ប្រមុខរាជរដ្ឋាភិបាលកម្ពុជា អញ្ជើញទៅដល់ទីក្រុងហាណូយប្រកបដោយ សុវត្ថិភាព

84

​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក៏​ដូចជាប្រមុខរដ្ឋ ប្រ​មុខរដ្ឋាភិបាល និងគណៈប្រតិភូនៃប្រទេសចិន ឡាវ មីយ៉ាន់​ម៉ា ​និងប្រទេ​ស​ថៃ ដែលជាប្រទេសស្ថិតក្នុង​មហាអនុ​តំបន់​មេគង្គ​(GMS) បានអញ្ជើញទៅដល់ទីក្រុង​ហា​ណូ​យ សាធារណរដ្ឋសង្គមនិយមវៀតណាមជាបន្តបន្ទាប់ហើយ នៅថ្ងៃ​ទី​​៣០ ខែមីនា ឆ្នាំ២០១៨ ដើម្បីអញ្ជើញចូលរួមកិច្ចប្រជុំកំពូលមហាអនុ​តំបន់​មេគង្គ(GMS)លើក​ទី៦ និងកិច្ចប្រជុំកំពូល​កម្ពុ​ជា ឡាវ វៀត​ណាម​(CLV) លើកទី១០ ស្តីពីកិច្ចសហប្រតិបត្តិការ​អភិ​វឌ្ឍន៍តំបន់ត្រីកោណ ដែលប្រទេសវៀតណាម​ធ្វើជា​ម្ចាស់​​ផ្ទះ​ នៃកិច្ចប្រជុំ​កំពូល​ទាំងពីរនោះ។

​បេសកជនពិសេសរបស់ទូរទស្សន៍ជាតិកម្ពុជាបានឱ្យដឹងថា យន្តហោះពិសេស​របស់​​ព្រះ​រា​ជា​​ណាចក្រកម្ពុជា ជើងហោះហើរលេខ០០១ បាន​ធ្វើការចុះចត​ដោយសុវត្ថិភាព នាអាកា​ស​យាន​ដ្ឋានអន្តរ​ជាតិ​ណូយបៃ ទីក្រុងហាណូយ នាវេលាម៉ោង៩​និង​៣៥នាទីព្រឹក ក្រោមវត្តមាន​នៃ​ការស្វាគមន៍យ៉ាងស្និទ្ធស្នាល​រាក់​ទាក់​បំផុត ពី​ឥស្សរជនជាន់​ខ្ពស់​វៀតណាម និងឥស្សរជន​ការទូតរបស់ព្រះ​រាជាណាចក្រកម្ពុជា ប្រចាំប្រទេសវៀត​ណាម​​ជាច្រើន​រូប។

​កិច្ចប្រជុំ​កំពូល​ម​ហា​អនុតំបន់​មេគង្គ​(GMS) លើកទី៦ និងកិច្ចប្រជុំកំពូលកម្ពុជា ឡាវ វៀត​ណាម​(CLV) លើក​ទី​១០ ស្តីពីកិច្ច​សហប្រតិបត្តិការ​អភិវឌ្ឍន៍​តំបន់ត្រីកោណ នឹងចាប់ផ្តើមកិច្ច ពិភាក្សារបស់ខ្លួននៅ​​រសៀលថ្ងៃទី៣០ និងនៅថ្ងៃទី​៣១​ ខែមីនា។ មេដឹកនាំនៃប្រទេស GMS បានប្តេជ្ញារួមកម្លាំងគ្នា ដើ​ម្បី​ឈានទៅដាក់ឱ្យដំណើរការយ៉ាងឆាប់រហ័ស និងប្រកបដោយ ជោគជ័យនូវបណ្តា​គម្រោង​វិស័យ​អាទិភាព និងគម្រោងកិច្ចសហប្រតិបត្តិការផ្សេងៗដែល បានព្រមព្រៀងគ្នា ព្រមទាំង​ប្រែ​ក្លាយ​វាឱ្យ​ទៅ​ជាការពិត នូវផលប្រយោជន៍នៃ គម្រោងទាំង នោះ សម្រាប់ប្រជាជននៃ​ប្រទេ​ស​ GMS ដើម្បីសម្រេចឱ្យបាននូវគោល​ដៅ​ចុងក្រោយ នៃការអភិវឌ្ឍប្រកបដោយ​បរិយា​ប័ន្ន​ និងនិរន្តរភាពក្នុង GMS ៕

ដោយ ជឹម ណារី