សម្រង់​សង្កថា សម្តេចតេជោ ហ៊ុន សែន ថ្លែងក្នុង​​​ពិធី​សម្ពោធ​រោង​ចក្រប្រព្រឹត្តិកម្ម​ទឹកស្អាត​និរោធ ដំណាក់កាល ទី ២

190

សម្ដេច ព្រះតេជព្រះគុណ ព្រះសង្ឃគ្រប់ព្រះអង្គ ជាទីសក្ការៈ។ ឯកឧត្តមអគ្គរដ្ឋទូត នៃសាធារ​ណរដ្ឋ​បារាំង​ប្រ​ចាំ​ព្រះរាជាណាចក្រកម្ពុជា។ ឯកឧត្តម លោកជំទាវ អស់លោក លោកស្រី បងប្អូនជនរួមជាតិ ដែលបាន​អញ្ជើញ​ចូលរួមនៅក្នុងឱកាស​នេះ ជាទីគោរពនឹករលឹកពី ខ្ញុំព្រះករុណាខ្ញុំ។

សម្ពោធរោងចក្រប្រព្រឹត្តិកម្មទឹកស្អាតនិរោធ ជំហានទី ២

ថ្ងៃនេះ ខ្ញុំព្រះករុណាខ្ញុំ ពិតជាមានការរីករាយ ដែលបានវិលមកភាគខាង​ត្បូងរាជធានីភ្នំពេញ​សាជា​ថ្មី​ម្ដង​ទៀត។ កាលពីថ្ងៃ ច័ន្ទ គឺនៅភាគខាងត្បូង បានសេចក្ដីថា សម្ពោធផ្លូវ​ ៦០ ម៉ែត្រ នៅឯបឹងជើងឯក ភ្ជាប់ទី​ក្រុង​ភ្នំ​ពេញ​ជាមួយនឹងខេត្តកណ្ដាល។ ម្សិលមិញនេះ គឺសម្ពោធ និងបើកការដ្ឋាន នៅទិសខាង​ជើង​រាជ​ធា​នី​ភ្នំពេញ ទាក់ទងទៅនឹងវិស័យកីឡា ដែលទាំងការចាប់ផ្ដើមសាងសង់ និងសាងសង់រួចហើយ តម្លៃ​ប្រ​ហាក់​ប្រហែល ២០០ លានដុល្លារ(អាមេរិក) ដោយឡែកតែសំណង់ថ្មី គឺ ១៥៧ លាន ដុល្លារ(អាមេរិក)។

អភិវឌ្ឍទិសខាងជើង មិនភ្លេចទិសខាងកើត

ថ្ងៃនេះ ខ្ញុំព្រះករុណាខ្ញុំ បានមកទិសខាងត្បូងវិញម្ដង សម្រាប់សម្ពោធដាក់អោយប្រើប្រាស់នូវ​រោងចក្រ​ប្រ​ព្រឹត្តិកម្មទឹកស្អាតនិរោធជំហានទី ២ ដែលកសាងឡើងដោយថវិកាបដិភាគរបស់រដ្ឋាករស្វយ័តក្រុងភ្នំ​ពេញ និងកម្ចីពីភ្នាក់ងារបារាំងសម្រាប់ការអភិវឌ្ឍ។ សម្រាប់ថ្ងៃស្អែក គឺនឹងវិលទៅទិសខាងជើងវិញ គឺសម្ពោធ​ដាក់​អោយប្រើប្រាស់នូវផ្លូវជាតិលេខ ៦អា។ មុននឹងដាច់ឆ្នាំវក ឈានចូលឆ្នាំរកា​ ពិតណាស់ថា ការងារ​ជាប់​រហូតមិនចេះអស់ ប៉ុន្តែ គ្មានជម្រើសណាល្អ​ជាងជម្រើសដែលត្រូវតែធ្វើដំណើរ ដើម្បីនឹងបំពេញ​កាតព្វ​កិច្ច​ក្នុងឋានៈប្រមុខរាជរដ្ឋាភិបាលនោះទេ។ ឧប​នាយករដ្ឋមន្រ្តី ទេសរដ្ឋមន្រ្តី​ រដ្ឋមន្រ្តី និងមន្រ្តីមួយចំនួន ក៏​ត្រូវ​ធ្វើដំណើរអមជាមួយ ដោយបោះបង់ចោល​ការងារមួយចំនួននៅស្ថាប័ន/មន្ទីរ និងក្រសួងរបស់​ខ្លួន។ ថ្ងៃ​នេះ ខ្ញុំព្រះករុណាខ្ញុំ រីករាយណាស់ តាមរយៈនៃសមិទ្ធផលដែលយើងបានកសាងឡើងនៅទីនេះ ហើយ​ដែល​ឯកឧត្តមទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម និងសិប្បកម្ម ចម ប្រសិទ្ធ បានធ្វើរបាយ​ការណ៍​ជូន​​ចំពោះបងប្អូនជនរួមជាតិរួចមកហើយ អំពីប្រវត្តិ និងទិសដៅទាក់ទងនឹងការផ្គត់ផ្គង់ទឹកស្អាតនៅ​រាជធា​នី​​​ភ្នំពេញរបស់យើង។

