ថ្លែងនៅក្នុងសន្និសីទសារព័ត៌មាននៅវិមានសន្តិភាព ទីស្ដីការគណៈរដ្ឋមន្ត្រី នៅរសៀល ថ្ងៃអង្គារ ទី២៩ ខែកក្កដា ឆ្នាំ២០២៥ នេះ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានគូសបញ្ជាក់ថា រាជរដ្ឋាភិបាលកម្ពុជាច្រានចោលការចោទប្រកាន់ទាំងឡាយណាដែលថាកម្ពុជារំលោភបទឈប់បាញ់រវាងថៃ-កម្ពុជា ដែលធ្វើឡើងកាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡាស៊ី។
ឯកឧត្តមអ្នកនាំពាក្យបានលើកឡើងថា «ក្នុងនាមអ្នកនាំពាក្យរាជរដ្ឋាភិបាល ខ្ញុំសូមបញ្ជាក់ជូនពីគោលជំហរយ៉ាងម៉ឺងម៉ាត់របស់រាជរដ្ឋាភិបាលកម្ពុជាក្នុងការគោរពកិច្ចព្រមព្រៀងឈប់បាញ់គ្នាជាបន្ទាន់ ហើយនិងគ្មានលក្ខខណ្ឌ ដែលបានសម្រេចកាលពីថ្ងៃទី២៨ ខែកក្កដា ឆ្នាំ២០២៥ នៅក្នុងកិច្ចប្រជុំពិសេសនៅទីក្រុងគូឡាឡាំពួ ប្រទេសម៉ាឡេស៊ី ហើយដែលបានចូលជាធរមានកាលពីពាក់កណ្ដាលអាធ្រាត ម៉ោង២៤ យប់មិញនេះ»។
ឯកឧត្តម ប៉ែន បូណា បានបន្តថា «រាជរដ្ឋាភិបាលកម្ពុជាចាត់ទុកកិច្ចព្រមព្រៀងនេះថាមានតម្លៃជាសារវ័ន្តសម្រាប់ការថែរក្សាសន្តិភាពរវាងប្រទេសទាំងពីរ កម្ពុជា-ថៃ ក៏ដូចជាសន្តិភាពនិងស្ថិរភាពនៅក្នុងតំបន់។ ក្នុងនាមជាប្រទេសដែលស្រលាញ់សន្តិភាព និងគោរពច្បាប់អន្តរជាតិ រាជរដ្ឋាភិបាលកម្ពុជាបានគោរពកិច្ចព្រមព្រៀងនេះយ៉ាងខ្ជាប់ខ្ជួន និងបានណែនាំឲ្យកងកម្លាំងប្រដាប់អាវុធជួរមុខរបស់ខ្លួនទាំងអស់ស្ងប់ស្ងាត់ និងអត់ធ្មត់ខ្ពស់បំផុត។ ហើយជាលទ្ធផល យើងបានថែរក្សាភាពស្ងប់ស្ងាត់ចាប់តាំងពីពេលដែលបទឈប់បាញ់នេះចូលជាធរមាន រហូតមកទល់នឹងបច្ចុប្បន្ននេះ»។
ឯកឧត្តមអ្នកនាំពាក្យរាជរដ្ឋាភិបាលបានប្រកាសច្រានចោលរាល់ការចោទប្រកាន់ថាកម្ពុជាបានរំលោភបទឈប់បាញ់នេះ ដោយឯកឧត្តមបានសង្កត់ធ្ងន់ថា «អ្នកនាំពាក្យរាជរដ្ឋាភិបាលកម្ពុជាសូមបដិសេដចំពោះរាល់ព័ត៌មានទាំងឡាយណាដែលចោទប្រកាន់កម្ពុជាថាបានបំពានបទឈប់បាញ់។ អ្នកនាំពាក្យរាជរដ្ឋាភិបាលចាត់ទុកព័ត៌មានទាំងនោះថាជាព័ត៌មានមិនពិត ប្រឌិត ចោទប្រកាន់ ដែលមិនផ្ដល់ផលចំណេញទៅដល់ការថែរក្សាកិច្ចព្រមព្រៀងឈប់បាញ់ដែលប្រទេសទាំងពីរបានព្រមព្រៀងគ្នានោះឡើយ»។
