នៅក្នុងពិធីបើកការដ្ឋានសាងសង់ អគារមជ្ឈមណ្ឌលកណ្តាល អគារចំណត រោងជាង និង អគារវេជ្ជសាស្ត្រស៊ីក្លូត្រុង នៃមន្ទីរពេទ្យកាល់ម៉ែត នៅព្រឹកថ្ងៃទី១៦ ខែកញ្ញា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាល ក៏បានដាក់ចេញនូវផែនទីបង្ហាញផ្លូវទៅកាន់ការគ្របដណ្តប់សុខភាពជាសកលនៅកម្ពុជា ឆ្នាំ២០២៤-២០៣៥ នៅខែឧសភា ឆ្នាំ២០២៤ ដែលមានគោលដៅចំនួន៣។
សម្តេចធិបតី ហ៊ុន ម៉ាណែត បានគូសបញ្ជាក់ថា គោលដៅទាំង៣នោះរួមមាន៖ ទី១- គឺការពង្រីកវិសាលភាពគ្របដណ្តប់ពលរដ្ឋដោយប្រព័ន្ធគាំពារសង្គមឱ្យបាន៨០%នៃចំនួនពលរដ្ឋសរុប ទី២- សន្ទស្សន៍នៃការគ្របដណ្តប់សេវាសុខាភិបាលសារវន្តឱ្យបានយ៉ាងហោចណាស់ ៨០% ទី៣- ការកាត់បន្ថយកម្រិតចំណាយពីហោប៉ៅផ្ទាល់លើការថែទាំសុខភាពឱ្យនៅចំនួន៣៥% នៃចំណាយសរុបលើការថែទាំសុខភាព។
សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ដើម្បីឆ្ពោះទៅសម្រេចគោលនយោបាយខាងលើនេះ រាជរដ្ឋាភិបាល បានអនុវត្តន៍វិធានគន្លឹះ៣ក្នុងវិស័យសុខាភិបាល ដើម្បីលើកកម្ពស់គុណភាពសេវាសុខាភិបាល និងពង្រឹងសមត្ថភាពផ្តល់សេវាសុខាភិបាល បឋមនៅមូលដ្ឋានដោយផ្តោតជាចម្បងលើ៖
ទី១- ការពង្រឹងសមត្ថភាពផ្តល់សេវានៅមូលដ្ឋានសុខភាព មណ្ឌលសុខភាព និងមន្ទីរពេទ្យបង្អែក។
ទី២- ការអភិវឌ្ឍន៍សមត្ថភាពស្ថាប័នសុខាភិបាល គ្រប់លំដាប់ថ្នាក់ នៅក្នុងការគ្រប់គ្រងធនធានមនុស្ស និងហិរញ្ញវត្ថុ ការងារនិយ័តកម្ម ការងារឆ្លើយតបចំពោះការគំរាមកំហែងសុខភាពសាធារណៈ និងគ្រោះអាសន្នសុខភាព ព្រមទាំងការលើកកម្ពស់ប្រសិទ្ធភាពនៃកិច្ចដំណើរការ មុខងារស្ថាប័ន។
ទី៣- ការកសាងភាពជាដៃគូរឹងមាំក្នុងវិស័យសុខាភិបាលសាធារណៈ-ឯកជន ដើម្បីធានាថាប្រជាជនគ្រប់រូប ត្រូវទទួលបានសេវាថែទាំសុខភាព មានគុណភាព សុវត្ថិភាព និងប្រសិទ្ធភាពខ្ពស់៕