ប្រវត្តិនៃការផ្គត់ផ្គង់ទឹកស្អាតនៅទីក្រុងភ្នំពេញ

និយាយដល់បញ្ហាទឹកនេះ ខ្ញុំព្រះករុណាខ្ញុំ មានវិប្បដិសារីមួយ ពាក់ព័ន្ធជាមួយនឹងអតីតកាលដ៏ជូរចត់ នោះ​នៅ​ត្រង់ថា កាលពីឆ្នាំ ១៩៧៩ កុំថាឡើយមានទឹកម៉ាស៊ីនប្រើប្រាស់ គឺយើងគ្មានទេនៅទីក្រុងភ្នំពេញនេះ។ ព្រលឹមឡើងត្រូវទៅអូសទឹកពីទន្លេ យកមកដើម្បីចាក់ចូលពាងនៅខាងក្រោម។ ថ្ងៃមួយ ខ្ញុំព្រះករុណាខ្ញុំ មាន​ការធ្វេសប្រហែស បន្ទាប់ពីការជួបជាមួយនឹងភរិយារបស់ ខ្ញុំព្រះករុណាខ្ញុំ ជាមួយកូនប្រុសដែលមិន​ស្គាល់​ឪពុក ហើយដែលហៅឪពុកថា ពូៗរយៈពេល ២ ខែ។ ពេលនោះ ខ្ញុំព្រះករុណាខ្ញុំ មិនបានយកទឹកពី​ក្រោមឡើងទៅលើទេ បែរជាទុកអោយភរិយា គឺរែកទឹកពីក្រោមឡើងទៅលើ។ ដូច្នេះ ក៏បានធ្វើឲ្យបាត់​បង់​កូន​មួយទៀត ដែលពាក្យខ្មែរយើងហៅថា រលូតកូន។ នេះជាប្រវត្តិពិតប្រាកដ ដែលយើងបានចាប់ផ្ដើម​តាំង​ពី​ពេលដែលយើងប្រើប្រាស់ទឹក ដែលត្រូវយកពីទន្លេមេគង្គយកមកប្រើប្រាស់ ក្នុងឋានៈជារដ្ឋ​មន្ត្រី​ការ​បរទេស​នៅក្នុងសម័យនោះ។

ឥឡូវ​​ស្ថានភាពបានផ្លាស់ប្តូរហើយ។ បន្ទាប់ពីការដែលយើងបានជួសជុលដាក់ឲ្យប្រើប្រាស់ឡើងវិញ នូវ​បណ្តាញ​ទឹក ប៉ុន្តែ បណ្តាញទឹករបស់យើងកាលនោះ ខ្ញុំព្រះករុណាខ្ញុំ នៅចំាបានថា កន្លែងមួយចំនួនប្រជា​ពល​រដ្ឋ​របស់​យើងទៅចោះទុយោ រួចហើយគាត់ទាញទឹកពីអាហ្នឹង ដើម្បីគាត់ដាក់ធុងអូសយកទៅលក់​ឲ្យ​អ្នក​ដទៃទៀត។ នេះវាជារឿងប្រវត្តិ នៃការផ្គត់ផ្គង់ទឹកក្នុងទីក្រុងភ្នំពេញ។ ការពិតទៅប្រវត្តិ នៃការទាក់ទង​(នឹង​ការ)ផ្គត់ផ្គង់ទឹកនៅទីក្រុងភ្នំពេញនេះ មានតំាង​ពីអតីតកាលមក ក៏ប៉ុន្តែ វាក៏បានខូចខាតក្នុងដំណាក់​កាលមិនប្រើប្រាស់ក្នុងដំណាក់កាល ប៉ុល ពត ដែលបានបណ្តេញប្រជាជនចេញពីទីក្រុងភ្នំពេញ។ អញ្ចឹង ការដែលមិនបានប្រើប្រាស់នៅក្នុងរយៈពេល​​ជិត ៤ ឆ្នំា គឺបានធ្វើឲ្យទុយោទឹកទាំងអស់មានការកកស្ទះ ហើយដែលពេលនោះការប្រើប្រាស់ជួបការលំបាកយ៉ាងខ្លំាង។

ផ្ទះរបស់ ខ្ញុំព្រះករុណាខ្ញុំ នេះរហូតមកដល់ឆ្នំា ១៩៩៣ ឬ ១៩៩៤ ហើយទើបមានទឹកប្រើពិតប្រាកដ។ កាល​​ពី​មុននោះ មានឡានដឹកទឹកមួយ មិនដឹងថាវាឆុងយ៉ាងម៉េចសម្រាប់ផ្ទះខ្ញុំព្រះករុណាខ្ញុំ។ មួយនេះ គឺ​ថា ធ្វើជានាយករដ្ឋមន្ត្រីហើយហ្នឹង វាអត់មានទឹកប្រើនឹងគេ ទឹកវាមកមិនដល់អាកន្លែងហ្នឹង ប្រហែលជា​កន្លែង​ហ្នឹងទួល(ហើយ)មើលទៅ បានឡានដឹកទឹកយកមក រួចហើយបាន​មានម៉ូទ័រទាញ​ឡើងទៅ​ខាង​លើ។ ប៉ុន្តែឥឡូវនេះ វាមិនដូច្នេះទេ សភាពការណ៍ការដោះស្រាយទឹករបស់យើងបានពង្រីកជាបន្ទាប់ ពីដំ​ណាក់​កាលមួយមកកាន់ដំណាក់កាលមួយ។

សហប្រតិបត្តិការត្រីភាគី កម្ពុជា បារាំង ជប៉ុន ផ្គត់ផ្គង់ទឹក

កាលពីថ្ងៃទី ៤ ខែ មិថុនា ឆ្នំា ២០១៣ ខ្ញុំព្រះករុណាខ្ញុំ បាននំាមកសម្ពោធនៅទីនេះ ដើម្បីដាក់​ឲ្យប្រើ​ប្រាស់​នូវ​រោង​ចក្រប្រព្រឹត្តិកម្មទឹកស្អាតនិរោធជំហានទី ១ ដែលពេលនោះ ក្រោមថវិការបស់​រដ្ឋាករទឹក​ទីក្រុង​ភ្នំ​ពេញ និងថវិកាទីភ្នាក់ងារបារំាងសម្រាប់ការអភិវឌ្ឍ ព្រមទំាងភ្នាក់ងារសហប្រតិបត្តិការណ៍ជាតិ នៃប្រទេស​ជប៉ុន​ផងដែរ។ ថ្ងៃនេះយើងសម្ពោធសាជាថ្មីម្តងទៀត ដើម្បីដាក់អោយប្រើប្រាស់នៅជំហានទី ២ ដែល​មាន​សមត្ថភាពផ្គត់ផ្គង់ដូចពេលមុន តម្រូវការនៅទីក្រុងភ្នំពេញកាន់តែធំទៅៗ ដែលទាមទារឲ្យយើងដោះ​​ស្រាយ ហើយការដោះស្រាយទឹករបស់យើងនៅពេលនេះ មិនមែនជាការដោះស្រាយដូចទសវត្សរ៍ ៨០ នោះទៀតទេ ទឹករបស់យើងពេលនេះ គឺអាចផឹកបានតែម្តង មិនចំាបាច់យកទៅដំា ប៉ុន្តែយកល្អ ដើម្បី​ធានា​អ​នា​ម័យ គឺដំាល្អជាងមិនដំា។

