ភ្នំពេញ ថ្ងៃទី២២ ខែមករា ឆ្នាំ២០១៩ — ក្នុងឱកាសការស្នាក់អាស្រ័យបំពេញទស្សនកិច្ចផ្លូវការ នៅទីក្រុងប៉េកាំង សាធារណរដ្ឋប្រជាមានិតចិន នាព្រឹកថ្ងៃទី២២ ខែមករា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ឯកឧត្តម ហ៊ូ ឈុនហ៊័រ (Hu Chun Hau) ឧបនាយករដ្ឋមន្រ្តីចិន លោកជំទាវ កាវ យ៉ាន (Gao Yan) ប្រធានក្រុមប្រឹក្សាជំរុញអន្តរជាតិចិន អញ្ជើញជាអធិបតីដ៏ខ្ពង់ខ្ពស់ក្នុងពិធីបើកវេទិកា ស្តីពីការជំរុញពាណិជ្ជកម្ម និងវិនិយោគកម្ពុជា-ចិន ដែលមានការចូលរួមពីសំណាក់ឯកឧត្តម លោកជំទាវ ជាឥស្សរជនជាន់ខ្ពស់រដ្ឋាភិបាលចិន និងគណៈប្រតិភូជាន់ខ្ពស់រាជរដ្ឋាភិបាលកម្ពុជា និងផ្នែកឯកជននៃប្រទេសទាំងពីរប្រមាណ៧០០នាក់។
ប្រភពពីទូរទស្សន៍ជាតិកម្ពុជាបានឱ្យដឹងថា នៅក្នុងពិធីបើកវេទិកាពាណិជ្ជកម្មកម្ពុជា ចិននោះដែរ លោកជំទាវ កាវយ៉ាង ប្រធានក្រុមប្រឹក្សាជំរុញអន្តរជាតិចិន និងឯកឧត្តមអនុរដ្ឋមន្រ្តីពាណិជ្ជកម្មចិន មានប្រសាសន៍សម្ដែងនូវអំណរគុណយ៉ាងជ្រាលជ្រៅបំផុត ជូនចំពោះសម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ដែលបាន ចំណាយនូវពេលវេលាដ៏មានតម្លៃ អញ្ជើញចូលរួមពិធីបើកវេទិកាជំរុញពាណិជ្ជកម្មកម្ពុជា-ចិន នៅទីក្រុងប៉េកាំងប្រទេសចិន ដែលនេះគឺជាឱកាសដ៏ល្អ និងផ្តល់នូវភាពជឿជាក់សម្រាប់អ្នក វិនិយោគទុនចិន និងអ្នកវិនិយោគបរទេសដទៃទៀត ក្នុងការមកបណ្តាក់ទុកវិនិយោគ ក្នុងប្រទេសកម្ពុជា។
ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម មានប្រសាសន៍ថា នេះគឺជាឱកាសដ៏ប្រពៃមួយសម្រាប់ពាណិជ្ជករនៃប្រទេសទាំងពីរ ហើយក៏ជាឱកាសដ៏ថ្លៃថ្លាក្នុងការជួយឱ្យពួកគាត់ បានជួបពិភាក្សាឈ្វេងយល់ពីសក្តានុពលវិនិយោគ និងពាណិជ្ជកម្មនៅកម្ពុជា ដើម្បីធ្វើពាណិជ្ជកម្មនិងវិនិយោគ ស្របតាមគោលនយោបាយផ្លូវមួយខ្សែក្រវ៉ាត់មួយ និងសម្រាប់ជាឧត្តមប្រយោជន៍ផ្ទាល់ នៃពាណិជ្ជករ និងវិនិយោគិន។
ឯកឧត្តមរដ្ឋមន្រ្តីមានប្រសាសន៍បន្តថា កម្ពុជា-ចិន បានរៀបចំវេទិកាជំរុញពាណិជ្ជ កម្មកម្ពុជា-ចិន ចំនួន៩លើករួចមក ក្នុងប្រទេសចិន ជាមួយគ្នានេះលើទំនាក់ទំនង និងកិច្ច សហប្រតិបត្តិការទ្វេភាគី កម្ពុជា-ចិន បានបង្កើតមជ្ឈមណ្ឌលពាណិជ្ជកម្មកម្ពុជា ចំនួន៤ នៅទី ក្រុងមួយចំនួននៃប្រទេសចិន រួមទាំងការចុះហត្ថលេខាលើកិច្ចព្រមព្រៀង និងអនុស្សរណៈ ជាច្រើន ក្នុងការជំរុញពាណិជ្ជកម្ម និងការវិនិយោគនៃប្រទេសទាំងពីរកម្ពុជា-ចិន។
