សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា តាមរយៈបណ្តាញសង្គមនៅរសៀលថ្ងៃទី៣០ ខែកក្កដា ឆ្នាំ២០២៥ បានថ្លែងអំណរអរគុណ ធនាគារកាណាឌីយ៉ា (CANADIA Bank) ដែលបានសម្រេចលុបចោលបំណុលជូនដល់យោធិនដែលបានចូលរួមក្នុងសមរភូមិការពារបូរណភាពទឹកដីកម្ពុជាដូចខាងក្រោម៖
១-យោធិនពលី ១០០%
២-យោធិនពិការ ១០០%
៣-យោធិនរងរបួស ៨០% ។
សូមជម្រាបជូនថា ការលុបចោលបំណុលនេះ គឺធ្វើឡើងស្របតាមការអំពាវនាវរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី និងតាមសេចក្ដីណែនាំរបស់ធនាគារជាតិនៃកម្ពុជា ស្តីពីវិធានការជួយសម្រាលបន្ទុកដល់ប្រជាជនដែលរងផលប៉ះពាល់ពីជម្លោះព្រំដែនកម្ពុជា-ថៃ នេះជាបង្ហាញពីស្មារតីសាមគ្គី ស្នេហាជាតិ និងវប្បធម៌ចែករំលែកដ៏ល្អផូរផង់របស់ប្រជាជាតិខ្មែរ ក្នុងការជួយគាំទ្រដល់ប្រជាជន និងប្រទេសជាតិរបស់ខ្លួនក្នុងកាលៈទេសៈដ៏លំបាកនេះ។
តាមរយៈស្មារតីរួមគ្នាជាធ្លុងមួយនេះរបស់គ្រឹះស្ថានធនាគារកាណាឌីយ៉ា និងធនាគារផ្សេងៗទៀត គឺជាការចូលចំណែកដ៏ធំមួយជាមួយ រាជរដ្ឋាភិបាលកម្ពុជា ជាពិសេស សម្តេចធិបតីតេជោ ហ៊ុន សែន និងសម្ដេចធិបតី ហ៊ុន ម៉ាណែត កងកម្លាំងប្រដាប់អាវុធគ្រប់លំដាប់ថ្នាក់ យោធិន នគរបាលជាតិ ដែលតែងយកចិត្តទុកដាក់នូវសុខមាលភាពប្រជាពលរដ្ឋ និងបូជាកម្លាំងកាយ ចិត្ត សាច់ស្រស់ ឈាមស្រស់ ក្នុងកិច្ចខិតខំប្រឹងប្រែង ការពារបូរណភាពដែនដី និង ស្វែងរកសន្តិភាពសម្រាប់ប្រជាជន និងប្រទេសជាតិ៕