តម្រូវការផ្គត់ផ្គង់ទឹកស្អាត គឺនៅគ្រប់ទីកន្លែងទាំងអស់

ការរីកលូតលាស់របស់យើងនេះ តាមរយៈការគ្រប់គ្រងដ៏ល្អរបស់រដ្ឋាករទឹកទីក្រុងភ្នំពេញ ដែលជា​អង្គ​ភាព​ស្វយ័ត​មួយ សម្រាប់ការផ្គត់ផ្គង់ទឹកនៅទីក្រុងភ្នំពេញនេះ ហើយលាតសន្ធឹងទៅដល់ទីក្រុងតាខ្មៅ នៃ​ខេត្ត កណ្តាល។ ឥឡូវនេះ យើងបន្តជំហានបន្តទៅទៀត ដូចដែល ឯកឧត្តទេសរដ្ឋមន្ត្រី ចម ប្រសិទ្ធ បាន​លើក​ឡើងពាក់ព័ន្ធជាមួយនឹងបញ្ហាការផ្គត់ផ្គង់ទឹក តម្រូវការនេះ មិនគ្រាន់តែសម្រាប់ប្រជាជននៅក្នុងទី​ក្រុង​នោះ​ទេ ក៏ប៉ុន្តែ នៅគ្រប់ទីកន្លែង ប្រជាជនសុទ្ធតែមានតម្រូវការ។ យើងមានផែនការមេមួយ សម្រាប់ការ​ផ្គត់​ផ្គង់ទឹក សម្រាប់ប្រជាពលរដ្ឋរបស់យើង។

អរគុណដល់ដៃគូ/ស្ថាប័នពាក់ព័ន្ធ ដែលបានផ្តល់ឥណទាន ដែលរួមចំណែកទៅដល់ការអភិវឌ្ឍទឹកស្អាត

ខ្ញុំព្រះករុណាខ្ញុំ សូមយកឱកាសនេះ ថ្លែងអំណរគុណ ចំពោះរដ្ឋាភិបាលបារាំង តាមរយៈ AFD ( Agence Française de Développement) ដែលបានផ្តល់​នូវ​ឥណ​ទាន សម្រាប់រួមចំណែកទៅដល់ការអភិវឌ្ឍ ទឹកស្អាត ដំណាក់កាលទី ២ នៅទីនេះ ​ហើយសង្ឃឹមថា មិត្ត​បារាំងនឹងបន្តជួយដល់កម្ពុជាតទៅទៀត។ ថ្លែងនូវការកោតសរសើរ ចំពោះក្រុមហ៊ុន ក្វាងស៊ី Construction ក៏ដូចជា ក្រុមហ៊ុន Surface ដែលមក ពីបារាំង សម្រាប់ការសាងសង់ឲ្យសម្រេចនៅទីនេះ ចំ​ណាយថវិការហូតទៅដល់ជាង ៦០ លានដុល្លារ​សហរដ្ឋអាមេរិក ដែលក្នុងហ្នឹង ២៤ ជិត ២៥ លាន​ដុល្លារ​(អាមេរិក) មកពីរដ្ឋាករទឹកទីក្រុងភ្នំពេញ និង ៣៦ លានដុល្លារ(អាមេរិក) មកពីទីភ្នាក់ងារបារាំង​សម្រាប់​ការអភិវឌ្ឍ។

អនុសាសន៍ ២ ចំណុច ពាក់ព័ន្ធនឹងប្រ័ពន្ធផ្គត់ផ្គង់ទឹក/ភ្លើង 

ខ្ញុំព្រះករុណាខ្ញុំ សូមយកឱកាសនេះ ផ្តល់ជាអនុសាសន៍ ចំពោះក្រសួងឧស្សាហកម្ម និងសិប្បកម្ម ដែលជា​អា​ណាប័ក ព្រមទាំងរដ្ឋាករទឹកនៅទីក្រុងភ្នំពេញ៖

