នៅវិមានសន្តិភាពកាលពីរសៀលថ្ងៃទី ២៧ ខែមេសា ឆ្នាំ ២០១៧ ឯកឧត្តម ហោ ណាំហុង ឧបនាយករដ្ឋមន្រ្តី ប្រធានគណៈកម្មាធិការកម្ពុជា និងឯកឧត្តម យ៉ាង ជាឈី ប្រធានគណៈកម្មាធិការចិន ធ្វើជាសហប្រធានក្នុងកិច្ចប្រជុំគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិនលើកទី៤ ដើម្បីអនុវត្តកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ ។
ឯកឧត្តម ហោណាំហុង ឧបនាយករដ្ឋមន្រ្តី មានប្រសាសន៏លើកឡើងថា៖ ទស្សនកិច្ចរបស់ឯកឧត្តមយ៉ាង ជាឈី ពិតជាមានសារៈសំខាន់ណាស់ តាមរយៈដំណើរទស្សនកិច្ចនេះនិងធ្វើឲ្យទំនាក់ទំនងកិច្ចសហប្រតិបត្តិការកម្ពុជា-ចិន ឲ្យកាន់តែស៊ីជម្រៅ និងពង្រឹងមិត្តភាពដ៏ប្រពៃ និងការតែធ្វើឲ្យស៊ីជម្រៅថែមទៀតនូវកិច្ចសហប្រតិបត្តិការភាពជាដៃគូរយុទ្ធសាស្ត្រគ្រប់ជ្រុងជ្រោយកម្ពុជា-ចិន។
នៅក្នុងឱកាសនោះដែរភាគីទាំងពីរបានពិភាក្សាអំពីបញ្ហាតំបន់ និងអន្តរជាតិ ហើយកិច្ចប្រជុំនេះក៏បានពិភាក្សាត្រៀមរៀបចំដំណើរទស្សនកិច្ចផ្លូវការរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅប្រទេសចិន ដែលនិងមានឯកសារជាច្រើនត្រូវចុះហត្ថលេខានិង មានផែនការកិច្ចសហប្រតិបត្តិការទ្វេភាគីអំពី៖ ខ្សែក្រវ៉ាត់មួយ ផ្លូវមួយ”។ កិច្ចប្រជុំគណៈកម្មាធិការសម្របសម្រួលអន្តររដ្ឋាភិបាល កម្ពុជា-ចិន លើកទី៤នេះដែរភាគីទាំង២ មានការឯកភាពគ្នាលើគ្រប់វិស័យជាច្រើន រួមមានការផ្លាស់ប្តូរទស្សនកិច្ចថ្នាក់ដឹកនាំកំពូល រវាង ប្រទេសទាំងពីរ និងពង្រឹងកិច្ចសហប្រតិ បត្តិការគ្រប់វិស័យរួមមាន ពាណិជ្ជកម្ម ការវិនិយោគ ជំនួយកសិកម្ម និងទេសចរណ៏ បញ្ហាសន្តិសុខ កងទ័ព ពាណិជ្ជកម្ម និងជម្រុញអ្នកទេសចរណ៏ចិនឲ្យមកទស្សនាកម្ពុជាឲ្យបានចំនួន២លាននាក់ក្នុងឆ្នាំ២០២០ ពិសេសពន្លឿនឲ្យមានការសាងសង់ផ្លូវល្បឿនលឿន ភ្នំពេញ ក្រុងព្រះសីហនុ និងព្រលានយន្តហោះនៅខេត្តសៀមរាប ឲ្យបានឆាប់ផងដែរ។
ឯកឧត្តម យ៉ាង ជាឈី មានប្រសាសន៏ លើកថា៖ ក្រោមម្លប់ដ៏ត្រជាក់របស់ព្រះករុណាសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងក្រោមការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំអភិវឌ្ឍន៏ប្រទេសកម្ពុជា ឲ្យមានការរីកចំរើនលើគ្រប់វិស័យគួរឲ្យកត់សំគាល់។ ប្រទេសចិនបានយកចិត្តទុកដាក់លើភាពជាដៃគូយុទ្ធសាស្ត្រគ្រប់ជ្រុងជ្រោយជាមួយប្រទេសកម្ពុជាហើយប្រទេសចិន នៅតែបន្តគាំទ្រប្រទេសកម្ពុជា ដើរលើមាគ៌ាអភិវឌ្ឍ និងបន្តពង្រឹងគាំទ្រប្រទេស កម្ពុជា ជួយកម្ពុជារក្សាស្ថេរភាព លើកកំពស់ជីវភាពរស់នៅរបស់ប្រជាជនកម្ពុជា ដែលជាការអភិវឌ្ឍ ប្រកបដោតចីរភាព ។
សូមបញ្ជាក់ថា៖ នៅក្នុងឱកាសស្នាក់ក្នុងប្រទេសកម្ពុជាក្រៅពីចូលរួមកិច្ចប្រជុំ ឯកឧត្តម យ៉ាង ជាឈី ទីប្រឹក្សារដ្ឋ នៃសាធារណរដ្ឋប្រជាមានិតចិន បានចូលក្រាបបង្គំគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងចូលជួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាផងដែរ៕
អត្ថបទ៖ សាវឿន
