CNV:25/01/2017
លោក ស៊ា មៀង (Ser Miang) សមាជិកគណៈកម្មាធិការប្រតិបត្តិនៃគណៈកម្មាធិការអូឡាំពិកអន្តរជាតិ
សម្តេច ឯកឧត្តម លោកជំទាវ អស់លោក លោកស្រី កីឡាករ កីឡាការិនីទាំងអស់ !
ថ្ងៃនេះ ខ្ញុំនិងភរិយា ព្រមទាំងក្រុមគ្រួសារមានសេចក្តីរីករាយចំពោះការផ្តល់កិត្តិយស «ពានរង្វាន់ប្រធានគណៈ កម្មាធិការអន្តរជាតិ» ដល់រូបខ្ញុំនាពេលនេះ។ ពានរង្វាន់នេះនឹងក្លាយជាមូលដ្ឋានគ្រឹះដ៏សំខាន់មួយ សម្រាប់រួមចំណែកគាំទ្របន្ថែមទៀត ដល់ដំណើរការអភិវឌ្ឍនវិស័យកីឡាកម្ពុជា ឱ្យកាន់តែរីកចម្រើនទាំងបច្ចុប្បន្ន និងពេលខាងមុខទៀត។
ចំពោះមុខនេះ ខ្ញុំសូមថ្លែងអំណរគុណលោក ស៊ា មៀង សមាជិកគណៈកម្មាធិការប្រតិបត្តិនៃគណៈកម្មាធិការអូឡាំពិកអន្តរជាតិ និងជាតំណាងលោកបណ្ឌិត Thomas Bachប្រធានគណៈកម្មាធិការអូឡាំពិកអន្តរជាតិ ដែលបាននាំយកពានរង្វាន់ខ្ពស់បំផុតរបស់ចលនាអូឡាំពិកនេះ មកប្រគល់ដល់រូបខ្ញុំ។ នេះគឺជាមោទនភាពថ្មីមួយទៀត សម្រាប់រូបខ្ញុំ ភរិយា ក្រុមគ្រួសារ គណៈកម្មាធិការជាតិអូឡាំពិកកម្ពុជា កីឡាករ-កីឡាការិនីកម្ពុជាក៏ដូចជាប្រជាជាតិកម្ពុជាទាំងមូលផងដែរ។ ឆ្លៀតក្នុងឱកាសនេះ ក្នុងនាមរាជរដ្ឋាភិបាល និងប្រជាជនកម្ពុជា ខ្ញុំសូមសម្តែងនូវមនោសញ្ចេតនារីករាយ និងមោទនភាព ខណៈដែលកិច្ចខិតខំប្រឹងប្រែងរបស់ខ្ញុំ និងសហការី ព្រមទាំងការរួមចំណែក ពីក្រុមកីឡាករ-កីឡាការិនីទាំងអស់ ក្នុងការលើកស្ទួយវិស័យកីឡាកម្ពុជា ឱ្យផុសត្រដែតឡើងជាថ្មី និងបានធ្វើឱ្យពិភពលោកមានការភ្ញាក់ផ្អើលចំពោះទេពកោសល្យ និងសមត្ថភាពកីឡាករកម្ពុជា នាពេលបច្ចុប្បន្ននេះ។
ជាការពិត វិស័យកីឡាកម្ពុជាយើងធ្លាប់មានឧត្តមភាពនៅថ្នាក់តំបន់ និងទ្វីបឤស៊ីនាទសវត្សរ៍ទី ៦០ និង ៧០ ប៉ុន្តែ ដោយសារសង្គ្រាមក្រោយឆ្នាំ ១៩៧០ និងរបបប្រល័យពូជសាសន៍ប៉ុលពត ៣ ឆ្នាំ ៨ ខែ ២០ ថ្ងៃ វិស័យកីទ្បាក៏ដូចជាវិស័យដទៃទៀតត្រូវបានបំផ្លិចបំផ្លាញ ហើយមន្ត្រីកីទ្បា គ្រូកីទ្បា កីទ្បាករ-កីឡាការិនី