ទី ១. ដោយសារកាលពីមុននេះ បណ្តាឃុំមួយចំនួនរបស់ខេត្តកណ្តាល ស្ថិតនៅក្នុងក្របខណ្ឌ នៃខេត្ត​កណ្តាល ហើយពេលនោះក៏បានអនុញ្ញាតឲ្យក្រុមហ៊ុនឯកជនមួយចំនួនបានធ្វើការវិនិយោគ សម្រាប់ការ​ផ្គត់​ផ្គង់​ទឹកទៅដល់ប្រជាពលរដ្ឋ។ ឥឡូវ សង្កាត់ទាំងនោះបានកាត់មកចូលទីក្រុងភ្នំពេញហើយ ដូច្នេះ កិច្ច ការដែលត្រូវធ្វើ សូមឲ្យរដ្ឋាករទឹកទីក្រុងភ្នំពេញ ទិញយកនូវបណ្តាញទឹកដែលវិស័យឯកជន​បានវិនិ​យោគ​នូវបណ្តាឃុំ ដែលមុននេះជាឃុំនៅក្នុងខេត្តកណ្តាល ឥឡូវ បានកាត់ចូលមកទីក្រុងភ្នំពេញ។ ដូច្នេះ យើង ត្រូវបន្ថែមទុនមួយចំនួនទៀត ដើម្បីទិញយកនូវផ្នែកផ្គត់ផ្គង់ទឹក ដែលមុននេះវិស័យឯកជនបានវិនិ​យោគ​នៅ​ទី​នោះ ហើយនៅផ្នែកខាងត្បូងទីក្រុងនេះ ដូចជាលោកឧកញ៉ា កុក អាន។ ដូច្នេះ យើងខិតខំទិញ​យក ដើម្បីធានាការផ្គត់ផ្គង់ទឹក ព្រោះឥឡូវឃុំ/សង្កាត់មួយចំនួន ដែលកាត់ចូលមកទីក្រុងភ្នំពេញ​នៅប្រើ​ប្រាស់​ទឹក​ដែលមានតម្លៃខុសគ្នា ជាមួយអ្នកដែលរស់នៅទីក្រុងភ្នំពេញ។ ដូច្នេះសង្ឃឹមថា លោកឧកញ៉ា កុក អាន នឹងយោគយល់ទៅដល់សភាពការណ៍នេះ ហើយក្រៅពីនោះ ក៏នៅមានបណ្តាញ​ទឹកមួយ​ចំនួន​ផ្សេង​ទៀត ដែលនៅសង្កាត់ទើបនឹងកាត់ចូលមកទីក្រុងភ្នំពេញ ត្រូវបន្តការទិញយក ដើម្បីយើងបន្ត យើងត​ភ្ជាប់​ជាមួយនឹងបណ្តាញទឹក ដែលមានបច្ចុប្បន្ននេះ ហើយអនុវត្តនូវថ្លៃប្រហាក់ប្រហែលគ្នា។

ចំណុចទី ២ គឺពិភាក្សាជាមួយនឹងអគ្គិសនីកម្ពុជា ទាក់ទងនឹងការប្រើប្រាស់អគ្គិសនី នោះវាទាក់ទង​នឹង​តម្លៃ​ទឹក ដែលអាចផ្តល់លទ្ធភាពឲ្យរដ្ឋាករទឹកទីក្រុងភ្នំពេញ។ បញ្ចុះនូវថ្លៃទឹកពីផ្នែកណាមួយ តាមរយៈ នៃ​កា​រចុះថ្លៃភ្លើង សម្រាប់ការបូមទឹកផ្គត់ផ្គង់ សម្រាប់ទីក្រុងភ្នំពេញ។ ក្រសួងឧស្សាហកម្ម រ៉ែ និងថាមពល អាជ្ញា​ធរអគ្គិសនី ក៏ដូចជា ក្រុមហ៊ុនអគ្គិសនី បានដាក់គោលដៅរួចហើយ និងរបៀបប្រើប្រាស់រួចហើយ។ ការ​ប្រើប្រាស់បូមទឹក ឬប្រើប្រាស់នៅក្នុងការផលិតឧស្សាហកម្មនៅក្នុងពេលយប់ តម្លៃអគ្គិសនី គឺមាន​តម្លៃ​ថោក​ជាងពេលថ្ងៃ។ ដូច្នេះ សុំឲ្យរដ្ឋាករទឹកទីក្រុងភ្នំពេញ ឆ្លៀតប្រើប្រាស់អគ្គិសនីក្នុងពេលយប់ នៅពេល​ដែល​ថ្លៃអគ្គិសនីនោះ គឺមានតម្លៃថោកជាងពេលថ្ងៃ ដោយសារពេលយប់យើងនៅសល់ភ្លើងច្រើន ពេលថ្ងៃ​យើង​ប្រើភ្លើងច្រើនណាស់។ ប៉ុន្តែ ពេលយប់ចំនួនភ្លើងដែលយើងប្រើប្រាស់មានចំនួនតិចជាង។ ដូច្នេះ អគ្គិសនីកម្ពុជា ក៏បានបញ្ចុះតម្លៃសម្រាប់ការប្រើប្រាស់ក្នុងវិស័យឧស្សាហកម្ម និងវិស័យផ្សេងទៀត ជាពិ​សេស​ក្នុងវិស័យឧស្សាហកម្ម គឺមានតម្លៃថោកជាង។ អញ្ចឹង សូមពិភាក្សាគ្នា រវាងក្រសួងឧស្សាហកម្ម និង​សិប្បកម្ម, រដ្ឋាករទឹក, ក៏ដូចជា អាជ្ញាធរអគ្គិសនី, ក្រសួងឧស្សាហកម្ម រ៉ែ និងថាមពល។ ក្រុមហ៊ុន​អគ្គិសនី​ទាក់ទងនឹងការប្រើអគ្គិសនី ហើយការប្រើអគ្គិសនីនេះ នឹងនាំទៅដល់ការទម្លាក់តម្លៃទឹក​ សម្រាប់ការប្រើ​ប្រាស់​របស់ប្រជាជនយើង។

រៀបចំអនុស្ថានីយអគ្គិសនី ធានាផ្គត់ផ្គង់ទឹក និងតម្លៃថោក

មានរឿងមួយក៏ត្រូវតែសិក្សាផងដែរ តាមរបៀបគណនានៃតម្លៃអគ្គិសនី ការតភ្លើងភ្ជាប់ចេញពីបណ្តាញ ដែល​មានតម្លៃវាខ្ពស់ជាង។ ប៉ុន្តែ បើសិនជាចេញពីអនុស្ថានីយតែម្តងតម្លៃទាបជាង។ ដូច្នេះ សូមពិភាក្សា​គ្នារវាងអគ្គិសនីកម្ពុជា និងរដ្ឋាករទឹកតែម្តង តើយើងគួររៀបចំដាក់អនុស្ថានីយអគ្គិសនី នៅក្នុងរោងចក្រនេះ​ឬ​ទេ? ដើម្បីធានាផ្គត់ផ្គង់សម្រាប់ការប្រើប្រាស់បូមទឹក។ ជួនកាលវាអាដាច់ភ្លើងកន្លែងនេះ ​កន្លែង​នោះ ក៏ប៉ុន្តែ បើយើង​ដាក់អនុស្ថានីយ គឺទី ១ ធានាការផ្គត់ផ្គង់សម្រាប់ការបូមទឹក និងទី ២ ថ្លៃថោក​ទៀត។ បើនិយាយពីថ្លៃ​សម្រាប់ការតពីអនុស្ថានីយ គឺថោកជាង។ អញ្ចឹង ត្រូវពិភាក្សាគ្នា តើអ្នកទិញ​អគ្គិស​នីដែល សម្រាប់បូមទឹកនៅទីនេះ ​ក៏ដូចជា រោងចក្រផលិតអគ្គិសនីដទៃទៀត វិនិយោគបង្កើតអនុស្ថានីយ​ខ្លួន​ឯង ឬទុកឲ្យអគ្គិសនីកម្ពុជាជាអ្នកចេញទុនវិនិយោគ?

