ឯកត្តម ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីស្តីទីទទួលបន្ទុកទីស្តីការគណៈរដ្ឋមន្រ្តី បានអញ្ជើញជាអធិបតីដឹកនាំកិច្ចប្រជុំ ដើម្បីអនុវត្តសេចក្តីសម្រេច របស់រាជរដ្ឋាភិបាលលេខ ១០២ សសរ ចុះថ្ងៃទី ០៨ ខែវិច្ឆិកា ឆ្នាំ២០១៧ ស្តីពីការបង្កើតគណៈកម្មការអន្តរក្រសួងដើម្បីរៀបចំពិធីបួងសួងចម្រើនសេចក្តីសុខជូនដល់ព្រះរាជាណាចក្រកម្ពុជានៅមុខប្រាសាទអង្គរវត្ត ខេត្តសៀមរាប ដែលនឹងប្រព្រឹត្តទៅនៅថ្ងៃទី០២-០៤ ខែធ្នូ ឆ្នាំ២០១៧ ឆ្នាំ២០១៧ នាពេលខាងមុខ នៅទីស្តីការគណៈរដ្ឋមន្ត្រី ព្រឹកថ្ងៃទី២០ ខែវិច្ឆិកា ឆ្នាំ២០១៧នេះ ។
កិច្ចប្រជុំនេះក៏មានការអញ្ជើញចូលរួមពីសំណាក់លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ចផងដែរ។
សូមជម្រាបជូនផងដែរថា បន្ទាប់ពីរាជរដ្ឋាភិបាលបង្កើតគណៈកម្មការអន្តរក្រសួង ដើម្បីរៀបចំពិធីបួងសួងចម្រើនសេចក្តីសុខនេះរួចមក គណៈកម្មការក៏បានបង្កើតអនុគណៈកម្មការចំនួន ៧ទៀត ដើម្បីចូលរួមឱ្យដំណើរការពិធីបួងសួងនេះបានសម្រេចទៅដោយជោគជ័យរួមមាន៖ ទី១- អនុគណៈកម្មការខ្លឹមសារ កម្មវិធី ទស្សនីយភាព និងពិធីក្រុងពាលី (ដឹកនាំដោយ លោកជំទាវ ឧបនាយករដ្ឋមន្ត្រី ម៉ែន សំអន) ទី២- អនុគណៈកម្មការនិមន្ត រៀបចំចង្ហាន់ ការគង់នៅ របស់ព្រះសង្ឃ (ដឹកនាំដោយ លោកជំទាវ ភឿង សកុណា) ទី៣- អនុគណៈកម្មការចាត់តាំង ដឹកជញ្ជូន និងមហាជន (ដឹកនាំដោយឯកឧត្តម ហ៊ុន ម៉ានី) ទី៤- អនុគណៈកម្មការផ្សព្វផ្សាយ (ដឹកនាំដោយឯកឧត្តម ខៀវ កញារិទ្ធិ) ទី៥- អនុគណៈកម្មការការពារសន្តិសុខ សណ្តាប់ធ្នាប់សាធារណៈ និងសង្គ្រោះបន្ទាន់ (ដឹកនាំដោយ នាយឧត្តមសេនីយ៍ នេត សាវឿន) ទី៦- អនុគណៈកម្មការពិធីការ និងបដិសណ្ឋារកិច្ច (ដឹកនាំដោយឯកត្តម ឈិន កេតនា) ទី៧- អនុគណៈកម្មការផ្គត់ផ្គង់ និងហិរញ្ញវត្ថុ (ដឹកនាំដោយឯកឧត្តម តឹករ៉េត សំរេច)៕
