សម្ដេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានបញ្ជាក់ថា រាជរដ្ឋាភិបាល នឹងស្នើសុំធ្វើវិសោធនកម្មច្បាប់ស្តីពីកាតព្វកិច្ចយោធា ដែលនឹងចាប់ផ្តើមអនុវត្តចាប់ពីឆ្នាំ២០២៦ តទៅ។ សម្តេចធិបតី បានបន្តថា នៅក្នុងច្បាប់ចាស់កំណត់រយៈពេលកាតព្វកិច្ចយោធា ១៨ខែ ត្រូវកែប្រែទៅជា ២៤ខែ ផងដែរ។
ក្នុងពិធីអបអរសាទរខួបលើកទី៣២ ទិវាបង្កើតកងរាជអាវុធហត្ថ (១៤ កក្កដា ១៩៩៣ – ១៤ កក្កដា ២០២៥) នៅខេត្តកំពង់ឆ្នាំង នាព្រឹកថ្ងៃទី១៤ ខែកក្កដា ឆ្នាំ២០២៥ សម្ដេចធិបតី ហ៊ុន ម៉ាណែត បានថ្លែងថា ច្បាប់ស្តីពីកាតព្វកិច្ចយោធា នឹងផ្តល់ផលប្រយោជន៍ដល់ប្រទេសជាតិយើងចំនួន៣ចំណុចធំៗរួមមាន៖ ទី១- ជួយបង្កើនបរិមាណសាច់ទ័ព ទី២- ជួយបង្កើនប្រសិទ្ធភាពក្នុងការបំពេញសាច់ទ័ព និងទី៣- ជួយពលរដ្ឋឱ្យក្លាយជាមនុស្សមានវិន័យសណ្តាប់ធ្នាប់។
សម្ដេចធិបតី ហ៊ុន ម៉ាណែត ក៏បានសង្កត់ធ្ងន់ថា ក្រោយពេលបញ្ចប់កាតព្វកិច្ចរយៈពេល២ឆ្នាំ ពលរដ្ឋអាចមានសិទ្ធិចូលទៅបម្រើការងារសង្គម ឬមួយអាចចូលជាកងទ័ពពេញសិទ្ធិផងដែរ៕