តម្លៃទឹកអាចខុសគ្នាតាមទីតាំង សូមយោគយល់

ខ្ញុំព្រះករុណាខ្ញុំ យល់ថា បើយើងគិតគូរបែបនេះ យើងអាចរកវិធីបន្ថយថ្លៃទឹក ដើម្បីរួមចំណែកការលំបាក​សម្រាប់ប្រជាជន តាមរយៈការកាត់បន្ថយតម្លៃប្រើប្រាស់អគ្គិសនី ក្នុងការបូមទឹក។ ប៉ុន្តែ សូមមេត្តាយោគ​យល់​ថា តម្លៃទឹកមិនមែនទាក់ទងទាំងស្រុងទៅលើបញ្ហាអគ្គិសនីទេ។ ឥឡូវហិរញ្ញប្បទាននៅទីនេះ ចំនួន ៦០ លានដុល្លារ(អាមេរិក) ក្នុងនោះកម្ចីពីបារាំង ចំនួន ៣៦ លានដុល្លារ។ អញ្ចឹង ត្រូវសងទៅបារាំង​ទាំង​ការ​ទាំងដើម។ បើដូច្នោះ​ ការផលិតទឹកក៏ត្រូវមានផលចំណេញរបស់វាមួយចំនួនណានោះ ដើម្បីវិនិយោគ​បន្ត​ផង និងដើម្បីមានលុយសងទាំងការទាំងដើម។ សងទៅបារាំងវិញផង មិនមែនបារាំងឲ្យទទេទេ បើ​បា​រាំង​ឲ្យទទេ ក៏ត្រូវតែមានការគិតគូរក្នុងតម្លៃដើម្បីធានាជាមួយនឹងថ្លៃដើមនៃការផលិតផងដែរ។ ហើយកន្លែង​នី​មួយៗ​តម្លៃខុសគ្នា ដូចមានក្នុងសៀវភៅជំនួយស្មារតី នៃការណែនាំហើយ។ កន្លែងខ្លះដើម្បីធ្វើឲ្យទឹក​បាន​ស្អាត​ គឺត្រូវប្រើនូវរបៀបកែច្នៃវា ដើម្បីឲ្យទឹកនោះអាចប្រើប្រាស់បាន។ ទឹកមួយម៉ែត្រគូបដូចគ្នានៅតំបន់​របស់​យើង​នេះ ប៉ុន្តែ វាថោកជាងទឹកមួយម៉ែត្រគូបនៅតំបន់ផ្សេង ដែលមានជាតិពុលយ៉ាងខ្លាំង ហើយជាតិ​ពុល​នោះ​តម្រូវឲ្យរដ្ឋាករទឹក និងអ្នកផលិតទឹកប្រើប្រាស់វិធីគ្រប់យ៉ាង ដែលមានតម្លៃថ្លៃជាង ដើម្បីនឹង​ធ្វើឲ្យ​ទឹកស្អាតប្រើប្រាស់បាន។ ដូច្នេះ តម្លៃវាមិនដូចគ្នាទេ។ អញ្ចឹង សូមយោគយល់ពីសំណាក់ប្រជាពលរដ្ឋ ដែល​ជាអ្នកប្រើប្រាស់ទឹក។

ទាមទារជម្រុញការតបណ្តាញទឹកទៅកន្លែងដែលមិនទាន់មាន

មួយទៀត គឺទាមទារឲ្យមានការជម្រុញការតបណ្តាញទឹក ទៅកាន់តំបន់ដែលមិនទាន់មានទឹក។ អម្បាញ់​មិញ ប្អូនប្រុសខាងនោះបានលើកឡើងថា សូមសម្តេចជួយតបណ្តាញទឹកទៅសង្កាត់ព្រែកថ្មី។ ចេះតែត​ទៅ សម័យនេះមិនមែនសម័យអូសទឹកទេ ហើយក៏មិនមែនសម័យផលិតក្អមទូលទឹក និងរែកទឹកដូច​មុន​ដែរ។ កន្លែងខ្លះប្រើអណ្តូងស្នប់  អណ្តូងនេះ អណ្តូងនោះ និងកន្លែងមួយចំនួនប្រើដោយ​ម៉ាស៊ីនទៅ​ហើយ​។ សូម​បន្តការខិតខំដើម្បីតម្រង់ឆ្ពោះ​ទៅរកការគ្រប់ដណ្តប់ តាមរយៈជម្រុញការតទុយោទឹក ទៅតំបន់ដែល​មិន​ទាន់​​មានទឹក ទាំងតំបន់ដែលកសាងលំនៅស្ថានថ្មី និងតំបន់ដែលប្រជាជនកំពុងរស់នៅ ហើយមិន​ទាន់​មាន​​ទឹក។ នេះជា​អនុសាសន៍ ដែលខ្ញុំព្រះករុណាខ្ញុំ ផ្តល់ជូនក្រសួងឧស្សាហកម្ម និងសិប្បកម្ម ក៏​ដូច​ជា ចំ​ពោះរដ្ឋាករទឹកទីក្រុងភ្នំពេញ ហើយក៏អាចទាក់ទងនឹងទឹកជាមួយនឹងបណ្តាខេត្តដទៃទៀត។