អ្នកជំនាញ ដែលធ្លាប់មានស្នាដៃ និងទទួលបានមេដាយត្រូវបានកាប់សម្លាប់ស្ទើរគ្មានសល់។ ជារួម កម្ពុជាបានឆ្លងកាត់សោកនាដកម្ម ភាពឈឺចាប់ខ្លោចផ្សា ការនិរាសញ្រត់ប្រាស ហើយសង្គមជាតិទាំងមូលត្រូវបំផ្លិចបំផ្លាញក្រោម របបប្រល័យពូជសាសន៍ ប៉ុល ពត។ យើងនៅចាំបានថា ក្រោយថ្ងៃរំដោះ ៧ មករា ប្រជាជនយើងមិនមាន ឧបករណ៍សម្ភារៈកីឡាគ្រប់គ្រាន់ឡើយ ហើយបានយកស្រកីដូងធ្វើជាបាល់ យុវជន-កុមារខ្លះបានយកកៅស៊ូកង់ ឬជ័រកៅស៊ូផ្គុំគ្នាជាបាល់ទាត់ បាល់ទះ យកខ្សែចងគោ ធ្វើសំណាញ់បាល់ទះជាដើម ដែលនេះ គឺជាចំណុចចាប់ផ្តើមឡើងវិញនៃវិស័យកីឡារបស់យើង។
ជាមួយនេះ យើងក៏បានខិតខំប្រមែប្រមូលកីទ្បាករ-កីទ្បាការិនី ដែលនៅរស់រានមានជីវិតឱ្យជួយរៀបចំចងក្រងជាក្រុមឱ្យមានជារចនាសម្ព័ន្ធកីទ្បា និងបានស្តារជួសជុលពហុកីទ្បាដ្ឋាននានាជាបន្តបន្ទាប់។ ឈរលើមូលដ្ឋាននៃការអភិវឌ្ឍកីឡា និងការរីកចម្រើនជាបន្តបន្ទាប់ ធ្វើឱ្យកម្ពុជាយើងបានចូលរួមការប្រកួតកីឡាឤស៊ីឡើងវិញនៅឆ្នាំ ១៩៩៤ កីឡាស៊ីហ្គេមឆ្នាំ ១៩៩៥ និងកីឡាអូឡាំពិកនៅឆ្នាំ ១៩៩៦ ព្រមទាំងការប្រកួតជាលក្ខណៈអន្តរជាតិផ្សេងៗទៀត ដោយទទួលបានមេដាយកើនឡើងជាលំដាប់ នៅលើប្រភេទកីឡាជាច្រើន។ ថ្មីៗនេះ យើងក៏បានខិតខំរៀបចំសាងសង់ពហុកីឡាដ្ឋានថ្មីមួយ ដោយបំពាក់បន្ថែមនូវហេដ្ឋារចនាសម្ព័ន្ធកីឡា ទាំងទីលានហ្វឹកហាត់ ទាំងទីលានប្រកួតជាលក្ខណៈជាតិ និងអន្តរជាតិ ដើម្បីឆ្ពោះទៅរកឧត្តមភាពការប្រកួតកីឡាស៊ីហ្គេមឆ្នាំ ២០២៣ ខាងមុខ។
ក្នុងពេលបច្ចុប្បន្ននេះ កម្ពុជាបាន និងកំពុងរក្សានូវសុខសន្តិភាព ស្ថិរភាព និងសុវត្តិភាព ដែលជាបុព្វល័ក្ខខ័ណ្ឌដ៏សំខាន់មួយដល់សក្កានុពលរីកលូតលាស់ នៃសង្គម-សេដ្ឋកិច្ចកម្ពុជា និងការធ្វើសមាហរណកម្មស៊ីជម្រៅចូលទៅក្នុងតំបន់ និងពិភពលោក។ នៅលើមូលដ្ឋានមួយដ៏រឹងមាំនេះ ប្រជាជនកម្ពុជាទាំងអស់ រួមទាំងរូបខ្ញុំផ្ទាល់ សុទ្ធតែមានឱកាសលេងកីឡាគ្រប់ៗគ្នា។ សម្រាប់ខ្ញុំ មិនត្រឹមតែលេងខ្លួនឯងប៉ុណ្ណោះទេ ខ្ញុំក៏តែងតែបំផុសឱ្យកូនៗ និងចៅៗខ្ញុំលេងកីឡាផងដែរ ហើយខ្ញុំក៏ចង់បង្កើតក្រុមបាល់ទាត់គ្រួសារមួយក្រុម និងស្រមៃចង់ឃើញមានចៅៗខ្ញុំណាម្នាក់ចូលរួមប្រកួតកីឡាស៊ីហ្គេម នៅឆ្នាំ ២០២៣ ដែលកម្ពុជាធ្វើជាម្ចាស់ផ្ទះផងដែរ។ លើសពីនេះទៀត កន្លងមកខ្ញុំ និងភរិយាផ្ទាល់តែងតែយកចិត្តទុកដាក់ឧបត្ថម្ភ គាំទ្រ និងលើកទឹកចិត្តដល់កីឡាករ-កីឡាការិនីជាតិ ហើយបានចំណាយថវិកាផ្ទាល់អស់ជាច្រើន ដើម្បីលើកទឹកចិត្តការខិតខំប្រឹងប្រែងរបស់កីឡាករ-កីឡាការិនីក្នុងការប្រកួត ដើម្បីកិត្តិយសជាតិ ហើយកីឡាករកម្ពុជាកាន់តែពឹងផ្អែកខ្លាំងឡើងលើគុណភាព សមត្ថភាព និងទេពកោសល្យ។
ទន្ទឹមនេះ ក្នុងនាមរាជរដ្ឋាភិបាល ខ្ញុំតែងតែជំរុញរៀបចំប្រាក់រង្វាន់លើកទឹកចិត្តឱ្យបានសមរម្យសម្រាប់ជ័យលាភី ការប្រកួតកីឡាជាអន្តរជាតិ ក៏ដូចជាការលើកចិត្តបន្ថែម តាមរយៈការផ្តល់ពិធីជប់លៀងទទួលទានឤហារសាមគ្គីក្នុងរង្វង់គ្រួសារកីឡាជាតិ មុនពេលចូលឆ្នាំខ្មែរជារៀងរាល់ឆ្នាំ បានបំពាក់គ្រឿងឥស្សរិយយសជាតិ និងដំឡើងឋានន្តរស័ក្តិចំពោះកីឡាករ-កីឡាការិនីជ័យលាភី ពីការប្រកួតអន្តរជាតិ។
[ចាប់ផ្តើមធ្វើអត្ថាធិប្បាយ]
កំណត់យកថ្ងៃ ៤ មេសា ធ្វើពិធីបី (សម្ពោធ ចាប់ផ្តើមសាងសង់ និងជួបជុំកីឡាករ-កីឡាការិនី)
ឯកឧត្តម លោកជំទាវ អស់លោក លោកស្រី អ្នកនាងកញ្ញា ជាពិសេស បងប្អូន ក្មួយៗកីឡាករ-កីឡាការិនី អម្បាញ់មិញខ្ញុំបានពិភាក្សាជាមួយឯកឧត្តម ថោង ខុន ជា(ប្រធាន)គណៈកម្មាការអូឡាំពិកថា យើងនឹងយកថ្ងៃទី ៤ ខែ មេសា នេះ គឺជាថ្ងៃនៃការសម្ពោធដាក់ឲ្យប្រើប្រាស់ នូវកន្លែងទីតាំងប្រកួត ដែលយើងបានកសាងប៉ុន្មានឆ្នាំរួចមកហើយ ជាថ្ងៃបុកគ្រឹះនៃការសាងសង់នូវពហុកីឡាដ្ឋានថ្មី ហើយក៏ជាថ្ងៃជួបជុំទទួលទានអាហារជាមួយនឹងកីឡាករ-កីឡាការិនីប្រចាំឆ្នាំផងដែរ គឺនៅថ្ងៃ ០៤ មេសា ឆ្នាំ ២០១៧ ខាងមុខនេះ។ ពិតមែនហើយថា ថ្ងៃនោះ យើងត្រូវមានការផ្លាស់ប្តូរកម្មវិធីបន្តិច ដោយសារតែព្រឹកមិញនេះ ខ្ញុំបានបញ្ចូលទៅក្នុងកម្មវិធីនូវការសម្ពោធផ្លូវជាតិលេខ ៦A ប៉ុន្តែយើងអាចដូរបាន ដើម្បីយកថ្ងៃទី ៤ ខែ មេសា នេះ ដែលចំជាថ្ងៃខួបកំណើតរបស់ខ្ញុំនេះ ទៅជួបជុំសម្ពោធផង ចាប់ផ្តើមសាងសង់ផង និងជួបជុំកីឡាករ-កីឡាការិនីផង។
