សម្តេចតេជោ ហ៊ុន សែន ឆ្លើយតបទៅលោក David Hutt ដែលថា សម្តេចភ័ន្តច្រឡំថាបានជួបជាមួយនាយក CIA

យោងតាមសារដែលបានបង្ហោះនៅលើបណ្តាញសង្គមផ្ទាល់ខ្លួន នារាត្រីថ្ងៃទី១២ ខែមិថុនា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានឧត្តមក្រុមប្រឹក្សាព្រះមហាក្សត្រ បានទម្លាយចេញនូវព័ត៌មានសំខាន់មួយ ដើម្បីឆ្លើយតបទៅកាន់លោក David Hutt ដែលបានសរសេរព័ត៌មានចុះផ្សាយនៅលើកាសែត The Diplomat កាលពីថ្ងៃ១២ ខែមិថុនា ឆ្នាំ២០២៤ កន្លងទៅនេះ ដោយបានសរសេរចោទប្រកាន់ថា លោក Bill Burns នាយក CIA មិនបានជួបជាមួយសម្ដេច ហ៊ុន សែន ទេ។

សម្ដេចតេជោបានបង្ហោះសារឆ្លើយតបទៅវិញ ដោយមានខ្លឹមសារទាំងស្រុងថា៖

ដើម្បីឆ្លើយតបតាមអ្វីដែលលោក David Hutt លើកឡើងសំដៅថា ខ្ញុំភ័ន្តច្រឡំ, ខ្ញុំគួរតែនិយាយដោយចំហរថា ខ្ញុំបានធ្វើការជាមួយថ្នាក់ដឹកនាំ CIA តាំងតែពីឆ្នាំ១៩៩៧មកម្ល៉េះ។

ជំនួបដែលសំខាន់គឺនាយកចារកម្មជាតិ (National Intelligence) លោក James Clapper ជួបឆ្នាំ២០១១ នៅផ្ទះរាជធានីភ្នំពេញ។ ឆ្នាំ២០១២ ជួបជាមួយ នាយក CIA លោក David Patraeus នៅផ្ទះរាជធានីភ្នំពេញ និងជំនួបចុងក្រោយជាមួយនាយក CIA លោក Bill Burns ឆ្នាំ២០២៤ នៅផ្ទះទីក្រុងតាខ្មៅ។ករណីមិនមានការជួបគ្នាផ្ទាល់ ខ្ញុំក៏បញ្ជូនតំណាងរបស់ខ្ញុំទៅជួបថ្នាក់ដឹកនាំ CIA នៅទីក្រុងវ៉ាស៊ីនតោន រាប់ទាំងលោក Mike Pompeo ដែលក្រោយមកក្លាយជារដ្ឋមន្ត្រីការបរទេសរបស់អាមេរិក ជំនាន់ប្រធានាធិបតី ដូណាល់ ត្រាំ។

កិច្ចសហការសំខាន់របស់យើង គឺប្រឆាំងភេវរកម្ម ដែលមិនមែនជាកិច្ចសហការប្រឆាំងប្រទេសមួយណាឡើយ។ កម្ពុជាក៏មានកិច្ចសហការផ្នែកចារកម្មជាមួយប្រទេសផ្សេងទៀត ព្រោះនេះជាដំណើរធម្មតានៃរដ្ឋមួយដែលមានអធិបតេយ្យភាព។ ឃើញទឹកស្ងប់កុំគិតថា ក្នុងទឹកគ្មានត្រី។ ពេល ហ៊ុន សែន មិននិយាយកុំគិតថា ហ៊ុន សែន មិនចេះនិយាយ។ បើស្គាល់ ហ៊ុន សែន មិនច្បាស់ទេ សូមកុំលេងជាមួយ ហ៊ុន សែន៕

ពត៌មានទាក់ទង

ពត៌មានផ្សេងៗ