ឯកឧត្តម ហ៊ូ ឈុនហ៊័រ ឧបនាយករដ្ឋមន្រ្តីចិន មានប្រសាសន៍ថា នៅក្នុងកិច្ចខិតខំប្រឹងប្រែងរួមគ្នា ភាគីទាំងពីរចិន-កម្ពុជា កំពុងឈានចូលយុគសម័យថ្មីនៃការលើកកម្ពស់ គុណភាព កិច្ចសហប្រតិបត្តិការសេដ្ឋកិច្ច ពាណិជ្ជកម្ម ដោយទទួលបាននូវមហាសមិទ្ធផលដ៏ ស្តុកស្តម្ភ។ ក្នុងនោះ ពាណិជ្ជកម្មទ្វេភាគីបានកើនឡើងយ៉ាងលឿន ពោលគឺចាប់តាំងពី ឆ្នាំ២០១២មកដល់ បច្ចុប្បន្នចិនគឺជាដៃគូពាណិជ្ជកម្មធំទី១របស់កម្ពុជា។ ឆ្នាំ២០១៨ទំហំពាណិជ្ជកម្មនៃប្រទេសទាំងពីរ ជាង៥ពាន់លានដុល្លារអាម៉េរិក ពោលគឺប្រទេសចិនគឺជាទីផ្សារធំបំផុត សម្រាប់ប្រទេសកម្ពុជា ក្នុងការទទួលការនាំចូលអង្ករ និងផ្លែឈើ។
ឯកឧត្តមឧបនាយករដ្ឋមន្រ្តីមានប្រសាសន៍បន្តថា កិច្ចសហប្រតិបត្តិការខាងវិនិយោគ ក៏ទទួលបាននូវភាពហ្នឹងហ្ន ពោលគឺចិនជាប្រទេសនៃលំហូរវិនិយោគធំបំផុតសម្រាប់កម្ពុជា គិតមកដល់បច្ចុប្បន្នភាគីចិន បានបណ្តាក់ទុនវិនិយោគប្រមាណ ៨ពាន់លានដុល្លារដែលពាក់ ព័ន្ធនឹងវិស័យអគ្គិសនី ធនធានរ៉ែ វាយណភ័ណ្ឌ ទូរគមនាគមន៍ និងកសិកម្មជាដើម។ ឯកឧត្តមឧបនាយករដ្ឋមន្រ្តីមានប្រសាសន៍សង្កត់ធ្ងន់ថា តំបន់សេដ្ឋកិច្ច ពិសេសក្រុង ព្រះសីហនុក៏ទទួលបាននូវភាពទាក់ទាញ ពីអ្នកវិនិយោគមកពី១៣០ប្រទេស លើពិភពលោក និងផ្តល់នូវទីផ្សារការងារជាង២ម៉ឺននាក់សម្រាប់តំបន់សេដ្ឋកិច្ចពិសេស ខេត្តព្រះសីហនុ។ ឯកឧត្តម ឧបនាយករដ្ឋមន្រ្តីមានប្រសាសន៍ផងដែរថា ការកសាងហេដ្ឋារចនាសម្ព័ន្ធក្នុង ប្រទេសមានការកើន ឡើងខ្ពស់ក្នុងប្រទេសកម្ពុជា។
ថ្លែងសុន្ទរកថាគន្លឹះក្នុងពិធីបើកវេទិកា ស្តីពីការជំរុញនិងវិនិយោគកម្ពុជា-ចិន សម្តេចតេជោនាយករដ្ឋមន្រ្តីមានប្រសាសន៍ថា សម្តេចពិតជាមានការកោតសរសើរ និងវាយតម្លៃខ្ពស់ចំពោះ ក្រសួងពាណិជ្ជកម្មចិន ក្រុមប្រឹក្សាជំរុញពាណិជ្ជកម្មអន្តរជាតិចិន និងក្រសួងពាណិជ្ជកម្មកម្ពុជា ដែលបានសហការរៀបចំវេទិកាដ៏មានសារៈសំខាន់នេះឡើង បន្ទាប់ពីប្រទេសយើងទាំងពីរទើបតែប្រារព្ធខួប៦០ឆ្នាំ នៃទំនាក់ទំនងការទូត កាលពីពេលកន្លងទៅថ្មីៗនេះ។ សុន្ទរកថាគន្លឹះរបស់ សម្តេចតេជោនាយករដ្ឋមន្រ្តីបានគូសបញ្ជាក់ដែរថា ក្នុងនាម រាជរដ្ឋាភិបាល និងប្រជាជនកម្ពុជា សម្តេចសូមចូលរួមអបអរសាទរចំពោះ រដ្ឋាភិបាលចិន ក្នុងឱកាសខួបលើកទី៤០ នៃកំណែទម្រង់ និងការបើកទូលាយ របស់សាធារណរដ្ឋ ប្រជាមានិតចិន ដែលបានធ្វើឱ្យប្រទេសចិនសម្រេចបាននូវសមិទ្ធផលយ៉ាងធំធេងលើ គ្រប់វិស័យ និងក្លាយជាមហាអំណាចសេដ្ឋកិច្ចទី២ ក្នុងសកលលោក។
ជាមួយគ្នានេះ សម្តេចតេជោនាយករដ្ឋមន្រ្តី បានគាំទ្រ និងវាយតម្លៃខ្ពស់ចំពោះការដាក់ ចេញ និងអនុវត្តន៍នូវគំនិតផ្តួចផ្តើមខ្សែក្រវាត់មួយ ផ្លូវមួយ របស់ឯកឧត្តម ស៊ី ជីនពីង សំដៅបង្កើនភាពតភ្ជាប់ និងកិច្ចសហប្រតិបត្តិការរវាងបណ្តាប្រទេសជាដៃគូ។ សុន្ទរកថាគន្លឹះរបស់សម្តេចតេជោនាយករដ្ឋមន្រ្តី បានធ្វើការគូសបញ្ជាក់ដែរថា កិច្ចសហប្រតិបត្តិការទ្វេភាគី រវាងប្រទេសយើងទាំងពីរ មានការរីកចម្រើនគួរជាទីមោទនៈ ទាំងផ្នែកនយោបាយ សេដ្ឋកិច្ចនិងសង្គម ដែលត្រូវបានឆ្លុះបញ្ចាំង តាមរយៈដំណើរទស្សនកិច្ចទៅវិញទៅមកកាន់តែញឹកញាប់ របស់ថ្នាក់ដឹកនាំនៃប្រទេសទាំងពីរ កំណើនពាណិជ្ជកម្ម វិនិយោគ ទេសចរណ៍ និងកំណើននៃការប្រាស្រ័យ ទាក់ទងរវាងប្រជាជន និងប្រជាជន។
សម្តេចតេជោនាយករដ្ឋមន្រ្តី បានថ្លែងថា កាលពីឆ្នាំ២០១៧កន្លងទៅ ទំហំពាណិជ្ជកម្មនៃ ប្រទេសទាំងពីរ សម្រេចបាន ប្រមាណ ៦ប៊ីលានដុល្លារ ហើយផ្តើមចេញពីលទ្ធផលផ្លែផ្កា ដែលបានអនុវត្តន៍ក្នុងឆ្នាំ២០១៧ ប្រទេសទាំងពីរបានដាក់ចេញ នូវគោលដៅថ្មីទៀត ដើម្បីជំរុញទំហំពាណិជ្ជកម្មទ្វេភាគីឱ្យឈានដល់ ១០ប៊ីលានដុល្លារអាម៉េរិក នៅឆ្នាំ២០២៣។ បន្ថែមពីនេះ កម្ពុជាបានបន្តធ្វើកិច្ចសហប្រតិបត្តិការ ជាមួយប្រទេសចិនលើវិស័យនានា ទាក់ទងនិងវិស័យពាណិជ្ជកម្ម ដូចជាបង្កើតមជ្ឈមណ្ឌលពាណិជ្ជកម្មកម្ពុជា នៅក្នុងទីក្រុងមួយ ចំនួននៃប្រទេសចិន ការចុះហត្ថលេខាលើលិខិតប្តូរសារ ដែលបានផ្តល់ឱ្យកម្ពុជា នូវប្រព្រឹត្តិកម្មមិនជាប់ពន្ធគយគ្រប់ដណ្តប់លើ ៩៧ភាគរយ នៃបន្ទាត់ពន្ធគយសរុប និងការចុះហត្ថលេខាលើអនុស្សរណៈ នៃការយោគយល់គ្នាមួយចំនួន ក្នុងវិស័យពាណិជ្ជកម្ម។ ទំហំវិនិយោគបានស្ទុះឡើងរហូតដល់ប្រមាណ ៦,៨ប៊ីលានដុល្លារ កើនប្រមាណ៧ភាគរយ បៀបនិងឆ្នាំ២០១៧ ក្នុងនោះប្រទេសចិនបន្តស្ថិតនៅជាប្រទេសនាំមុខ ដែលបានបណ្តាក់ទុនវិនិយោគធំជាងគេបង្អស់នៅកម្ពុជាក្នុងឆ្នាំ២០១៨ ដែលមានទំហំទុន វិនិយោគសរុបប្រមាណ ៣,៦ ប៊ី លានដុល្លារ ស្មើនឹង៥៣ភាគរយ នៃទំហំវិនិយោគសរុប ពោលគឺកើនឡើង ប្រមាណ ៥៤ភាគរយ ធៀបនឹងឆ្នាំ២០១៧។
