ភ្នំពេញ ថ្ងៃទី០៣ ខែកក្កដា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន ថ្លែងថា ក្នុងនាមជាសមាជិកអង្គការពាណិជ្ជកម្មពិភពលោក កម្ពុជាបានខិតខំបំពេញនូវតួរនាទីប្រកបដោយភាពទទួលខុសត្រូវខ្ពស់ តាមរយៈការដាក់ចេញ និងការរៀបចំកម្មវិធីកែទម្រង់ប្រព័ន្ធសេដ្ឋកិច្ច ច្បាប់ បទប្បញ្ញត្តិផ្សេងៗ និងវិធាននានា ដើម្បីឱ្យមានអនុលោមភាព និងសង្គតិភាពទាំងស្រុងជាមួយបទប្បញ្ញត្តិអន្តរជាតិ ជាពិសេសឱ្យស្របតាមការសន្យារបស់កម្ពុជា ក្រោមក្របខ័ណ្ឌនៃអង្គការពាណិជ្ជកម្មពិភពលោក។
ក្នុងសុន្ទរកថា ដែលផ្សាយបន្តផ្ទាល់ពីទីក្រុងហ្សឺណែវ ប្រទេសស៊្វីស ក្នុងកិច្ចប្រជុំលើកទី៧ «ត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្ម ឆ្នាំ២០១៩» នាព្រឹកថ្ងៃទី០ ៣ ខែកក្កដា ឆ្នាំ២០១៩ នៅទីស្នាក់ការអង្គការពាណិជ្ជកម្មពិភពលោក សម្ដេចតេជោ ហ៊ុន សែន មានប្រសាសន៍ថា កម្ពុជាក្នុងនាមជាប្រទេសដែលមានសេដ្ឋកិច្ចតូច ជឿលើអត្ថប្រយោជន៍នៃសកលភាវូបនីយកម្ម និងកិច្ចសហប្រតិបត្តិការអន្តរជាតិឈរលើវិធានគតិយុត្ត។ គឺទស្សនវិជ្ជានេះហើយដែលបានជំរុញយើងឱ្យប្រឹងប្រែងធ្វើការ ដើម្បីក្លាយជាសមា ជិកពេញសិទ្ធិរបស់អង្គការពាណិជ្ជកម្មពិភពលោកនៅឆ្នាំ២០០៤ មុនគេនៅក្នុងចំណោម ប្រទេសមានការអភិវឌ្ឍតិចតួចចំនួន២។ ទោះបីជាកម្ពុជាកាលពីពេលនោះ នៅមិនទាន់មាន ការអភិវឌ្ឍមូលដ្ឋានគ្រឹះនៃសេដ្ឋកិច្ចបានរឹងមាំ ក៏ប៉ុន្តែលើមូលដ្ឋាននៃការអនុវត្តគោល នយោបាយ សេដ្ឋកិច្ចទីផ្សារបើកចំហរបស់ខ្លួន កម្ពុជាបានសន្យាចងពន្ធគយលើគ្រប់ មុខទំនិញ និងបើកច្រកទីផ្សារពាណិជ្ជកម្មផ្នែកសេវា ប្រមាណជាង ៩៤វិស័យ និង អនុវិស័យ នៅក្នុងឆ្នាំ២០០៤ ដែលជាចំនួនមួយច្រើនលើសលុប បើធៀបទៅនឹងប្រទេសមាន ការអភិវឌ្ឍខ្ពស់ ដែលចូលជាសមាជិក WTO មុនកម្ពុជា។