ក្រុមកីឡាត្រកូលហ៊ុន (បាល់ទាត់ បាល់ទះ កូនហ្គោល)
ហើយ ថ្ងៃនេះគឺប្រហែលជាឯកឧត្តម លោកជំទាវ អស់លោក លោកស្រី បានឃើញហើយរញ៉េរញ៉ៃខាងមុខនេះ ហ្នឹងហើយជាកីឡាត្រកូលហ៊ុននោះ ប៉ុន្តែកុំភ្លេចឲ្យសោះ មួយនេះ និងដៃគូម្នាក់ទៀត បូកពីរនាក់ខាងនោះ គឺជាខ្សែប្រយុទ្ធ ហើយនៅមានផ្នែកខ្សែការពារ និងខ្សែបម្រើ រពឹសអញ្ចឹងឲ្យនៅខ្សែប្រយុទ្ធ កុំឲ្យនៅខ្សែការពារ បើនៅខ្សែការពារមុខតែគេចាប់ផាកនៅហ្នឹងហ្មង។ អញ្ចឹងបានខ្ញុំរៀបចំ បើត្រូវឲ្យខ្សែការពារ ឲ្យម្នាក់នេះវិញ ព្រោះនឹងមិនទាត់ជើងគ្នាផ្តួលនៅកន្លែងគ្រោះថ្នាក់ទេ គេឲ្យកាតក្រហម ហើយគេយកប៉េណាំងទីមួយគ្រាប់ទៀត អញ្ចឹងឲ្យវាទាត់នៅខ្សែប្រយុទ្ធនៅនោះវិញទេ។ អញ្ចឹងប្រព័ន្ធលេងរបស់ខ្ញុំអញ្ចឹង កុំភ្លេចថា ៣, , ២ អាហ្នឹងជាប្រព័ន្ធលេងរបស់ខ្ញុំ ឃើញថា ៥ នៅកណ្តាល ឡើងក៏បាន ចុះក៏បាន ប៉ុន្តែយកល្បឿនលឿន។ អញ្ចឹងចៅៗរបស់ខ្ញុំឲ្យ ចេះតិចបំផុត ២ កីឡា បាល់ទះ និងបាល់ទាត់ ប៉ុន្តែអាចនឹងមានចៅមួយចំនួនទៅលើសពីនោះ ដោយសារមួយចំនួនចាប់ផ្តើមហាត់កូនហ្គោលហើយ អាមួយដេកលក់នោះ អាហ្នឹងគឺថា ពីរម៉ោងវ៉ៃ ៣០០ គ្រាប់កូនហ្គោល។
អញ្ចឹងទេ គឺថាកូនរបស់ខ្ញុំម្នាក់ ប៉ុន្តែផ្នែកបាល់ទះដាច់ខាតត្រូវតែមានបាល់ទាត់មួយក្រុម បាល់ទះមួយក្រុម ក្រុមលេងបាល់ទះហ្នឹង វាក៏ជាបាល់ទាត់ អាក្រុមបាល់ទាត់វាក៏ជាបាល់ទះ ហើយមានមួយចំនួនអាចនឹងឈានទៅលេងកូនហ្គោល។ ចំពោះចៅស្រី នឹងមានបាល់ទះចៅស្រីមួយទៀត ប្រសិនបើមិនអាចមានចៅស្រីបន្ថែម ប៉ុន្តែយ៉ាងណាក៏ដោយ យើងមានចៅទី ១៨ ហើយ សង្ឃឹមថា ខ្ញុំនឹងមានចៅមិនតិចជាង ២០។ ហើយចៅទាំងអស់ត្រូវដើរតាមគន្លងរបស់ជីតាដែរ។ អម្បាញ់មិញខ្ញុំលឺថា គេដាក់អុកជាកីឡាដែរ យី! បើអុកជាកីឡាដែរ អញ្ចឹងប្រពន្ធខ្ញុំឲ្យលេងរហូត អត់ទៅណា អាហ្នឹងលេងតាំងពីម៉ោង ៣ រសៀល ធ្លាក់មក ៣ ភ្លឺនោះ ហើយតែ ២ នាក់ ប៉ុន្តែអាហ្នឹងគ្រោះថ្នាក់សុខភាពរបស់យើង។
