អ្នកនាំពាក្យក្រសួងការពារជាតិ៖កម្ពុជាបេ្តជ្ញាចិត្តធ្វើការប្រកបដោយការស្ថាបនា និងភាពស្មោះត្រង់ក្នុងការដោះស្រាយវិវាទដោយសន្តិវិធីជាមួយប្រទេសថៃដើម្បីលើកកកម្ពស់សន្តិភាព សិ្ថរភាព និងប្រក្រតីភាពឡើងវិញ

លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិថ្លែងក្នុងសេចក្តីសង្ខេបព័ត៌មានប្រចាំថ្ងៃស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាព្រឹកថ្ងៃទី១៨ ខែសីហា ឆ្នាំ២០២៥ បានមានប្រសាសន៍ថា ការប្តេជ្ញារបស់កម្ពុជាក្នុងការធ្វើការប្រកបដោយការស្ថាបនា និងភាពស្មោះត្រង់ និងសហការយ៉ាងជិតស្និទ្ធជាមួយប្រទេសថៃ ម៉ាឡេស៊ី បណ្តាប្រទេសសមាជិកអាស៊ានដទៃទៀត និងដៃគូពាក់ព័ន្ធទាំងអស់ដូចជាសហរដ្ឋអាមេរិក និងសាធារណរដ្ឋប្រជាមានិតចិនជាដើម ដើម្បីធានាថាការអនុវត្តន៍បទឈប់បាញ់ប្រកបដោយប្រសិទ្ធភាពនិងពេញលេញ និងការដោះស្រាយវិវាទដោយសន្តិវិធីស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។