សម្ដេចបានគូសបញ្ជាក់ថា ជាមួយនឹងការខិតខំបំពេញកាតព្វកិច្ចជាសមាជិក របស់អង្គការពាណិជ្ជកម្មពិភពលោក រាជរដ្ឋាភិបាលកម្ពុជា ក៏បានអនុវត្តន៍យ៉ាងខាប់ខ្លួននូវ គោលការណ៍នៃលទ្ធិប្រជាធិបតេយ្យសេរី ពហុបក្ស ខិតខំរក្សាសន្តិភាព សន្តិសុខ ស្ថិរភាពនយោបាយ សណ្ឋាប់ធ្នាប់សង្គម និងគ្រប់គ្រងម៉ាក្រូសេដ្ឋកិច្ច និងហិរញ្ញវត្ថុ ប្រកប ដោយភាពប្រុងប្រយ័ត្ន តាមរយៈការដាក់ចេញ និង អនុវត្តន៍នូវយុទ្ធសាស្រ្តទូលំទូលាយ ជាអាទិ៍ យុទ្ធសាស្រ្តចតុកោណ ដែលជារបៀបវារៈគោលនយោបាយរួម សម្រាប់ការអភិវឌ្ឍ សង្គម សេដ្ឋកិច្ច ផែនការយុទ្ធសាស្រ្តអភិវឌ្ឍជាតិ និងយុទ្ធសាស្រ្តតាមវិស័យសំខាន់ៗ ដទៃទៀត។ ជាលទ្ធផលពីកិច្ចខំប្រឹងប្រែងខាងលើ កម្ពុជាសម្រេចបាននូវកំណើនសេដ្ឋកិច្ចជា មធ្យមប្រចាំឆ្នាំក្នុងរង្វង់ ៧,៧ភាគរយ ប្រកបដោយបរិយាប័ន្ន និងសមធម៌ ក្នុងរយៈពេល ២ទសវត្សរ៍ចុងក្រោយនេះ។ កម្ពុជាថែមទាំងសម្រេចបាននូវបង្គោលចរជាប្រវត្តិសាស្រ្ត គឺការឆ្លងពីឋានៈប្រទេសមានចំណូលទាប ទៅជាប្រទេសមានចំណូលមធ្យមកម្រិតទាបជាផ្លូវការក្នុងឆ្នាំ២០១៥។ សម្រាប់ឆ្នាំ២០១៨ កន្លងទៅនេះ អត្រាកំណើនសេដ្ឋកិច្ចកម្ពុជាសម្រេចបាន ៧,៥ភាគរយ និងត្រូវបានព្យាករណ៍ថា នឹងអាចបន្តរក្សាបានក្នុងរង្វង់៧ភាគរយ ក្នុងមួយឆ្នាំ សម្រាប់រយៈពេលមធ្យមទៅមុខ។ អត្រានៃភាពក្រីក្រ បានធ្លាក់ចុះពី ៥៣,២ភាគរយ ក្នុងឆ្នាំ២០០៤ មកនៅក្រោម១០ភាគរយ ក្នុងឆ្នាំ២០១៨។
ជាមួយគ្នានេះដែរ កម្ពុជាបានធ្វើពិពិធកម្មទាំងផលិតផល និងទីផ្សារ ដែលក្នុងនោះ ការនាំចេញរបស់កម្ពុជា បានកើនពី ៥,៧ប៊ីលានដុល្លារ (ស្មើនឹង ៤០,៥ភាគរយ នៃផសស) នៅឆ្នាំ២០១២ មកដល់ ១៣ប៊ីលានដុល្លារ (ស្មើនឹង ៥៣,២ភាគរយ នៃផសស) នៅឆ្នាំ២០១៨ និងបានធ្វើពិពិធកម្មបន្តិចម្តងៗពីការនាំចេញសម្លៀកបំពាក់ទៅកាន់ផលិតផលផ្សេងទៀត។ ដូចគ្នានេះដែរ គោលដៅនាំចេញត្រូវបានធ្វើពិពិធកម្ម ពីការផ្តោតលើទីផ្សារសហរដ្ឋ អាមេរិក ទៅផ្តោតលើទៅផ្សារអឺរ៉ុប ជប៉ុន តំបន់អាស៊ាន និងប្រទេសដទៃទៀត។
