លេខាធិការដ្ឋាននៃគណៈកម្មាធិការជាតិសម្របសម្រួលកិច្ចការព័ត៌មាននិងសាធារណមតិ (គ.ស.ព.ស.) នៅរសៀលថ្ងៃទី២៧ ខែកុម្ភៈ ឆ្នាំ២០២៥ បានបញ្ជាក់ថា ថ្មីៗនេះ មានការបង្ហោះផ្សាយវីដេអូស្ដីពីការរុះរើតូបលក់ទំនិញ ដែលនេះមិនមែនជាព្រឹត្តិការណ៍នៅប្រទេសកម្ពុជានោះឡើយ គឺជាករណីដែលបានកើតឡើងនៅក្នុងប្រទេសប៉ាគីស្ថាន។
លេខាធិការដ្ឋាន គ.ស.ព.ស. ក៏បានគូសបញ្ជាក់ថា ការផ្សព្វផ្សាយវីដេអូស្ដីពីការរុះរើតូបលក់ទំនិញនេះ គ្រាន់តែបង្ហាញមួយជ្រុងនៃវីដេអូដើមដែលបានកើតឡើងនៅក្នុងប្រទេសប៉ាគីស្ថានកាលពីខែមករា ឆ្នាំ២០២៥ ក្នុងគោលបំណងធ្វើឲ្យសាធារណៈជនយល់ច្រឡំថាជាព្រឹត្តិការណ៍នៅក្នុងប្រទេសកម្ពុជាយើង។ ការផ្សព្វផ្សាយបែបនេះមានគោលបំណងទុច្ចរិតធ្វើឲ្យប្រជាពលរដ្ឋមានការយល់ច្រឡំមកលើអាជ្ញាធរក៏ដូចជាចោទប្រកាន់មកលើរាជរដ្ឋាភិបាល។
ដូចនេះ សូមបងប្អូនប្រជាពលរដ្ឋកុំជឿតាមខ្លឹមសារទាំងអស់ដែលបានបង្ហោះផ្សាយនេះ និងសូមកុំចែករំលែកបន្ត៕
