ក្នុងឱកាសនៃការស្នាក់អាស្រ័យបំពេញការងារនៅខេត្តស្ទឹងត្រែង នៅរសៀលថ្ងៃទី១៦ សីហានោះដែរសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជួបសំណេះសំណាលជា មួយ ថ្នាក់ដឹកនាំ មន្រ្តីរាជការ និងកម្លាំងប្រដាប់អាវុធ មកពីគ្រប់មន្ទីរ អង្គភាពនានាជុំវិញខេត្តស្ទឹងត្រែង។
នៅក្នុងពិធី ដែលប្រារព្វធ្វើឡើងនៅសាលាខេត្តស្ទឹងត្រែង ឯកឧត្តម មុំ សារឿន អភិបាលនៃគណៈអភិបាលខេត្តស្ទឹងត្រែង មានប្រសាសន៍ជំរាបជូន សម្តេចតេជោ នាយករដ្ឋមន្រ្តី ពីសកម្មភាព នៃការងារបង្កបង្កើតផលស្រូវរដូវវស្សាឆ្នាំ២០១៧ និងសភាពការណ៍ការងារមួយចំនួន ដែលទាក់ទិនទៅនិងបញ្ហាសន្តិសុខ សណ្តាប់ធ្នាប់សាធារណះ ចាប់តាំងពីក្រោយការបោះឆ្នោតក្រុមប្រឹក្សាឃុំ សង្កាត់អាណត្តិទី៤ឆ្នាំ២០១៧ ដែលបានបញ្ចប់ទៅប្រកបដោយលទ្ធផលដ៏ត្រចះត្រចង់ កាលពីខែមិថុនា កន្លងទៅ។ ឯកឧត្តមអភិបាល នៃគណៈអភិបាលខេត្តក៏បានជំរាបជូន សម្តេចតេជោនាយករដ្ឋមន្រ្តី ពីបញ្ហាសន្តិសុខនៅតាមបណ្តោយព្រំដែនកម្ពុជា-ឡាវ ក្នុងភូមិសាស្រ្តខេត្តស្ទឹងត្រែង រហូតមកដល់ថ្ងៃទី១៦ សីហានេះ មានភាពល្អប្រសើរឡើងវិញ បន្ទាប់ពីកងទ័ពឡាវដកចេញពីទឹកដីកម្ពុជា កាលពីវេលាម៉ោងប្រមាណ១៧ល្ងាច ថ្ងៃទី១២ សីហា ក្រោយពេលដែលសម្តេចបានជួបចរចាដោយផ្ទាល់ជាមួយ ឯកឧត្តមនាយករដ្ឋមន្រ្តីឡាវ ក្នុងទីក្រុងវៀងច័ន្ទ ប្រទេសឡាវរួចមកនោះ។
នៅចំពោះមុខថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ ខេត្តស្ទឹងត្រែង សម្តេចតេជោ នាយករដ្ឋមន្រ្តី មានប្រសាសន៍ថា សម្តេចគ្រោងនឹងធ្វើដំណើរតាមឧទ្ធម្ភាគចក្រត្រឡប់មកកាន់ រាជធានីភ្នំពេញវិញ កាលពីវេលារសៀលថ្ងៃនេះវិញហើយ ប៉ុន្តែដោយសារតែមានភ្លៀង គឺមិនអនុញ្ញាតឲ្យរូបសម្តេចធ្វើដំណើរមកកាន់រាជធានីភ្នំពេញ វិញបាន។ សម្តេចបន្តថា សម្តេចសុំស្នាក់នៅខេត្តស្ទឹងត្រែង១យប់ ហើយរសៀលនេះសម្តេចក៏ដាក់កម្មវិធីជួបសំណេះ សំណាលជាមួយថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធខេត្តស្ទឹងត្រែងនៅពេលនេះ។
សម្តេចបន្តថា នៅទី កន្លែងនេះ សម្តេចធ្លាប់ជួបនិងធ្វើការដោះស្រាយជាមួយបងប្អូនអាជីវករខេត្តស្ទឹងត្រែង ដោយមានការលំបាក់ខ្លាំងណាស់ បើទោះបីជារូបសម្តេចបានចំណាយថវិកាផ្ទាល់ខ្លួនកសាងជូនបងប្អូនអាជីវករក៏ពិតមែន ប៉ុន្តែមានការលំបាក់ ពីការទាមទាររបស់បងប្អូនអាជីវករ។ សម្តេចតេជោក៏បានថ្លែងដែរថា នៅថ្ងៃស្អែកសម្តេចមានកម្មវិធីចុះទៅកាន់គោលដៅចំនួន៣កន្លែងក្នុងខេត្តស្ទឹងត្រែង មុនពេលធ្វើដំណើរមកកាន់រាជធានីភ្នំពេញ។ ជាមួយនិងការថ្លែងនោះដែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍សំដែង នូវការវាយតម្លៃខ្ពស់និងកោតសរសើរ ជូនចំពោះថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ ខេត្តស្ទឹងត្រែង