ឯកឧត្ដម Dionisio da Costa Babe Soares រដ្ឋមន្ត្រីការបរទេស និងកិច្ចសហប្រតិបត្តិការនៃសាធារណរដ្ឋប្រជាធិបតេយ្យទីម័រខាងកើត បានថ្លែងអំណរគុណចំពោះការគាំទ្រទាំងឡាយរបស់ សម្ដេចតេជោនាយករដ្ឋមន្ត្រី ក៏ដូចជារាជរដ្ឋាភិបាលកម្ពុជាចំពោះប្រទេសទីម័រឡេស្ត។
ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានថ្លែងដូច្នេះប្រាប់អ្នកយកព័ត៌មាន បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្ដម Dionisio da Costa Babe Soares រដ្ឋមន្ត្រីការបរ ទេស និងកិច្ចសហប្រតិបត្តិការនៃសាធារណរដ្ឋប្រជាធិបតេយ្យទីម័រខាងកើត និងគណៈប្រតិភូចូលជួបសម្ដែងការគួរសម នាព្រឹកថ្ងៃទី០៣ ខែមិថុនា ឆ្នាំ២០១៩ ក្នុងខណៈដែលឯកឧត្ដមអញ្ជើញមកបំពេញទស្សនកិច្ចនៅកម្ពុជា។
ឯកឧត្ដម Babe Soares បានពាំនាំនូវការគោរពនិងពាក្យផ្ដាំផ្ញើសាកសុខទុក្ខពីនាយករដ្ឋមន្ត្រី និងប្រធានាធិបតីទីម័រឡេស្តជូនចំពោះសម្ដេចតេជោនាយករដ្ឋមន្ត្រី ហើយបានជម្រាបជូនសម្ដេចតេជោថា ឯកឧត្ដមានការគោរពសម្ដេចតេជោយ៉ាងខ្លាំង ចំពោះវីរភាពដឹកនាំរបស់សម្ដេចតេជោ និងការយកចិត្តទុកដាក់ចំពោះប្រជាជន និងប្រទេសកម្ពុជា របស់សម្ដេចតេជោ។ ឯកឧត្ដមបានបន្តថា ដំណើរទស្សនកិច្ចរបស់សម្ដេចតេជោនាយករដ្ឋមន្ត្រីទៅកាន់ប្រទេសទីម័រឡេស្តកាលពីឆ្នាំ២០១៦ បានធ្វើឱ្យប្រទេស និងប្រជាជនទីម័រឡេស្ត មានអារម្មណ៍ហាក់បីដូចជា ប្រទេសមួយមានសម្ព័ភាពជាមួយនឹងកម្ពុជា។ ឯកឧត្ដក៏បានថ្លែងអំណរ គុណជូនចំពោះសម្ដេចតេជោ ហ៊ុន សែន ផងដែរចំពោះនូវរាល់ការគាំទ្រទាំងឡាយ ដែលសម្ដេចតេជោបានផ្ដល់ឱ្យប្រទេសទីម័រឡេស្ត ហើយក្នុងដំណើរទស្សនកិច្ចរបស់ឯកឧត្ដមមកកាន់ព្រះរាជាណាចក្រកម្ពុជានាពេលនេះ គឺដើម្បីធ្វើយ៉ាងណាពង្រឹងនូវទំនាក់ទំនង កិច្ចសហប្រតិបត្តិការរវាងប្រទេសទាំងពីរ ឱ្យកាន់តែរីកចម្រើនខ្លាំងក្លាឡើងថែមទៀត។
ជាការឆ្លើយតបសម្ដេចតេជោ ហ៊ុន សែន បានថ្លែងអំណរគុណ ចំពោះការផ្ដាំផ្ញើសាកសួរសុខទុក្ខ ហើយក៏បានថ្លែងអំណរគុណផងដែរ ចំពោះការទទួលយកចិត្តទុកដាក់ក្នុងដំណើរ ទស្សនកិច្ចរបស់សម្ដេចទៅកាន់ប្រទេសទីម័រឡេស្ត កាលពីឆ្នាំ២០១៦កន្លងមក។ សម្ដេចតេជោនាយករដ្ឋមន្ត្រីបានមានប្រសាសន៍បន្តថា នៅក្នុងដំណើរទស្សនកិច្ចនោះ សម្ដេចបានកត់សម្គាល់ឃើញប្រទេសទីម័រឡេស្ត បានត្រៀមខ្លួនបានយ៉ាងល្អ សម្រាប់ការចូលខ្លួនជាសមាជិកអាស៊ាន ទាំងការរៀបចំឱ្យមានស្ថានទូតទាំងអស់នៅគ្រប់បណ្ដាប្រទេសអាស៊ាន ក៏ដូចជាសមត្ថភាពរបស់មន្ត្រីរាជការ និងសេដ្ឋកិច្ច ហិរញ្ញវត្ថុ របស់ទីម័រឡេស្តផងដែរ។ ពាក់ព័ន្ធនឹងទំនាក់ទំនងទ្វេភាគីរវាងប្រទេសទាំងពីរ សម្ដេចតេជោបានផ្ដល់អនុសាសន៍ថា គប្បីណាប្រឹងប្រែងរួមគ្នាធ្វើយ៉ាងណា ជំរុញនូវអ្វីដែលប្រទេសទាំងពីរអាចធ្វើបាន ដើម្បីពង្រីកកិច្ចសហប្រតិបត្តិការរួមលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ ក៏ដូចជា វប្បធម៌ ជាដើម។ សម្ដេចតេជោនាយករដ្ឋមន្ត្រីក៏បានថ្លែងនូវសេចក្ដីរីករាយផងដែរ ចំពោះ និស្សិតទីម័រឡេស្តចំនួន១០រូប ដែលត្រូវបានមកកាន់ព្រះរាជាណាចក្រកម្ពុជា ដើម្បីទទួលអាហាររូបករណ៍មកសិក្សានៅកម្ពុជា ដែលសម្ដេចបានផ្ដល់ជូនកាលពីឆ្នាំ២០១៦កន្លងមក៕
ដោយ ជឹម ណារី