[ចប់ការធ្វើអត្ថាធិប្បាយ]
ជារួមថ្មីៗនេះ ខ្ញុំបានសម្រេចចិត្តជំរុញល្បឿនអភិវឌ្ឍវិស័យកីឡា និងចលនាអូឡាំពិកលើមូលដ្ឋានបីសំខាន់ គឺ (១) ការសម្រេចកំណត់យកឆ្នាំ ២០២៣ កម្ពុជាធ្វើជាម្ចាស់ផ្ទះក្នុងព្រឹត្តិការណ៍ប្រកួតកីឡាស៊ីហ្គេម លើកទី ៣២ (២) ការផ្តល់នូវអគារទីស្នាក់ការគណៈកម្មាធិការជាតិអូឡាំពិកកម្ពុជា (៣) ការកសាងពហុកីឡាដ្ឋានជាតិ មរតកតេជោ រួមទាំងទីលានកីឡាក្នុងសាលធំ ១ ទីលានបាល់ទាត់នៅខាងក្រៅ មណ្ឌលកីឡាហែលទឹកធំ ១ កន្លែងស្នាក់នៅកីឡាករជម្រើសជាតិប្រមាណ ៣០០ នាក់ ដែលនឹងត្រូវបានសាងសង់រួចនាពេលដ៏ខ្លីខាងមុខនេះ។
ក្នុងស្មារតីយកចិត្តទុកដាក់ខ្ពស់នេះ បានធ្វើឱ្យប្រជាជនកម្ពុជាចាប់ឤរម្មណ៍កាន់តែខ្លាំងឡើងលើការលេងកីឡា ការហាត់ប្រាណ ហើយនាំដល់ការកើតឡើងនៃទីលានកីឡាតូចៗជាច្រើន ដែលបម្រើឱ្យកីឡាបាល់ទាត់ បាល់ទះ បាល់បោះ កីឡាវាយកូនឃ្លីលើតុ កីឡាវាយសី ក្លឹបហាត់ប្រាណជាច្រើនដែលកំពុងរីកដុះដាល នៅទូទាំងប្រទេស។
ឥឡូវនេះ ការសម្រេចចិត្តរបស់ខ្ញុំនេះ មិនត្រឹមតែក្លាយជាគោលនយោបាយរបស់រាជរដ្ឋាភិបាលក្នុងការលើកកម្ពស់សុខុមាលភាពប្រជាជនប៉ុណ្ណោះទេ ប៉ុន្តែថែមទាំងបានជំរុញទឹកចិត្ត ឱ្យវិស័យកីឡាជំនាញ និងស្ថាប័នពាក់ព័ន្ធបង្កើនការយកចិត្តទុកដាក់ ខិតខំពង្រឹងប្រសិទ្ធភាពការងារកីឡា ដើម្បីឆ្ពោះទៅទទួលបានជោគជ័យក្នុងការរៀបចំការប្រកួតកីឡាស៊ីហ្គេមលើក ទី ៣២ ឆ្នាំ ២០២៣ ទៀតផង។ ទោះបីយ៉ាងណា ខ្ញុំយល់ថា ភាពជោគជ័យនៃវិស័យកីឡា និងចលនាអូឡាំពិកនៅកម្ពុជា ក៏នឹងឤស្រ័យដោយការរួមសហការគ្នា រវាងរាជរដ្ឋាភិបាល និងចលនាអូឡាំពិកជាតិ និងអន្តរជាតិ ព្រមទាំងស្ថាប័នជំនាញពាក់ព័ន្ធ ទើបឤចឈានដល់ការអភិវឌ្ឍវិស័យកីឡាប្រកបដោយនិរន្តរភាព ពីញ្រេះកីឡាគឺជាអន្តរវិស័យដែលពាក់ព័ន្ធគ្រប់វិស័យ។