សុន្ទរកថារបស់សម្តេចតេជោនាយករដ្ឋមន្រ្តី បានគូសបញ្ជាក់ដែរថា បន្ទាប់ពីកម្ពុជាសម្រេចបាននូវសុខសន្តិភាពយ៉ាងពេញលេញ ព្រមទាំងការឯកភាពជាតិ និងឯកភាពទឹកដីទាំងស្រុង នៅចុងឆ្នាំ១៩៩៨ តាមរយៈការដាក់ចេញ និងអនុវត្តន៍នូវនយោបាយឈ្នះ ឈ្នះ រយៈពេលជាង២ទស្សវត្សរ៍កន្លងមកនេះ កម្ពុជាត្រូវបានគេទទួលស្គាល់ថា មានការផ្លាស់ប្តូរយ៉ាងប្រសើរ ទាំងទិដ្ឋភាពនយោបាយ សន្តិសុខ សេដ្ឋកិច្ចនិងសង្គម ជាមួយនិងអាត្រានៃកំណើនសេដ្ឋកិច្ច ប្រចាំឆ្នាំជាមធ្យម៧ភាគរយ។ កំណើនសេដ្ឋកិច្ចខ្ពស់នេះ បានធ្វើឱ្យកម្ពុជាសម្រេចបានឋានៈជាប្រទេស មានចំណូលមធ្យមកម្រិតទាបនៅឆ្នាំ២០១៥ នឹងស្ថិតនៅលើគន្លងនៃការឈានទៅសម្រេចបាន នូវឋានៈនៃប្រទេសមានចំណូលមធ្យមកម្រិតខ្ពស់ នៅត្រឹមឆ្នាំ២០៣០ នឹងជាប្រទេសមានចំណូលខ្ពស់នៅឆ្នាំ២០៥០។
សម្តេចតេជោនាយករដ្ឋមន្រ្តីមានប្រសាសន៍សង្កត់ធ្ងន់ថា ដើម្បីសម្រេចបាននូវគោលដៅ ខាងលើ និងស្របតាមយុទ្ធសាស្រ្តចតុកោណដំណាក់កាលទី៤ ដែលជារបៀបវារៈគោល នយោបាយ សង្គម សេដ្ឋកិច្ច នៃកម្មវិធីនយោបាយរបស់រាជរដ្ឋាភិបាលនីតិកាលទី៦ នៃរដ្ឋសភា រាជរដ្ឋាភិបាលកម្ពុជាបានដាក់ចេញ និងកំពុងអនុវត្តន៍ គោលនយោបាយ អភិវឌ្ឍន៍ វិស័យឧស្សាហកម្មកម្ពុជា ឆ្នាំ២០១៥-២០២៥ ដែលជាយុទ្ធសាស្រ្តកំណើនសេដ្ឋកិច្ច ថ្មី សំដៅធ្វើពិពិធកម្មសេដ្ឋកិច្ច និងកែប្រែរចនាសម្ព័ន្ធឧស្សាហកម្មកម្ពុជា ពីឧស្សាហកម្ម អតិពលកម្មទៅជាឧស្សាហកម្មផ្អែកលើជំនាញត្រឹមឆ្នាំ២០២៥ ដែលគោលនយោបាយ នេះមានភាពស៊ី សង្វាក់គ្នា ជាមួយនិងគំនិតផ្តួចផ្តើមខ្សែក្រវាត់មួយ ផ្លូវមួយ។
សម្តេចតេជោនាយករដ្ឋមន្រ្តីបានធ្វើការគូសបញ្ជាក់ថា ក្នុងស្មារតីនៃការធ្វើកំណែទម្រង់ស៊ីជម្រៅផ្ទៃក្នុង ដើម្បីបង្កើនភាពប្រកួតប្រជែង និងធានាបាននូវឯករាជ្យភាពផ្នែកសេដ្ឋកិច្ច ក្នុងឋានៈជាប្រទេសអធិបតេយ្យពេញលេញ រាជរដ្ឋាភិបាលកម្ពុជាបាននឹងកំពុងអនុវត្តន៍នូវអភិក្រមចំនួន៥ រួមមាន ឆ្លុះកញ្ចក់ ងួតទឹក ដុះក្អែល ព្យាបាល និងវះកាត់ ក្រោមបាវចនាចំនួន២ គឺការកែទម្រង់ខាងក្នុង និង ការបង្កើនមិត្តខាងក្រៅក្នុងស្មារតីឯករាជ្យ។
