សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលអមដំណើដោយ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ឯកឧត្ដម ឧបនាយករដ្ឋមន្ត្រី ហោ ណាំហុង និងឥស្សរជនសំខាន់ៗមួយចំនួនទៀត បាន អញ្ជើញគោរពវិញ្ញាណក្ខន្ធសព ឯកឧត្ដម អ៊ុំ ម៉ាន្នូរីន សមាជិកព្រឹទ្ធសភា នាព្រឹកថ្ងៃទី៣០ ខែកញ្ញា ឆ្នាំ២០១៧ នៅវត្តបុទុមវត្ដី ស្ថិតក្នុងខណ្ឌដូនពេញ រាជធានីភ្នំពេញ។
នៅក្នុងសារលិខិតរំលែកទុក្ខរបស់សម្ដេចតេជោ នាថ្ងៃទី៣០ ខែកញ្ញា ឆ្នាំ២០១៧ បានសរសេរថា តាងនាម រាជរដ្ឋាភិបាល ខ្ញុំសូមសម្ដែងនូវសមានចិត្ត និងការចូលរួមរំលែកទុក្ខ យ៉ាងក្រៀមក្រំបំផុតជាមួយក្រុមគ្រួសារ សពឯកឧត្ដម អ៊ុំ ម៉ាន្នូរីន ចំពោះការបាត់បង់ដ៏ធំ ធេងនេះ។ ឯកឧត្ដម អ៊ុំ ម៉ាន្នូរីន ជាកុលបុត្រខ្មែរមួយរូបដែល បានរួមចំណែកយ៉ាងសកម្មក្នុង បុព្វហេតុដើម្បីបម្រើជាតិ សាសនា និងព្រះមហាក្សត្រ។ សូមវិញ្ញាណក្ខន្ធ ឯកឧត្ដម អ៊ុំ ម៉ាន្នូរីន បានទៅសោយសុខ ក្នុងសុខគតិភព កុំបីឃ្លៀងឃ្លាតឡើយ។
គួរបញ្ជាក់ដែរថា ឯកឧត្ដម អ៊ុំ ម៉ាន្នូរីន សមាជិកព្រឹទ្ធសភា ដែលត្រូវជាបងប្រុសរបស់ សម្ដេចព្រះមហាក្សត្រី នរោត្ដម មុនិនាថ សីហនុ បានទទួលមរណភាពកាលពីថ្ងៃទី២៨ ខែកញ្ញា ឆ្នាំ២០១៧ វេលាម៉ោង៨ និង៤៥នាទី ព្រឹក ក្នុងជន្មាយុ ៩៣ឆ្នាំ ដោយជរាពាធ។ មរណភាពរបស់ ឯកឧត្ដម ម៉ាន្នូរីន គឺជាការបាត់បង់ស្វាមី បិតាជីតា ជាទីស្រឡាញ់ប្រកបដោយព្រហ្មវិហារធម៌ និងជាការបាត់បង់ឥស្សរជនដ៏ឆ្នើមមួយរូបដែលធ្លាប់បានដង្ហែ ព្រះករុណា ព្រះបាទសម្ដេចព្រះនរោត្ដម សីហនុ «ព្រះបរមរតនកោដ្ឋ» បំពេញព្រះរាជបូនីយកិច្ចរំដោះជាតិ ចូលរួមអភិវឌ្ឍន៍ប្រទេសជាតិប្រកបដោយវឌ្ឍនភាព វិបុលភាព រុងរឿងជាមហាគ្រួសារខ្មែរ នាសម័យ សង្គមរាស្ត្រនិយម។ ចាប់តាំងពីនីតិកាលទី១ រហូតដល់នីតិកាលទី៣ នៃព្រឹទ្ធសភា ឯកឧត្ដមបានយកអស់ កម្លាំង កាយចិត្ត ប្រាជ្ញា ស្មារតី ក្នុងការរួមចំណែកពង្រឹងលទ្ធិប្រជាធិប តេយ្យ និងនីតិរដ្ឋ។
ពិធីដង្ហែ និងបូជាសព នឹងប្រព្រឹត្តទៅនៅថ្ងៃអាទិត្យទី០១ ខែតុលា ឆ្នាំ២០១៧ វេលាម៉ោង ៧និង៣០នាទីព្រឹក នៅឈាបនដ្ឋានទីលានមុខវត្តបុទុមវត្តី៕
ដោយ ជឹម ណារី
