ក្នុងឱកាសអញ្ជើញត្រួតពិនិត្យវឌ្ឍនភាពនៃការសាងសង់អាកាសយានដ្ឋានអន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី១២ ខែមីនា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា មិនថាជាកម្មករ កម្មការិនី ឬបុគ្គលិកផ្នែកណាមួយនោះទេ យើងត្រូវមានមោទនភាពថា យើងក៏បានចូលរួមនៅក្នុងការកសាងសមិទ្ធផលប្រវត្តិសាស្រ្តនេះ។
សម្តេចធិបតី ហ៊ុន ម៉ាណែត ក៏បានថ្លែងអំណរគុណដល់ក្រុមហ៊ុន អាជ្ញាធរពាក់ព័ន្ធគ្រប់លំដាប់ថ្នាក់ ជាពិសេសបុគ្គលិក កម្មករទាំងអស់ដែលបានរួមគ្នាកសាង ហើយសម្តេច ក៏បានជំរុញឱ្យភាគីពាក់ព័ន្ធទាំងអស់បន្តយកចិត្តទុកដាក់លើការងារនេះបន្តទៀត។
សម្តេចធិបតី ហ៊ុន ម៉ាណែត ក៏បានកោតសរសើរដល់គ្រប់តួអង្គពាក់ព័ន្ធទាំងអស់ រួមទាំង អ្នកពិគ្រោះយោបល់ ក្រុមហ៊ុនបរទេសនានា រួមមាន ក្រុមហ៊ុនអង់គ្លេស ដាណឺម៉ាក ហូឡង់ កូរ៉េខាងត្បូង និងក្រុមហ៊ុនចិនផងដែរ ដែលបានចូលរួមកសាងសមិទ្ធផលនេះ ដោយមានការគ្រប់គ្រងគុណភាពច្បាស់លាស់៕
