សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាបានថ្លែងថា រាជរដ្ឋាភិបាលនៅតែបន្តចាត់ទុកវិស័យកសិកម្មជាវិស័យអាទិភាពមួយដ៏សំខាន់ ដែលចូលរួមចំណែកយ៉ាងសំខាន់នៅក្នុងសន្តិសុខស្បៀង កំណើនសេដ្ឋកិច្ច ការកាត់បន្ថយភាពក្រីក្រ ដោយរក្សាតុល្យភាពរវាងការអភិវឌ្ឍ និងការអភិរក្ស។
សម្តេចធិបតី ហ៊ុន ម៉ាណែត បានថ្លែងបន្តថា ជាក់ស្តែង តាមរយៈគោលនយោបាយរបស់រាជរដ្ឋាភិបាលជាបន្តបន្ទាប់ប្រកបដោយប្រសិទ្ធភាព វិស័យកសិកម្មកម្ពុជាបន្តរីកចម្រើនរឹងមាំ និងរួមចំណែកយ៉ាងសំខាន់នូវការបន្ធូរបន្ថយផលប៉ះពាល់ជាអវិជ្ជមានលើសេដ្ឋកិច្ចកម្ពុជា ជាពិសេសធានានូវសន្តិសុខស្បៀង បញ្ជៀសបាននូវវិបត្តិស្បៀងអាហារ និងកាត់បន្ថយអតិផរមានៃតម្លៃស្បៀងក្នុងប្រទេស ទោះបីជាស្ថានភាពពិភពលោកជួបប្រទះនូវវិបត្តិជាបន្តបន្ទាប់ក៏ដោយ។
សម្តេចធិបតី ហ៊ុន ម៉ាណែត បានថ្លែងដូចនេះនៅក្នុងឱកាសដែលសម្តេចអញ្ជើញជាអធិបតី «ទិវាមច្ឆាជាតិនៅស្រុកកំពង់សៀមខេត្តកំពង់ចាម» នៅព្រឹកថ្ងៃចន្ទ ទី០១ ខែកក្កដា ឆ្នាំ២០២៤៕
