យោងតាមសេចក្តីប្រកាសព័ត៌មានស្ដីពីលទ្ធផលកិច្ចប្រជុំផ្លូវការលើកទីមួយរបស់ក្រុមប្រឹក្សាអភិវឌ្ឍន៍កម្ពុជាចុះថ្ងៃទី២៣ ខែធ្នូ ឆ្នាំ២០២៤ បានឲ្យដឹងថា ធៀបនឹងឆ្នាំ 2023 នៅក្នុងឆ្នាំ 2024 នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន 414 គម្រោង (កើនឡើងចំនួន 146 គម្រោងឬ 54%) មានទុនវិនិយោគ 6,900 លានដុល្លារអាមេរិក (កើនឡើង 1,973 លានដុល្លារអាមេរិកឬ 40%) ដែលអាចបង្កើតការងារសរុបប្រមាណ 33 ម៉ឺនកន្លែងក្នុងនោះគម្រោងវិនិយោគលើវិស័យឧស្សាហកម្មមានអត្រាខ្ពស់ជាងគេរហូតដល់ 69%។
តាមសេចក្តីប្រកាសព័ត៌មានដដែលនោះដែរ បានឱ្យដឹងថា ចំពោះការងារកិច្ចសហប្រតិបត្តិការអភិវឌ្ឍន៍ដោយមានទំនុកចិត្តពីសហគមន៍អន្តរជាតិលើភាពជាម្ចាស់របស់រាជរដ្ឋាភិបាលកម្ពុជា ក្នុងឆ្នាំ 2024 ប្រហាក់ប្រហែលនឹងឆ្នាំ2023 ដែរ កម្ពុជា ទទួលបានហិរញ្ញប្បទានសហប្រតិបត្តិការប្រមាណ 2,100 លានដុល្លារអាមេរិកក្នុងនោះ 40% ជាហិរញ្ញប្បទានឥតសំណង និង 60%ជាឥណទានសម្បទាន។ ភាគច្រើននៃហិរញ្ញប្បទាន ត្រូវបានប្រើប្រាស់ក្នុងវិស័យហេដ្ឋារចនាសម្ព័ន្ធប្រមាណ 22% និងវិស័យសេដ្ឋកិច្ចនិងសង្គមកិច្ច ប្រមាណ 25%។
សូមជម្រាបជូនថា ក្រុមប្រឹក្សាអភិវឌ្ឍន៍កម្ពុជា ជាស្ថាប័នប្រតិបត្តិ ដែលត្រូវបានបង្កើតឡើងនៅឆ្នាំ1994 បំពេញមុខងារជាសេនាធិការ និងជាច្រកចេញចូលតែមួយរបស់រាជរដ្ឋាភិបាលលើបេសកកម្មដឹកនាំនិងគ្រប់គ្រងកិច្ចសហប្រតិបត្តិការអភិវឌ្ឍន៍ ការវិនិយោគឯកជន និងតំបន់សេដ្ឋកិច្ចពិសេស៕