អរគុណស្ថាប័នពាក់ព័ន្ធបានតទឹក/ភ្លើងដល់ផ្ទះជួល កាត់បន្ថយការលំបាកកម្មករ/ការិនី សិស្ស/និស្សិត 

ខ្ញុំព្រះករុណាខ្ញុំ ក៏សូមយកឱកាសនេះ អរគុណចំពោះក្រសួងឧស្សាហកម្ម និងសិប្បកម្ម ក៏ដូចជា រដ្ឋាករ​​ទឹក ដែលបានខិតខំអនុវត្តនូវអនុសាសន៍របស់ ខ្ញុំព្រះករុណាខ្ញុំ អំពីការតទឹក និងផ្គត់ផ្គង់ទឹក សម្រាប់​កម្មករ/ការិនី និស្សិត/សិស្ស ដែលរស់នៅតាមផ្ទះជួល ដែលមុននេះ តម្លៃទឹកត្រូវបានកំណត់​ដោយ​ម្ចាស់​ផ្ទះ។ តែឥឡូវនេះ តម្លៃទឹកត្រូវបានកំណត់ដោយក្រសួង/ស្ថាប័នអ្នកផ្គត់ផ្គង់ទឹក ដែលធ្វើឲ្យកម្មករ​របស់​យើង​ធូរ​ស្រាលនៅក្នុងការ​បង់តម្លៃទឹក ក៏ដូចជាតម្លៃភ្លើងផងដែរ។ មុននេះ តម្លៃភ្លើងអាស្រ័យទៅលើម្ចាស់​ផ្ទះ យើងឲ្យប្រើប្រាស់ ៥០ គីឡូវ៉ាត់ម៉ោងចុះក្រោមត្រឹមតែ ៦១០ រៀលទេ តែម្ចាស់ផ្ទះតម្រូវឲ្យ​កម្មករ​(កម្មការិ​នី)​ចេញ(ថ្លៃអគ្គិសនី)ដល់ទៅ ១.០០០ (រៀល) ឬជាង ១.០០០ (រៀល)។ ទឹកក៏ដូចជា តែ ១.២៥០ (រៀល) ប៉ុន្តែ ម្ចាស់ផ្ទះឲ្យ(ចេញថ្លៃ)រហូតទៅដល់ ២.០០០ (រៀល) ឬអាចលើសពីនេះ។ អញ្ចឹងទេ សុំកោតសរសើរ ចំ​ពោះការខិតខំទាំងអស់នេះ ដើម្បីរួមចំណែកកាត់បន្ថយការលំបាក ចំពោះកម្មករ/ការិនី ដែលរស់នៅតាម​ផ្ទះ​ឈ្នួល និស្សិត/សិស្ស ដែលរស់នៅតាមផ្ទះឈ្នួលផងដែរ។

ប្រជាពលរដ្ឋមានការសប្បាយរីករាយ នៅក្រោមដំបូលសុខសន្តិភាព និងការអភិវឌ្ឍប្រទេស

ខ្ញុំព្រះករុណាខ្ញុំ ហាក់ដូចជាបាននិយាយច្រើន ដោយសារតែវានិយាយជាប់គ្នា ហើយឥឡូវស្អកកតែម្តង។ ម្សិលមិញឆ្លៀត ទៅជួបជុំជាមួយនឹងកីឡាករ/ការិនី។ ឃើញតែក្មួយៗរាំហ្នឹង គឺហត់ជួសតែម្តង ព្រោះសុទ្ធ តែលោត។ ឥឡូវជិតចូលឆ្នាំហើយ ខ្ញុំឃើញគេចាក់ Video Clip ពីត្រង់ណា ឃើញចាស់ៗនាំគ្នាលេង​សប្បាយ​ម្យ៉ាងដែរ។ លេងលាក់កន្សែង។ ឃើញចាស់ៗរត់ឲ្យត្រុយ រួចហើយគាត់រាំឲ្យរំពើនតែម្តង ហើយឆ្នាំ​នេះ គឺជាឆ្នាំដែលយើងនឹងមានការសប្បាយរីករាយជាបន្តទៀត តាមរយៈកម្មវិធីជាច្រើន ក្នុងនោះ ប្រជា​ពលរដ្ឋ​ចូល​រួមសប្បាយរីករាយ នៅក្រោមដំបូលសុខសន្តិភាព និងការអភិវឌ្ឍប្រទេសរបស់យើង។

ការព្យាករណ៍ឧតុនិយម

សង្ឃឹមថា ឆ្នាំនេះភ្លៀងក៏ធ្លាក់ ឥឡូវថ្ងៃហ្នឹង(ភ្លៀង)ធ្លាក់ទៀតបើតាមមើលទៅ ព្រោះឧតុនិយមគេថា(ភ្លៀង) ធ្លាក់។ ឧតុនិយមឥឡូវហ្នឹងទាយអត់ខុសទេ។ ហើយ(ភ្លៀង)ធ្លាក់គ្រប់ខេត្តទាំងអស់ ប៉ុន្តែ វាខុសពីឆ្នាំទៅ។ ឆ្នាំទៅអត់ភ្លៀង អត់ទឹកពិបាកណាស់។ ឯឆ្នាំនេះ យើងមានភ្លៀង យើងមានទឹក ហើយប្រហែលជាទទួល ទេវតាឆ្នាំនេះ ប្រហែលជាទទួលនៅកន្លែងខ្លះមានភ្លៀងតែម្តង ទេវតាចុះមកនាំភ្លៀងមកជាមួយតែម្តង។ ឮថា(ទេវតាចុះ)ម៉ោង ៣ (អធ្រាត្រ)ប៉ុន្មាននាទីឯណោះ? ម៉ោង ៣ (និង) ១២ នាទី(អធ្រាត្រ)។ ប្រហែលជា ខ្ញុំព្រះករុណាខ្ញុំ អត់បានទទួលទេ សុំទទួលពីល្ងាចទុកឲ្យហើយ ហើយភ្លឺឡើងចាំទទួលម្តងទៀត ទៅមើល មុខទេវតា។