សម្ដេចតេជោបានគូសបញ្ជាក់ទៀតថា ដើម្បីជាការតបស្នងដល់អង្គការពាណិជ្ជកម្មពិភពលោក ក៏ដូចជាដើម្បីជួយទ្រទ្រង់ដល់ការចរចាក្រោមក្របខ័ណ្ឌនៃអង្គការពាណិជ្ជកម្មពិភពលោក និងពង្រឹងតួនាទីរបស់អង្គការនេះ ក្នុងកាលៈទេសៈដែលសេដ្ឋកិច្ចពិភពលោកកំពុងទទួលរងនូវការគំរាមពីនយោបាយគាំពារនិយម និងសង្គ្រាមពាណិជ្ជកម្ម, ទោះបីកម្ពុជា នៅត្រូវប្រឈមនឹងកង្វះធនធានមនុស្ស និងហើយធនធានថវិកាក៏នៅមានកម្រិតក៏ដោយ ក្នុងនាមជារាជរដ្ឋាភិបាលកម្ពុជា ខ្ញុំបានសម្រេចឱ្យបង្កើតស្ថានបេសកកម្មប្រចាំអង្គការនេះ នៅឆ្នាំ២០១៧ ហើយបានណែនាំឱ្យរដ្ឋមន្ត្រីក្រសួងពាណិជ្ជកម្ម និងអគ្គរាជទូតរបស់យើងនៅទីនេះ ខិតខំបំពេញតួនាទីធ្វើជាប្រធានសម្របសម្រួលក្រុមប្រទេសអភិវឌ្ឍន៍តិចតួចឆ្នាំ២០១៧-២០១៨ ឱ្យបានជោគជ័យ និងបន្តបំពេញតួនាទីយ៉ាងសំខាន់ក្នុងនាមជាសមាជិក ត្រោយកា (TROIKA) ជួយដល់សាធារណរដ្ឋអាហ្វ្រិកកណ្តាល និងសាធារណរដ្ឋឆាត ក្នុងការដឹកនាំសម្របសម្រួលក្រុមប្រទេសអភិវឌ្ឍន៍តិចតួចទាំង ៣៦ប្រទេស លើការចរចាក្រោមក្របខ័ណ្ឌអង្គការពាណិជ្ជកម្មពិភពលោក ឱ្យបានជោគជ័យបន្តទៀត។
ក្រៅពីនេះ ក្នុងក្របខ័ណ្ឌអាស៊ាន និង តំបន់, កម្ពុជាបានដើរតួនាទី យ៉ាងសកម្មក្នុង ការអនុវត្តកាតព្វកិច្ច និងកិច្ចព្រមព្រៀងនានារបស់អាស៊ាន ដើម្បីសម្រេចបាននូវ សហគមន៍សេដ្ឋកិច្ចអាស៊ាន-ឆ្នាំ២០១៥ និងចក្ខុវិស័យសហគមន៍សេដ្ឋកិច្ចអាស៊ាន ដែលនឹងប្រែក្លាយអាស៊ានទៅជាទីផ្សារ និងមូលដ្ឋានផលិតកម្មរួម។ ជាតំបន់ដែលមានការប្រកួតប្រជែងខ្ពស់ មានការអភិវឌ្ឍដោយសមធម៌ ហើយធ្វើសមាហរណកម្មជាមួយសេដ្ឋកិច្ចពិភពលោក។ បច្ចុប្បន្នកម្ពុជាកំពុងសហការយ៉ាងជិតស្និទ្ធជាមួយប្រទេសអាស៊ីចំនួន ១៥ទៀត ដើម្បីចរចាបញ្ចប់ក្នុងឆ្នាំ២០១៩នេះ នូវកិច្ចព្រមព្រៀងពាណិជ្ជកម្មសេរីដ៏ធំមួយ ហៅកាត់ថា RCEP ដែលមាន ផ.ស.ស ជាង ៣០ភាគរយ នៃ ផ.ស.សពិភពលោក, គិតជាទឹកប្រាក់ គឺប្រមាណ ៨៥ទ្រីលានដុល្លារអាម៉េរិក សម្រាប់ឆ្នាំ២០១៨៕
ដោយ ជឹម ណារី
