ថាប័នពាក់ព័ន្ធ ដើម្បីការពារសិទ្ធិ និងដោះស្រាយបញ្ហាសុខុមាលភាព ពលករចំណាកស្រុករបស់កម្ពុជា ទៅម៉ាឡេស៊ី។សម្ដេចតេជោ ក៏បានថ្លែងអំណរគុណផងដែរ ចំពោះប្រទេសម៉ាឡេស៊ី ដែលបានជួយកម្ពុជា ក្នុងការបណ្ដុះបណ្ដាល និងអភិវឌ្ឍន៍ធនធានមនុស្ស តាមរយៈកិច្ចសហប្រតិបត្តិការបច្ចេកទេស និងបានផ្ដល់កិច្ចសហប្រតិបត្តិការល្អ ដើម្បីលើកកម្ពស់សុខុមាលភាពពលករ ពលការិនីដែលកំពុងស្នាក់នៅ និងធ្វើការក្នុងប្រទេសម៉ាឡេស៊ី។
សម្ដេចតេជោគូសបញ្ជាក់ថា «ខ្ញុំ និងឯកឧត្ដម មហាធា បានផ្លាស់ប្ដូយោបល់ អំពីស្ថានការណ៍តំបន់ និងពិភពលោក ដែលភាគីទាំងពីរ បានយកចិត្តទុកដាក់ ក្នុងនោះខ្ញុំសូមជម្រាបថា យើងក៏មានការពិភាក្សា ទាក់ទងការផ្លាស់ប្ដូរមតិ ទៅលើបញ្ហាមួយ ចំនួន ដូចជាបញ្ហាសមុទ្រចិនខាងត្បូង បញ្ហានៅរដ្ឋរ៉ាក់ឃីន បញ្ហាទាក់ទងនឹង ទណ្ឌកម្មរបស់ក្រុមប្រឹក្សាសន្តិសុខទៅលើកូរ៉េខាងជើង ហើយនឹងបញ្ហាទណ្ឌកម្ម របស់ប្រទេសធំៗ ទៅលើប្រទេសមួយចំនួនទៀត ដែលវាមិនមែនគ្រាន់តែជា ទណ្ឌកម្មលើប្រទេសទាំងនោះទេ ក៏ប៉ុន្តែវាអាចជាទណ្ឌកម្មមកលើប្រទេសដែល មិនជាប់ពាក់ព័ន្ធ ប៉ុន្តែគឺជាដៃគូកិច្ចការ ជាមួយប្រទេសទាំងនោះ»។ សម្ដេចតេជោបន្ថែមថា ចំពោះកិច្ចសហប្រតិបត្តិការសេដ្ឋកិច្ចក្នុងតំបន់ កម្ពុជា-ម៉ាឡេស៊ីបានយល់ស្របគ្នាថាកិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយក្នុងតំបន់ និងចូលរួមចំណែក ដល់សមាហរណកម្ម និងកំណើនសេដ្ឋកិច្ចក្នុងតំបន់ ព្រមទាំងជួយការពារនូវប្រព័ន្ធពាណិជ្ជកម្មពហុភាគី ហេតុនេះចាំបាច់ ត្រូវតែសម្រេចឱ្យបាននូវកិច្ចព្រមព្រៀងមួយនេះក្នុងឆ្នាំនេះ។
ឯកឧត្ដមនាយករដ្ឋមន្ត្រីម៉ាឡេស៊ី បានមានប្រសាសន៍ថា ពាណិជ្ជកម្មកម្ពុជា-ម៉ាឡេស៊ី នៅមានកម្រិតនៅឡើយ ហើយនៅពេលដែលឯកឧត្ដម ត្រឡប់ទៅម៉ាឡេស៊ីវិញ ឯកឧត្ដមនឹងប្រាប់ឱ្យប្រជាជនម៉ាឡេស៊ី ពិនិត្យមើលថាតើអ្វីដែលអាចទិញពីកម្ពុជាបានថែមទៀត។ ឯកឧត្ដមថ្លែងថា ពិតណាស់ប្រហែលជា អាចទិញអង្ករ និងកសិផលពីកម្ពុជា ព្រមទាំងកាត់បន្ថយឱនភាពពាណិជ្ជកម្ម ដែលកម្ពុជាកំពុងជួបប្រទះ។ ឯកឧត្ដមបន្ថែមថា ម៉ាឡេស៊ីមានពលករខ្មែរ ជាច្រើនធ្វើការនៅទីនោះ ហើយម៉ាឡេស៊ីបាន យកចិត្តទុកដាក់ ដល់សុខុមាលភាពដើម្បីឱ្យ ពួកគេទទួលបានអត្ថប្រយោជន៍ពេញលេញពីការងារ នៅក្នុងប្រទេសម៉ាឡេស៊ី។
ឯកឧត្ដមបណ្ឌិត មហាធា មហាម៉ាត់ នាយករដ្ឋមន្ត្រីនៃប្រទេសម៉ាឡេស៊ី ថ្លែងបញ្ជាក់ថានៅក្នុងជំនួបពិភាក្សាគ្នានោះ «យើងមានការពិភាក្សា ពីបញ្ហាអន្តរជាតិ ក្នុងនោះការដាក់ទណ្ឌកម្ម ដែលធ្វើឱ្យប៉ះពាល់ មិនត្រឹមតែប្រទេសដែលរងទណ្ឌកម្មផ្ទាល់ទេ ប៉ុន្តែប្រទេសផ្សេងទៀត ដែលមិនមាន ទំនាស់ជាមួយប្រទេសនោះ ក៏ត្រូវបានហាមឃាត់មិនឱ្យ ធ្វើធុរកិច្ចជាមួយប្រទេសនោះ ដោយសារតែការដាក់ទណ្ឌកម្ម។ នេះជារឿងអយុត្តិធម៌ណាស់ ព្រោះប្រទេសតូច មិនអាចដាក់ទណ្ឌកម្ម លើប្រទេសណាទេ ប៉ុន្តែមានតែមហាអំណាចទេ ដែលដាក់ទណ្ឌកម្មទៅលើគេ ហើយដាក់សម្ពាធឱ្យប្រទេសតូច មិនឱ្យមានសេរីភាព ទោះគេកំពុងនិយាយ ពីរឿងសិទ្ធិមនុស្ស អំពីសេរីភាព គឺគេយកសិទ្ធិសេរីភាព របស់យើង ដោយដាក់ទៅប្រទេសដៃគូពាណិជ្ជកម្ម នេះជារឿងអយុត្តិធម៌ណាស់»។
ឯកឧត្ដមនាយករដ្ឋមន្ត្រីម៉ាឡេស៊ីថ្លែងថា អង្គការសហប្រជាជាតិ ជាវេទិកាដ៏ល្អដែល យើងអាចលើកបញ្ហាទាំងអស់នេះទៅពិភាក្សា៕
ដោយ ជឹម ណារី