សម្តេចសង្កត់ធ្ងន់ថា សម្តេចបានសម្រេចធ្វើកំណែទម្រង់ស៊ីជម្រៅលើប្រព័ន្ធសេដ្ឋកិច្ចផ្ទៃក្នុង តាមរយៈការដាក់ចេញ និងអនុវត្តន៍នូវវិធានការថ្មីមួយ គឺការរក្សាទុកតែភ្នាក់ងារគយប៉ុណ្ណោះ ក្នុងការត្រួតពិនិត្យទំនិញ នៅតាមច្រកទ្វារអន្តរជាតិ ច្រកទ្វារ ព្រំដែនអន្តរជាតិ ច្រកទ្វារព្រំដែនទ្វេភាគី ច្រកទ្វារតំបន់ព្រំដែន និងច្រកទ្វារកំពុងផែសមុទ្រ តំបន់ សេដ្ឋកិច្ចពិសេស ទីកន្លែងសន្និធិគយបណ្តោះអាសន្ន និងទីកន្លែងត្រួតពិនិត្យទំនិញនាំចេញ នាំចូលផ្សេងទៀត។
សម្តេចបន្តថា ការសម្រេចបែបនេះ គឺជាការអនុវត្តនូវអភិក្រមវះកាត់ ដែលជាការកែទម្រង់ ដ៏ធំសម្បើមមួយរបស់កម្ពុជា ដើម្បីកាត់បន្ថយភាពស្មុគស្មាញ និងថ្លៃដើមក្នុងការធ្វើ ពាណិជ្ជកម្ម សំដៅធ្វើឱ្យកាន់តែល្អប្រសើរ នូវបរិយាកាសអំណោយផល សម្រាប់ធុរកិច្ច និងការវិនិយោគ និងការលើកកម្ពស់សមត្ថភាពប្រកួតប្រជែងរបស់កម្ពុជា។ ជាមួយនិងវិធាន ការជាក់ស្តែងមួយចំនួន ក្នុងការធានាដល់ការវិនិយោគរបស់បរទេសក្នុងប្រទេសកម្ពុជា សម្តេចតេជោនាយករដ្ឋមន្រ្តីមានប្រសាសន៍លើកឡើង ពីវិធានការមុតស្រួច និងជាក់ស្តែង ដែលរាជរដ្ឋាភិបាលបានដាក់ចេញ ក្នុងនោះទី១. ភាពអំណោយផលនៃស្ថិរភាពនយោបាយ និងម៉ាក្រូសេដ្ឋកិច្ច, ទី២.ការបើកចំហសេដ្ឋកិច្ចសម្រាប់អ្នកវិនិយោគទាំងអស់ ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេសនោះទេ, ទី៣.កម្លាំងពលកម្មដែលមានភាពសំបូរបែបនិងវ័យក្មេង ដែលក្នុងនោះប្រជាជនដែលមានអាយុ៣៥ឆ្នាំចុះ មានចំនួនដល់ទៅ៧២ភាគរយ នៃចំនួនប្រជាជនសរុប គួបផ្សំនឹងប្រាក់ឈ្នូលដែលមានភាពប្រកួតប្រេជែង, ទី៤.កម្ពុជាស្ថិតនៅលើទីតាំងយុទ្ធសាស្រ្តក្នុងតំបន់អាស៊ាន ដែលតំបន់នេះបាន និងកំពុងក្លាយជារោងចក្រនៅអាស៊ី ហើយទំនិញផលិតនៅកម្ពុជាអាចផ្គត់ផ្គងទីផ្សារក្នុងស្រុក ទីផ្សារអនុតំបន់មេគង្គ ទីផ្សារអាស៊ាន និងទីផ្សារដទៃទៀត ក្នុងពិភពលោក និងទី៥. កម្ពុជា-ចិន មានកិច្ចព្រមព្រៀងជា មួយគ្នាជាច្រើន ដែលជួយជំរុញនិងផ្តល់អត្ថប្រយោជន៍យ៉ាងសំបូរបែប ជូនដល់ធុរជន និងអ្នកវិនិយោគិនចិន ទាំងការលើកទឹកចិត្ត និងការធានាការវិនិយោគ៕
ដោយ ជឹម ណារី 
