ឆ្លើយតបនឹងការលើកឡើងរបស់ក្រសួងការបរទេសថៃ នៅថ្ងៃទី២ ខែសីហា ឆ្នាំ២០២៥ ម្សិលមិញ ដែលអំពាវនាវឲ្យមានកិច្ចចចារ ក្រសួងការបរទេសនិងសហប្រតិបត្តិការអន្តរជាតិកម្ពុជា បានបញ្ជាក់ជំហរជាថ្មីក្នុងការស្វែងរកដំណោះស្រាយដោយសន្តិវិធីនូវរាល់បញ្ហាដែលមានជាមួយនឹងភាគីថៃ ស្របទៅតាមច្បាប់អន្តរជាតិ និងគោលការណ៍ដេលមានចែងនៅក្នុង MOU ឆ្នាំ២០០០។ នេះបើតាមឯកឧត្តម ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ
ថ្លែងនៅក្នុងការធ្វើបច្ចុប្បន្នភាពព័ត៌មានស្ដីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅទីស្ដីការគណៈរដ្ឋមន្ត្រី នាវេលាម៉ោង ១១:០០ ព្រឹកថ្ងៃអាទិត្យ ទី៣ ខែសីហា ឆ្នាំ២០២៥ នេះ។
ឯកឧត្តមអ្នកនាំពាក្យបានលើកឡើងថា «ក្រសួងការបរទេសនិងសហប្រតិបត្តិការអន្តរជាតិ សូមបញ្ជាក់ជាថ្មីម្ដងទៀតអំពីការតាំងចិត្តឥតងាករេរបស់កម្ពុជាចំពោះដំណោះស្រាយដោយសន្តិវិធីនូវរាល់បញ្ហាដែលមានជាមួយនឹងភាគីថៃ ស្របទៅតាមច្បាប់អន្តរជាតិ ហើយនិងគោលការណ៍ដេលមានចែងនៅក្នុង MOU ឆ្នាំ២០០០»។
ទន្ទឹមនេះឯកឧត្កម ជុំ សុន្ទរី ក៏បានអំពាវនាវឲ្យភាគីថៃធ្វើឲ្យមានសង្គតិភាពរវាងពាក្យសម្ដី និងទង្វើជាក់ស្ដែង ដោយឯកឧត្តមបានគូសបញ្ជាក់ថា «ក្នុងពេលដែលយើងធ្វើការកត់ត្រានូវការអំពាវនាវខាងលើរបស់ថៃ ក្រសួងការបរទេស និងសហប្រតិបត្តិការអន្តរជាតិ សូមសម្ដែងការសោកស្ដាយចំពោះការលើកឡើងរបស់ថៃ ដែលពុំមានសង្គតិភាពទៅនឹងការពិតដែលកើតមានឡើង។ យើងសូមអំពាវនាវឲ្យភាគីថៃធ្វើឲ្យមានភាពស៊ីគ្នារវាងពាក្យសម្ដី និងសកម្មភាពជាក់ស្ដែង តាមរយៈការចៀសវាងនូវសកម្មភាពបង្ករឿង ការគោរពចំពោះកិច្ចព្រមព្រៀងឈប់បាញ់ ហើយនិងការធានាការប្រព្រឹត្តស្របទៅតាមគោលការណ៍មនុស្សធម៌ និងការដោះលែងជាបន្ទាន់នូវយោធារបស់កម្ពុជាដែលស្ថិតក្រោមការគ្រប់គ្រងរបស់ថៃ»។
ឯកឧត្តមអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានសង្កត់ធ្ងន់ពីគោលជំហរឥតងាករេរបស់កម្ពុជាក្នុងការស្វែងរកដំណោះស្រាយនៃជម្លោះនេះថា «កម្ពុជាសូមអំពាវនាវឲ្យភាគីបង្ហាញនូវការតាំងចិត្តដ៏ពិតប្រាកដចំពោះដំណើរការស្វែងរកដំណោះស្រាយដោយសន្តិវិធី ដោយការចូលលរួមដ៏ពិតប្រាកដទៅក្នុងក្របខ័ណ្ឌច្បាប់ដែលភាគីទាំងពីរបានឯកភាពគ្នា បញ្ឈប់នូវអំពើជាឯកតោភាគី ហើយចូលរួមដោយស្ថាបនានៅក្នុងកិច្ចពិភាក្សាដោយផ្អែកទៅលើឯកសារដែលបានទទួលស្គាល់ទៅវិញទៅមករវាងភាគីទាំងពីរ។ កម្ពុជាបានបង្ហាញជាប់ជាប្រចាំនូវសុឆន្ទៈរបស់ខ្លួនក្នុងការចូលរួមដោយសុទ្ធចិត្តក្នុងការចចារជាមួយនឹងភាគីថៃ។ កម្ពុជាបានចូលរួមយ៉ាងពេញលេញនៅក្នុងការអនុវត្តនូវកិច្ចព្រមព្រៀងឈប់បាញ់។ កម្ពុជានៅតែបើកចំហរសម្រាប់កិច្ចសន្ទនាដោយស្មោះស្ម័គ្រ និងសូមគូសបញ្ជាក់ជាថ្មីម្ដងទៀតនូវការត្រៀមខ្លួនរបស់កម្ពុជាក្នុងការធ្វើការដោយជិតស្និទ្ធជាមួយនឹងភាគីថៃ ហើយនិងដៃគូអន្តរជាតិនានាដើម្បីធានាបាននូវដំណោះស្រាយយុត្តិធម៌ សន្តិវិធី និងស្ថិតស្ថេរ សម្រាប់ប្រជាជនទាំងពីរ»៕
