ភ្នំពេញ ថ្ងៃទី០៤ ខែមីនា ឆ្នាំ២០១៩ — ជាមួយនឹងការអំពាវនាវឱ្យប្រជាពលរដ្ឋនៅទូទាំងព្រះរាជាណាចក្រកម្ពុជាចូលរួមក្នុងការធ្វើជំរឿននោះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានស្នើឱ្យបណ្តាស្ថានីយវិទ្យុ ទូរទស្សន៍ បណ្តាញផ្សព្វផ្សាយទាំងអស់ ទាំងក្នុងប្រព័ន្ធគាំទ្ររាជរដ្ឋាភិបាល ប្រព័ន្ធអព្យាក្រឹត ឬប្រព័ន្ធប្រឆាំងរដ្ឋាភិបាល ចូលរួមក្នុងការធ្វើជំរឿនទូទៅប្រជា ជន ព្រោះនេះជាផលប្រយោជន៍រួម ហើយការធ្វើជំរឿននេះអត់មានទាក់ទិននឹងនយោបាយអ្វីទេ។
ក្នុងពិធីបើកការដ្ឋានស្ថាបនា សាងសង់ប្រព័ន្ធការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី៤ ក្រោមហិរញ្ញប្បទានឥតសំណងរបស់ប្រទេសជប៉ុន នាព្រឹកថ្ងៃចន្ទ ១៣រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៤ ខែមីនាឆ្នាំ២០១៩ ក្នុងខណ្ឌដូនពេញ រាជធានីភ្នំពេញ សម្ដេចតេជោមានប្រសាសន៍ថា ការងារជំរឿនទូទៅប្រជាជននៅព្រះរាជាណាចក្រ កម្ពុជា ឆ្នាំ២០១៩ នៅសល់រយៈពេល៩ថ្ងៃទៀតប៉ុណ្ណោះ ដែលបានចាប់ផ្ដើមពីថ្ងៃទី០៣ ខែមីនា រហូតទៅដល់ថ្ងៃទី១៣ ខែមីនា ឆ្នាំ២០១៩ ដូច្នេះប្រជាពលរដ្ឋទាំងអស់ត្រូវចូលរួមធ្វើជំរឿនឱ្យបានគ្រប់ៗគ្នា។ ប្រជាពលរដ្ឋរបស់យើង បើអាចចៀសវាងមេត្តាកុំធ្វើដំណើរទៅឆ្ងាយ ហើយសូមមេត្តាយោគយល់ដោយការអនុគ្រោះឱ្យមន្រ្តីជំរឿនចូល ទៅតាមលំនៅឋាននៅក្នុងពេលយប់ ព្រោះពេលថ្ងៃបងប្អូនចេញមកធ្វើការ អីចឹង មានតែពេល យប់ ហើយកន្លែងខ្លះដោយសារតែប្រជាពលរដ្ឋ របស់យើងក៏ធ្វើ ដំណើរមកពីជនបទ ហើយគាត់មិនអាចត្រឡប់ទៅវិញទាន់ពេល គាត់អាចស្នាក់អាស្រ័យ នៅកន្លែងនេះ នៅកន្លែងនោះ ក៏សូមមេត្តាអធ្យាស្រ័យធ្វើការយោគយល់ចំពោះមន្រ្តីជំរឿនផ្តល់ ឱកាសឱ្យគាត់បានធ្វើបទសម្ភាសន៍ និងការកត់ត្រានានា។
សម្ដេចតេជោបន្តថា សម្រាប់ជំរឿនមួយនេះ យើងដឹងអំពីស្ថានភាពពិត ចំនួនប្រជាជនពិតរបស់យើង ហើយយើងយកទៅប្រៀបធៀបទៅនឹងជំរឿនពេលមុន ថាតើអត្រាមនុស្សនៅជនបទមានចំនួនប៉ុន្មាន អត្រាមនុស្សនៅទីក្រុងកើនឡើងចំនួនប៉ុន្មាន អត្រាស្លាប់នៅក្នុងរយៈពេលមុនប៉ុន្មាន អត្រាស្លាប់នៅក្នុងរយៈពេលក្រោយប៉ុន្មាន ចំនួនប្រជាពលរដ្ឋដែលមុននេះ និងពេលនេះមានមធ្យោបាយធ្វើដំណើរប៉ុន្មាន ហើយបើគិតតាំងពីមុនកើនឡើងចំនួនប៉ុន្មាន អ្នកប្រើប្រាស់ទូរស័ព្ទ ដែលមុននោះប្រើប្រាស់ប៉ុន្មាន ពេលនេះប៉ុន្មាន យើងក្ដាប់បានយ៉ាងដូច្នេះ យើងនឹងអាចដឹងបាននូវការចរន្តវិវត្តន៍ នៅពេលខាងមុខរបៀបម៉េច ហើយយើងត្រូវគ្រប់គ្រងសភាពការណ៍នោះយ៉ាងដូចម្ដេច។ ឧទាហរណ៍ ការកើនឡើងនូវចំនួនប្រជាពលរដ្ឋ ដែលចាកចេញពីតំបន់ជនបទ មកកាន់បណ្តាទីក្រុង បានធ្វើឱ្យចំនួនមនុស្សនៅក្នុងទីក្រុង មិនថានៅទីក្រុងភ្នំពេញទេ ទីក្រុងដទៃមានការកើនឡើងជាមួយនឹងការថយចុះនៃចំនួនប្រជាពលរដ្ឋដែលត្រូវធ្វើកសិកម្មនៅតាមជនបទ។ ដូច្នេះវាមានសារៈសំខាន់ខ្លាំងណាស់ សម្រាប់ការចូលរួមធ្វើជំរឿនលើកនេះ ដែលរាជរដ្ឋាភិបាលបានប្រើប្រាក់កាសយ៉ាងច្រើន សម្រាប់ការធ្វើជំរឿនមួយនេះ។
គួរបញ្ជាក់ដែរថា ការងារជំរឿនប្រជាជនកម្ពុជា ត្រូវបានធ្វើឡើង២ដងរួចមកហើយ គឺនៅឆ្នាំ១៩៩៨ និងឆ្នាំ២០០៨ ដែលស្របតាមច្បាប់ស្តីពីស្ថិតិ ដោយកំណត់នូវកាតព្វកិច្ចរបស់ប្រជាពលរដ្ឋម្នាក់ៗត្រូវចូលរួមសហការក្នុងការធ្វើជំរឿន។ ការធ្វើជំរឿនថ្នាក់ជាតិនេះ នឹងផ្ដល់ នូវទិន្នន័យប្រជាសាស្ត្រពិតប្រាកដរបស់ប្រទេស និងជួយឱ្យរាជរដ្ឋាភិបាលអាចរៀបចំតាក់តែង គោលនយោបាយត្រឹមត្រូវ ព្រមទាំងធ្វើឱ្យការអនុវត្តកម្មវិធីផ្សេងៗ ទទួល បានតុល្យភាព នៃការអភិវឌ្ឍសម្រាប់ប្រជាពលរដ្ឋនៅទូទាំងប្រទេស។ ទិន្នន័យជំរឿន នឹងផ្ដល់ជាសូចនាករ តាមដាន ត្រួតពិនិត្យ ការសម្រេចបានការអនុវត្ត ផែនការយុទ្ធសាស្ត្រអភិវឌ្ឍន៍ជាតិ និង គោលដៅអភិវឌ្ឍន៍ប្រកបដោយចីរភាពនៃរបៀបវារៈឆ្នាំ២០១៦-២០៣០៕
ដោយ ជឹមណារី
