ជុំវិញការផ្ទុះអាវុធនៅតំបន់ព្រំដែនមុំបី ស្ថិតក្នុងខេត្តព្រះវិហារ កាលពីថ្ងៃទី២៨ ខែឧសភាម្សិលមិញ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា មិនជឿថាវាកើតឡើងពីបន្ទាត់នយោបាយរបស់រាជរដ្ឋាភិបាលថៃ ឬនាយករដ្ឋមន្រ្ដីថៃ ឬក្រសួងការពារជាតិថៃ ដែលអនុញ្ញាតឱ្យធ្វើបែបនេះនោះទេ។ អ្វីដែលជាកត់សម្គាល់របស់សម្ដេចតេជោ រឿងនេះគឺវាកើតឡើងដោយបុគ្គល ឬអង្គភាពនៅខាងក្រោមដែលធ្វើរឿងនេះ។
ក្នុងឱកាសថ្លែងសារពិសេសក្នុងសម័យប្រជុំលើកទី៣ ព្រឹទ្ធសភានីតិកាលទី៥ នៅព្រឹកថ្ងៃទី២៩ ខែឧសភា ឆ្នាំ២០២៥នេះ សម្ដេចតេជោ បានគូសបញ្ជាក់ថា ហេតុការណ៍នេះបានកើតឡើងចាប់ផ្ដើមវាយឆ្មក់ពីព្រលឹមស្រាងៗរហូតដល់ម៉ោង ៦ល្ងាច ក៏ដកកម្លាំងទៅវិញ ប្រសិនបើនេះជាគោលការណ៍របស់រដ្ឋាភិបាលប្រហែលមិនដកទ័ពទៅវិញនោះទេ អ៊ីចឹងច្បាស់ណាស់ថា វាមិនមែនជាបន្ទាត់នយោបាយរបស់រាជរដ្ឋាភិបាលថៃ ឬក្រសួងការពារជាតិថៃ នោះទេ គឺវាប្រាកដជាកើតឡើងពីបុគ្គលឬអង្គភាពមួយ៕