គតិលោក រឿងខ្លាចប្រពន្ធ

មន្ត្រីរាជការដែលធ្វើការនៅខាងនេះ មានអ្នកខ្លះទៅ(លេង)អង្គរវត្តឆ្នាំនេះ? អង្គរសង្ក្រាន្តឆ្នាំនេះ? រៀងរាល់ ឆ្នាំ(​​ទីក្រុង)ភ្នំពេញស្ងាត់តែម្តង។ ប៉ុន្តែឥឡូវនេះ មិនមែនប្រមូលផ្តុំនៅតែអង្គរទេ ទៅគ្រប់ទីកន្លែងទាំងអស់។ សុំផ្តាំផ្ញើឲ្យហើយ ទៅណាក៏ទៅចុះ អាណិតស្ពាយប្រពន្ធទៅជាមួយ (សំណើច និងស្នូរទះដៃរបស់មហា ជន)។ ប្រសិនបើប្រពន្ធកូនខ្ចី សុំកុំទៅណាចោល នៅមើលប្រពន្ធ។ អាហ្នឹងផ្តាំទុកឲ្យហើយ ដើម្បីធានាថា ចូលឆ្នាំ គឺមិនមានរឿងក្នុងគ្រួសារកើតឡើងទេ។ ការពិត បើទោះបីឆ្នាំនេះ ឆ្នាំវក ដែលជាសត្វស្វា អញ្ចឹង​អី? ឆ្នាំក្រោយឆ្នាំរកា ឆ្នាំមាន់ ខ្ញុំព្រះករុណាខ្ញុំ បានមាន់ដល់ទៅបីឥឡូវហ្នឹង។ មានមួយ គឺកូន ហើយ​មាន់​ពីរ​នឹងកើតនៅពេលខាងមុខនេះ ក្នុងមួយគ្រួសារនេះ គឺមានមាន់ដល់ទៅបី។ សង្ឃឹមថា វាកើតនៅពេល​យប់​ទៅចុះ ព្រោះកើតពេលយប់វាមិនសូវរពិស។ បើទោះបីកើតឆ្នាំណាក៏ដោយ ទៅដណ្តឹង(កូន)គេ ត្រូវ​ទៅ​មើលឆ្នាំវ៉ៃលេខអាតាក់អីទាំងអស់។ ឆ្នាំនេះត្រូវហ្នឹងឆ្នាំនោះឬអត់? បុរសអត់បញ្ហាទេ ឆ្នាំណានៅតែឆ្នាំ​ហ្នុង ប៉ុន្តែអ្វីដែលសំខាន់ ស្ត្រីមុនការ គឺឆ្នាំវក (តែដល់ពេល)ការហើយ គឺឆ្នាំខាល បានសេចក្តីថា មុនការ គឺ​(ឆ្នាំ)ស្វា ដល់ការហើយក្លាយទៅជាខ្លាតែម្តង។

អញ្ចឹងទេ យកល្អយើងដាក់ខ្លួនទៅជាអ្នកខ្លាចប្រពន្ធទៅល្អជាង ហើយសមាគមអ្នកខ្លាចប្រពន្ធ ត្រូវបាន​បង្កើត​នៅឆ្នាំ ២០០១ នៅប្រទេសប្រ៊ុយណេ។ ប្រមុខរដ្ឋ ប្រមុខរដ្ឋាភិបាលពេលនោះ បង្កើតសមាគម​ខ្លាច​ប្រ​ពន្ធ ប្តីខ្លាចប្រពន្ធ។ ខ្ញុំព្រះករុណាខ្ញុំ ធ្វើជាប្រធាន (សំណើច និងស្នូរទះដៃរបស់មហាជន)។ នាយករដ្ឋ​មន្ត្រី​ថៃ​ពេលនោះធ្វើជាអនុប្រធាន ឥឡូវ ប្រហែលជានាយករដ្ឋមន្ត្រីម៉ាឡេស៊ីហើយធ្វើជាអនុប្រធាន ប៉ុន្តែ សួរ​ទៅ​មើល អ្នកខ្លះនៅខាងក្រោយអួតថា​សុទ្ធតែមិនខ្លាចប្រពន្ធ?

ដំណាលរឿងមួយទៅចុះ។ ព្រះរាជាព្រះអង្គចង់ដឹងថា តើមន្ត្រីរបស់ព្រះអង្គមានប៉ុន្មានខ្លាចប្រពន្ធ? មាន​ប៉ុន្មាន​អត់ខ្លាចប្រពន្ធ? ព្រះរាជាក៏ឲ្យមន្ត្រីរបស់ព្រះអង្គ ថាអ្នកណាខ្លាចប្រពន្ធឲ្យទៅខាងនេះ អញ្ចឹង​ចេះ​តែ​ដើរ​ហែរទៅ នៅសល់មន្ត្រីម្នាក់អត់ព្រមទៅណាតែម្តង នៅស្ងៀមនៅហ្នឹង។ ព្រះរាជាក៏បានសួរទៅ​មន្ត្រី​ហ្នឹងថា ម៉េចបានជាលោកឯងអត់ទៅណា? មន្ត្រីនោះក៏បានឆ្លើយតបទៅព្រះអង្គវិញថា ប្រពន្ធទូលបង្គំ​ប្រាប់​មកថា គេឲ្យទៅណាក៏កុំទៅ។ នៅឲ្យស្ងៀម។ កាលពីមុន ព្រះរាជាគិតស្មានថា បុរសម្នាក់នេះ មន្ត្រី​មួយនាក់នេះអត់ខ្លាចប្រពន្ធទេ ព្រោះអ្នកខ្លាចប្រពន្ធទៅនៅខាងនោះអស់រលីងទៅហើយ អញ្ចឹង អ្នក​ដែល​អត់ទៅនេះ គឺអ្នកអត់ខ្លាចប្រពន្ធ។ ព្រះអង្គគិតថា យ៉ាងហោចណាស់ក៏មាន(មន្ត្រី)មួយដែរ​អត់ខ្លាច​ប្រ​ពន្ធ ប៉ុន្តែ មិននឹកស្មានថា មួយនេះខ្លាចជាងគេទៅទៀត (សំណើច​របស់សម្តេច និងមហាជន)។ ប្រពន្ធ​​ប្រាប់​មក​ពី​ផ្ទះថា បើគេឲ្យទៅណាកុំទៅ។ នេះរឿងខ្លាចប្រពន្ធ។ ជាការល្អ ខ្លាចប្រពន្ធ (គឺ)មានសុភមង្គល មិន​មែនបានសេចក្តីថា ប្រពន្ធហ្នឹងខាំទេ។