កីឡាមិនមែនគ្រាន់តែរឿងឈ្នះចាញ់ប៉ុណ្ណោះទេ ប៉ុន្តែកីឡាក៏ពាក់ព័ន្ធដល់សន្តិសុខ សុវត្ថិភាពសង្គម ដែលគេហៅថាកីឡានាំមកនូវសុខដុមរមនាសង្គម ការអភិវឌ្ឍសង្គម-សេដ្ឋកិច្ចទៀតផង។ ទន្ទឹមនេះ ការអភិវឌ្ឍវិស័យកីឡានឹងនាំដល់ការអភិវឌ្ឍហេដ្ឋារចនាសម្ព័ន្ធ និងការអភិវឌ្ឍធនធានមនុស្សប្រកបដោយសមត្ថភាព និងការរួមចំណែកថែរក្សា ការពារបរិស្ថានសង្គម តាមរយៈកីឡាស្អាតស្អំ កីឡាបៃតង ពិសេសកីឡាដើរតួនាទីយ៉ាងសំខាន់ក្នុងការអប់រំ ដែលរួមមានអប់រំកាយ អប់រំបញ្ញា អប់រំស្មារតី បណ្តុះឆន្ទៈ ព្យាយាមតស៊ូ ដើម្បីឱ្យយុវជនទទួលនូវគុណភាពជីវិត។
[ចាប់ផ្តើមធ្វើអត្ថាធិប្បាយ]
អំពាវនាវឲ្យប្រជាជនលេងកីឡា ឬធ្វើការហាត់ប្រាណដើម្បីសុខភាព
ក្នុងរយៈពេលកន្លងទៅនេះ ខ្ញុំក៏បានអំពាវនាវដើម្បីឲ្យប្រជាជនយើងម្នាក់ ហាត់កីឡាមួយយ៉ាងតិច ហើយប្រសិនបើមិនអាចហាត់កីឡាបាន ក៏សូមអំពាវនាវប្រជាពលរដ្ឋរបស់យើងហាត់ប្រាណដើម្បីសុខភាព។ ម្យ៉ាងទៀត ការជម្រុញបញ្ហាកីឡា វាក៏កាត់បន្ថយជាមួយនឹងបញ្ហាទាក់ទងនឹងយុវជន និងកុមារប្រើប្រាស់គ្រឿងញៀន ក៏ដូចជាអំពើអបាយមុខផ្សេងៗផងដែរ តាមរយៈយកសកម្មភាពកីឡាបម្រើឲ្យសុខុមាលភាព បង្កើននូវសុខុមាលភាព និងការសាមគ្គីភាពនៅក្នុងសង្គមរបស់យើង។
[ចប់ការធ្វើអត្ថាធិប្បាយ]
ជាថ្មីម្តងទៀត ខ្ញុំនិងភរិយា ក្រុមគ្រួសារគណៈកម្មាធិការជាតិអូឡាំពិកកម្ពុជា កីឡាករ-កីឡាការិនីកម្ពុជា និងប្រជាជនកម្ពុជាទាំងមូល សូមថ្លែងអំណរគុណដល់លោកបណ្ឌិតថូម៉ាស់ បាច ប្រធានគណៈកម្មាធិការអន្តរជាតិ ដែលបានផ្តល់ពានរង្វាន់ដ៏មានតម្លៃជាប្រវត្តិសាស្ត្រនេះដល់រូបខ្ញុំ និងសូមអរគុណលោក ស៊ា មៀង ដែលបាននាំមកផ្ទាល់នូវពានរង្វាន់នេះ។
ជាទីបញ្ចប់ ខ្ញុំសូមជូនពរសម្តេច ឯកឧត្តម លោកជំទាវ អស់លោក លោកស្រី កីឡាករ-កីឡាការិនីទាំងអស់ សូមប្រកបដោយពុទ្ធពរទាំងបួនប្រការ ឤយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
