ក្នុងឱកាសចុះបំពេញការងារ ឯកឧត្តម ប៊ិន ឈិន ឧបនាយករដ្ឋមន្រ្ដីប្រចាំការ រដ្ឋមន្រ្ដីស្ដីទីទទួល បន្ទុកទីស្ដីការគណៈរដ្ឋមន្រ្ដី ជាប្រធានក្រុមការងារថ្នាក់ជាតិចុះជួយខេត្តតាកែវ បានអញ្ជើញជួបសំណេះសំណាលជាមួយអាជ្ញាធរដែនដី ខេត្ត ក្រុង -ស្រុកនិងក្តាប់សំណូមពរផ្សេងៗ ដើម្បីធ្វើការដោះស្រាយសំរាប់ការកសាង និងអភិវឌ្ឍន៍ខេត្តតាកែវ ឲ្យមានការរីកចំរើន។ ពិធីនេះបានប្រព្រឹត្តទៅដោយមានការចូលរួមពីសំណាក់ ឯកឧត្តម លោកជំទាវ ប្រធានក្រុមការងារថ្នាក់ជាតិចុះជួយតាមបណ្តាក្រុង-ស្រុកទូទាំងខេត្ត ឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រី ជាអភិបាលរងខេត្ត ព្រមទាំង អាជ្ញាធរដែនដីក្រុង -ស្រុក ឃុំសង្កាត់ប្រមាណជាង៤០០នាក់។
បន្ទាប់ពី ឯកឧត្តម គិន ណែត សមាជិកក្រុមប្រឹក្សាខេត្តតាកែវ រាយការណ៏អំពីសភាពការណ៏សន្ដិសុខ នយោបាយ សេដ្ឋកិច្ច សង្គមក្នុងបណ្ដាឆ្នាំកន្លងទៅ អនុវត្តតាមគោលនយោបាយរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា ជាប្រមុខដឹកនាំ ខេត្តបានខិតខំប្រឹងប្រែងសម្រេចបញ្ហាប្រឈមនានា ដោយរក្សាបាន សន្ដិសុខ សុវត្ថិភាព ស្ថេរភាពសង្គម សណ្ដាប់ធ្នាប់ សាធារណៈបានល្អប្រសើរ មានការអភិវឌ្ឍន៍រីកចម្រើនលើគ្រប់វិស័យរួចមក។
ឯកឧត្តម ឧបនាយករដ្ឋមន្ត្រី ប្រចាំការ ប៊ិន ឈិន បានកោតសរសើរចំពោះស្មារតីយកចិត្តទុកដាក់របស់ ឯកឧត្តម លោកជំទាវ ក្រុមការងារថ្នាក់ជាតិចុះជួយខេត្តតាកែវ និង ថ្នាក់ដឹកនាំខេត្ត ក្រុង-ស្រុក ព្រមទាំងអាជ្ញាធរដែនដី ដែលកន្លងមកនេះ បានខិតខំបំពេញភារកិច្ចរបស់ខ្លួនបានល្អ ពិសេសការធានាសន្ដិសុខសណ្ដាប់ ធ្នាប់ជូនប្រជាពលរដ្ឋ ក្នុងដែនសមត្ថកិច្ចរបស់ខ្លួន។ ក្នុងពិធីសំណេះសំណាលនេះដែរ ឯកឧត្តម ប្រធានក្រុមការងារថ្នាក់កណ្តាលចុះជួយខេត្តតាកែវ បានណែនាំដល់ថ្នាក់ដឹកនាំខេត្ត និងអស់លោកនៅតាមបណ្តាក្រុង-ស្រុក ត្រូវខិតខំបំពេញបេសសកម្មនៅមូលដ្ឋាន ហើយត្រូវលើកកំពស់កិច្ចសហការសម្របសម្រួលក្នុងការដោះស្រាយបញ្ហានានា ដើម្បីបំរើផលប្រយោជន៍ ជូនប្រជាពលរដ្ឋនៅមូលដ្ឋា ននិងធ្វើការផ្សព្វផ្សាយឲ្យបានទូលំទូលាយដល់ស្រទាប់ប្រជាពលរដ្ឋ នូវកម្មវិធីនយោបាយយុទ្ធសាស្រ្តចតុកោណ ផែនការយុទ្ធសាស្រ្តអភិវឌ្ឍន៍ជាតិ គោលនយោបាយភូមិ-ឃុំ មានសុវត្ថិភាព កម្មវិធីនយោបាយតាមវិស័យ ក៏ដូចជាសភាពការណ៍រួមរបស់ប្រទេសជាតិ។ ហើយគ្រប់កាលៈទេសៈ អាជ្ញាធរដែនដីគ្រប់លំដាប់ថ្នាក់ ត្រូវតែសកម្មក្នុងការបំពេញតួនាទីភារកិច្ចរបស់ខ្លួន