ដែលបានចូលរួមអនុវត្តយ៉ាងខ្ជាប់ខ្ជួន តាមតួនាទីភារកិច្ចរៀងៗខ្លួន ក្នុងអនុវត្តនូវកម្មវិធីនយោបាយ និងយុទ្ធសាស្រ្ត ចតុកោណ ដំណាក់កាលទី៣ របស់រាជរដ្ឋាភិបាល ដើម្បីកំណើន សមធម៌ និងប្រសិទ្ធភាពការងារនៅកម្ពុជា។ ជាមួយ និងការថ្លែងនោះដែរ សម្តេចតេជោ នាយករដ្ឋមន្រ្តីមានប្រសាសន៍សំដែងនូវការវាយតម្លៃខ្ពស់ និងកោតសរសើរផងដែរ ចំពោះថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋខេត្តស្ទឹងត្រែង ដែលបានចូលរួមថែរក្សាបាន សន្តិសុខ សុវត្តិភាព ស្ថេរភាពនយោបាយ និងសន្តិសុខសណ្តាប់ធ្នាប់សសង្គម ចាប់តាំងពីក្រោយការបោះឆ្នោតជ្រើស រើសក្រុមប្រឹក្សាឃុំ សង្កាត់ អណត្តិទី៤ ឆ្នាំ២០១៧ ដែលបានបញ្ចប់ទៅប្រកបដោយលទ្ធផលដ៏ត្រចះត្រចង់ កាលពីពេលថ្មីៗកន្លងទៅ។
សម្តេចតេជោ នាយករដ្ឋមន្រ្តីមានប្រសាសន៍សង្កត់ធ្ងន់ថា កន្លងមកទាំងប្រមុខរាជរដ្ឋាភិបាល ក៏ដូចជាថ្នាក់ដឹកនាំគ្រប់ក្រសួងស្ថាប័ន និងមន្រ្តីមានសមត្ថកិច្ចពាក់ព័ន្ធទាំងអស់ បានខិតខំថែរក្សាយ៉ាងប្តូរផ្តាច់នូវសុខសន្តិភាព ស្ថេរភាពនយោបាយ សំដៅធ្វើយ៉ាងណាជំរុញល្បឿន នៃកំណើនសេដ្ឋកិច្ច និងការអភិវឌ្ឍសេដ្ឋកិច្ច សង្គម កម្ពុជា ឲ្យកាន់តែល្អប្រសើរទ្វេឡើងថែមទៀត។ នៅក្នុងពិធីសំណេះសំណាលគ្នានោះដែរ សម្តេចតេជោនាយករដ្ឋមន្រ្តី មានប្រសាសន៍អំពាវនាវដល់ថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋខេត្តស្ទឹងត្រែងទាំងអស់ ត្រូវចូលរួមថែរក្សាការពារឲ្យខានតែបាន នូវសុខសន្តិភាព ស្ថេរភាពនយោបាយ ដែលយើងទាំងអស់គ្នាបាន ខិតខំរកបានដោយកម្រ ក្នុងរយៈពេលជាង៣៨ឆ្នាំកន្លងមក។ ជាមួយគ្នានេះ សម្តេចតេជោ នាយករដ្ឋមន្រ្តីក៏បានធ្វើការ អំពាវនាវផងដែរ ជូនដល់ថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋខេត្តស្ទឹងត្រែង ត្រូវបន្ត បង្កើនកិច្ចសហប្រតិបត្តិការឲ្យកាន់តែជិតស្និទ្ធ ជាមួយនិងថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ និងប្រជា ពលរដ្ឋនៃប្រទេសជិតខាង ឡាវ។
សម្តេចតេជោមានប្រសាសន៍សង្កត់ធ្ងន់ថា កន្លងមកបើទោះបីជាមានបញ្ហាកើតឡើងបន្តិចបន្តួច នៅតាមតំបន់ព្រំដែននៃប្រទេសទាំងពីរកម្ពុជា ឡាវ ក៏ពិតមែន ប៉ុន្តែសម្តេចបានធ្វើការដោះស្រាយ បញ្ចប់ជាមួយនិង ឯកឧត្តម នាយករដ្ឋមន្រ្តីឡាវ ថងលួន ស៊ីសូលីត ដោយមិនទុកឲ្យមានការពង្រីកជម្លោះ ពោលគឺ យើងខិតខំដោះស្រាយបញ្ចប់ជម្លោះ ដើម្បីឈានទៅបង្កើនកិច្ចសហប្រតិបត្តិការ និងការអភិវឌ្ឍសម្រាប់ប្រទេសទាំងពីរ ពិសេសការសន្យារួមគ្នាក្នុងការប្រែក្លាយតំបន់ព្រំដែន នៃប្រទេសទាំងពីរ ឲ្យក្លាយជាព្រំដែនសន្តិភាព ការផ្លាស់ប្តូរ ពាណិជ្ជកម្ម សេដ្ឋកិច្ច ទេសចរណ៍ វប្បធម៌ ការតភ្ជាប់ប្រព័ន្ធគមនាគមន៍ និងការតភ្ជាប់រវាងប្រជាជននិងប្រជាជន ក៏ ដូចជាភ្ញៀវទេសចរណ៍ជាតិ អន្តរជាតិ៕