អ្នកនាំពាក្យរាជរដ្ឋាភិបាលកម្ពុជារូបនេះបានបញ្ជាក់ពីសារៈសំខាន់នៃការគោរពកិច្ចព្រមព្រៀងនេះ ដោយឯកឧត្តមបានគូសរំលេចថា «ជាថ្មីម្ដងទៀតរាជរដ្ឋាភិបាលកម្ពុជាចាត់ទុកកិច្ចព្រមព្រៀងឈប់បាញ់ថាពិតជាមានសារៈសំខាន់ណាស់ ដែលត្រូវអនុវត្តឲ្យមានប្រសិទ្ធភាព ពីព្រោះវាមិនត្រឹមតែដើម្បីរក្សាសុខសន្តិភាពរវាងប្រទេសទាំងពី កម្ពុជានិងថៃ តែប៉ុណ្ណោះទេ ក៏ប៉ុន្តែក៏ដើម្បីធានានិរន្តរភាពនៃសុខសន្តិភាពនៅក្នុងតំបន់ឲ្យបានយូរអង្វែងផងដែរ»។
គួរបញ្ជាក់ថា បើតាមសេចក្ដីប្រកាសព័ត៌មានរួមស្ដីពីកិច្ចប្រជុំពិសេសស្វែងរកបទឈប់បាញ់ នៅទីក្រុងគូឡាឡាំពួ ដែលម៉ាឡេស៊ីធ្វើជាម្ចាស់ផ្ទះ កាលពីរសៀលថ្ងៃទី២៨ ខែកក្កដា ឆ្នាំ២០២៥ ភាគីថៃនិងកម្ពុជាបានឯកភាពគ្នាចំនួន៣ចំណុច គឺ៖
១. បទឈប់បាញ់ជាបន្ទាន់ និងគ្មានលក្ខខណ្ឌ ដែលមានប្រសិទ្ធភាពចាប់ពីម៉ោង២៤ (ម៉ោងក្នុងតំបន់) នៅថ្ងៃទី២៨ ខែកក្កដា ឆ្នាំ២០២៥។
២. រៀបចំកិច្ចប្រជុំក្រៅផ្លូវការនៃមេបញ្ជាការភូមិភាគ (យោធភូមិភាគទី១ និងទី២ ខាងថៃ និងយោធភូមិភាគទី៤ និងទី៥ ខាងកម្ពុជា) នៅវេលាម៉ោង ០៧:០០នាទី ថ្ងៃទី ២៩ ខែកក្កដា ឆ្នាំ២០២៥ ហើយជាបន្តមកទៀត ប្រសិនបើភាគីទាំងពីរឯកភាព នោះនឹងមានការជួបជាមួយក្រុមអនុព័ន្ធយោធានៃប្រទេសនានា ដឹកនាំដោយប្រធានអាស៊ាន។
៣. កោះប្រជុំគណៈកម្មាធិការព្រំដែនទូទៅ (GBC) នៅថ្ងៃទី ៤ ខែសីហា ឆ្នាំ២០២៥ ដែលកម្ពុជា នឹងធ្វើជាម្ចាស់ផ្ទះ។
សេចក្ដីប្រកាសព័ត៌មាននេះបានគូសបញ្ជាក់ថា រដ្ឋមន្ត្រីការបរទេស និងការពារជាតិនៃប្រទេសម៉ាឡេស៊ី កម្ពុជា និងថៃ ត្រូវបានណែនាំឲ្យបង្កើតយន្តការលម្អិតសម្រាប់ការអនុវត្ត ផ្ទៀងផ្ទាត់ និងរាយការណ៍អំពីបទឈប់បាញ់។ យន្តការនេះនឹងដើរតួជាគ្រឹះ ដើម្បីសន្តិភាព និងការទទួលខុសត្រូវដោយចីរភាព៕