១ ឆ្នាំ ជួបសាសនិកឥស្លាម ១ ដង នៅពេលស្រាយបួស

ខ្ញុំព្រះករុណាខ្ញុំ ថ្ងៃនេះអរគុណជាមួយនឹងការនិមន្តចូលរួមរបស់សម្តេច ព្រះតេជព្រះគុណគ្រប់ព្រះអង្គ ឯក​ឧត្តម លោកជំទាវ ជាពិសេស ឯកឧត្តមអគ្គរដ្ឋទូតបារាំង ក៏ដូចជា តំណាងប្រិយមិត្តបារាំង ដែលនៅក្នុង​ក្រប​ខណ្ឌជាអ្នកការទូត ឬក៏ក្របខណ្ឌ AFD និងក្រុមហ៊ុនក្វាំងស៊ី។ អរគុណចំពោះការចូលរួមរបស់ ឯក ឧត្តម លោកជំទាវ អស់លោក លោកស្រី ក៏ដូចជា បងប្អូនជនរួមជាតិ រាប់ទាំងបងប្អូនសាសនិកឥស្លាម ផងដែរ ដែលមកជួបជុំគ្នានៅទីនេះ ហើយសង្ឃឹមថា នៅពេលស្រាយបួសយើងនឹងជួបគ្នាទៀត នៅក្នុង អំឡុង ខែ មិថុនា ឬ ខែ កក្កដា។ ជិតដល់ពេលបួសហើយ ឆ្លងផុតតែ ខែ មេសា នឹងចូលដល់ខែបួស ហើយ។ អញ្ចឹងទេ​ ជាធម្មតាយើងជួបគ្នារាល់ឆ្នាំ។ ១ ឆ្នាំ ជួបគ្នាម្តង គឺស្រាយបួស។

ពាំនាំ

ថ្ងៃនេះ ខ្ញុំព្រះករុណាខ្ញុំ បាននាំមក សម្រាប់ លោកយាយ លោកតា ចំនួន ២០០ ​នាក់ ក្នុងម្នាក់ៗ ក្រណាត់ស ១ ដុំ ថវិកា ១ ម៉ឺនរៀល។ ជូនក្រុមកាយប្ញទ្ធិ និងយុវជនកម្ពុជា ចំនួន ២០០ នាក់ ក្នុងម្នាក់ៗ ថវិកា ចំនួន ១ ម៉ឺនរៀល។ សិស្សានុសិស្ស ចំនួន ៣.៤២៨ នាក់ ក្នុងម្នាក់ៗ សៀវភៅ ២ ក្បាល ប៊ិច ១ ដើម ថវិកា ៥​ ពាន់រៀល។ ជូនលោកគ្រូ អ្នកគ្រូ ចំនួន ២៥២ នាក់ ក្នុងម្នាក់ៗ ថវិកា ៣ ម៉ឺន រៀល។ ជូនបុគ្គលិក និងកម្មករ ចំនួន ៤៩​ នាក់ ក្នុងម្នាក់ៗ ថវិកា ២ ម៉ឺនរៀល។ ជូនវិទ្យាល័យច្បារអំពៅ សង្កាត់និរោធ ថវិកា ១ លានរៀល។ ជូនមណ្ឌលសុខភាពនិរោធ ថវិកា ១ លានរៀល។ ជូនសាលាខណ្ឌ ច្បារអំពៅ ថវិកា ១ លានរៀល។ ជូនក្រុមតន្ត្រីសម័យ ថវិកា ១ លានរៀល។ ហើយក្រុមតន្ត្រីសម័យហ្នឹង ចេះច្រៀង (និង)រាំ(បទ)អញ្ចេះៗឬនៅ? (បទរាំ)អញ្ចេះៗ (និងបទ)ឆ្កែរត់បុកប៉ោត។ បើសិនជាមិត្តបារាំងចេះ រាំបទរាំញីកែងជើង បទ(រាំ)អញ្ចេះៗ ហើយបទឆ្កែរត់បុកប៉ោត ល្អតែម្តង។ អាហ្នឹងស្រួលរាំទេ ក្បាច់ដូច បារាំងដែរ (សម្តេច និងមហាជនសើច)។

ជាមួយនឹងការប្រកាសសម្ពោធដាក់ឲ្យប្រើប្រាស់ នូវរោងចក្រប្រព្រឹត្តិកម្មទឹកស្អាតនិរោធ ជំហានទី ២ ដែល ហិរញ្ញប្បទានសាងសង់ដោយថវិការដ្ឋាករស្វយ័តក្រុងភ្នំពេញ និងថវិកាកម្ចីទីភ្នាក់ងារបារាំង សម្រាប់ការអ ភិវឌ្ឍ ខ្ញុំព្រះករុណខ្ញុំ សូមប្រគេនពរ ចំពោះសម្តេច ព្រះតេជព្រះគុណ ព្រះសង្ឃគ្រប់ព្រះអង្គ ជូនពរ ឯកឧត្តម លោកជំទាវ អស់លោក លោកស្រី និងបងប្អូនជនរួមជាតិ នៅក្នុងឱកាសចូលឆ្នាំថ្មីខាងមុខនេះ ឆ្នាំរការ នព្វស័ក ព.ស ២៥៦១ សូមប្រកបដោយពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបី ឃ្លៀងឃ្លាតឡើយ៕