បង្កើតនូវសមិទ្ធិផលថ្មីៗបន្ថែមទៀត ក្នុងការអនុវត្ត នូវកម្មវិធីនយោបាយ និងយុទ្ធសាស្ត្រដំណាក់កាលទី៣ របស់រាជរដ្ឋាភិបាល ហើយយកចិត្តទុកដាក់ ស្វែងយល់ និងចែករំលែកឲ្យគ្នាទៅវិញទៅមកនូវបទពិសោធន៍ នៃការអនុវត្តការងារ និងកំណត់បានអំពីចំណុចសកម្ម ចំណុចខ្វះខាត បញ្ហាប្រឈម និងដាក់ចេញវិធានការដោះស្រាយជូនបងប្អូនប្រជាពលរដ្ឋនៅតាមមូលដ្ឋានភូមិ-ឃុំ ដែលក្រុមការងារថ្នាក់ជាតិបានចុះជួយ ស្របទៅតាមគោលនយោបាយរបស់រាជរដ្ឋាភិបាល ឈានទៅកសាងគ្រប់វិស័យ នៅតាមតំបន់ជនបទឲ្យមានការអភិវឌ្ឍន៍រីកចំរើនក្នុងសង្គម ក៏ដូចជាឈានទៅកាត់បន្ថយភាពក្រីក្ររបស់ប្រជាពលរដ្ឋនៅទូទាំងប្រទេស។
ជាងនេះទៀត អាជ្ញាធរខេត្ត ស្រុក ឃុំ-សង្កាត់ ត្រូវស្តាប់សំណូមពរ និង សំណើររបស់ប្រជាពលរដ្ឋ ព្រមទាំងយកចិត្តទុកដាក់ដោះស្រាយនូវរាល់សំណូមពរ និង សំណើរទាំងឡាយដោយផ្អែកលើច្បាប់ និងលិខិតបទដ្ឋានកិតិយុត្តនានា ហើយត្រូវផ្សព្ធផ្សាយ និងអនុវត្តនូវរាល់បញ្ជាដែល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដោះស្រាយជូនប្រជាពលរដ្ឋ ដូចជាការធ្វើអត្តសញ្ញាណប័ណ្ណ មិនយកប្រាក់ពីប្រជាពលរដ្ឋ ការធ្វើសំបុត្រកំណើត សំបុត្រអាពាហ៍ពិពាហ៍ សំបុត្រមរណៈភាព ។ល។ មិនត្រូវយកភាស៊ីពីការ លក់ ដូរតាមល្អី កញ្ជើនិង កញ្ច្រែង។ អនុវត្តការមិនយកពន្ធលើដីកសិកម្មរបស់កសិករ ដែលបង្កបង្កើនផលជា លក្ខណៈគ្រួសារ ទន្ទឹមការតម្លើងប្រាក់ឈ្នួលអប្បបរិមា កម្មករក៏ទទួលបានប្រយោជន៏ពីការបញ្ចុះតម្លៃភ្លើងអគ្គិសនី និងទឹក និងបេឡាសន្តិសុខសង្គម ដូចជា ការធានារ៉ាប់រងគ្រោះថ្នាក់ការងារ សុខភាព និងប្រាក់សោធននិវត្តន៏។ ចំពោះអាជីវករលក់ដូរតាមផ្សារ ដែលស្ថិតលើទីតាំងដីរបស់រដ្ឋ អាចផ្ទេរសិទ្ទិកាន់កាប់ប្រើប្រាស់និង អាស្រ័យផលទៅកូនចៅ រឺ អ្នកដ៏ទៃបានដោយមិនកំណត់អាណត្តិ។ ករណីទាំងអស់ខាងលើអាជ្ញាធរគ្រប់លំដាប់ថ្នាក់ ត្រូវត្រួតពិនិត្យ ដើម្បីឪយមានការអនុវត្តជាក់ស្តែង សំរាប់ជាប្រយោជន៍ដល់ប្រជាពលរដ្ឋ។
បន្ទាប់មកក្នុងថ្ងៃដដែលឯកឧត្តម ប៊ិន ឈិន ឯកឧត្តម លោកជំទាវ រួមដំណើរ បានអញ្ជើញចូលរួមក្នុងពិធីបួងសួង សុំសេចក្តីសុខនិង រំលឹកគុណចំពោះបារមីដ៍សក្តិសិទ្ធរបស់លោកតាកែវ ដោយបាននាំយកគ្រឿងដង្វាយជាច្រើនមុខ ដើម្បីថ្វាយចំពោះលោកតាកែវ និងអស់លោក ដែលមានមហិទ្ធិឫទ្ធិជ័យ ចេស្តាបារមី ដែលថែរក្សាទឹកដីខេត្តតាកែវ សូមជួយប្រោសព្រំ ពរជ័យ សិរីសួរស្តី ជូនដល់ថ្នាក់ដឹកនាំ មន្ត្រីរាជការ និងបងប្អូនប្រជាពលរដ្ឋនៅទូទាំងប្រទេស។
