(AKP) កណ្តាល ថ្ងៃទី០៩ ខែកក្កដា ឆ្នាំ២០១៧ – ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានមានព្រះរាជឱង្ការឧទ្ទិសឱ្យពិធីបុណ្យរុក្ខទិវា ៩កក្កដា ស្ថិតក្នុងបេះដូងរបស់ប្រជាពលរដ្ឋកម្ពុជាគ្រប់ៗរូប ដោយចូលរួមដាំដើមឈើ ថែរក្សា និងការពារព្រៃឈើ ដើម្បីទ្រទ្រង់ជីវិតរស់នៅរបស់យើងផង រក្សាលំនឹងធម្មជាតិ នៃភពផែនដីយើងផង និងធ្វើឱ្យមនុស្សជាតិរួចផុតពីគ្រោះធម្មជាតិនានា ដែលបណ្ដាលមកពីការប្រែប្រួលអាកាសធាតុ និងការឡើងកម្តៅនៃភពផែនដីផង។
ក្នុងឱកាសស្ដេចយាងជាព្រះរាជាធិបតីដ៏ខ្ពង់ខ្ពស់ ក្នុងពិធីបុណ្យរុក្ខទិវា នៅភូមិក្រាំងក្រូច ឃុំទួលព្រេច ស្រុកអង្គស្នួល ខេត្តកណ្ដាល នាព្រឹកថ្ងៃទី០៩ ខែកក្កដា ឆ្នាំ២០១៧ ព្រះករុណា ព្រះមហាក្រត្រ មានព្រះរាជឱង្ការថា អាស្រ័យដោយការប្រែប្រួលធាតុអាកាស ពិភពលោកតែងជួបប្រទះនឹងគ្រោះរាំងស្ងួត ទឹកជំនន់ ភាពរិចរិលនៃដីកសិកម្ម ការរីករាលដាលនៃជម្ងឺឆ្លងលើសត្វ និងសត្វល្អិតលើដំណាំគ្រប់ប្រភេទ ហើយនៅកម្ពុជាយើងក៏ទទួលរងសម្ពាធនេះជាញឹកញាប់ផងដែរ។ យើងទទួលស្គាល់ថា ព្រៃឈើមានទំនាក់ទំនងជាសារវន្ត ជាមួយជីវិតរស់នៅលើភពផែនដីនេះ មូលហេតុចម្បងដែលនាំឱ្យយើងជួបវិបត្តិធម្មជាតិទាំងអស់នេះ គឺការបាត់បង់ និងរិចរិលព្រៃឈើ ដូច្នេះយើងទាំងអស់គ្នាត្រូវចូលរួមដោះស្រាយឱ្យបានជាអតិបរិមា ដើម្បីការពារជីវិតមនុស្ស សត្វ និងធនធានធម្មជាតិដ៏មានតម្លៃនៅកម្ពុជា និងនៅលើផែនដីយើងនេះតាមរយៈការថែរក្សា ការពារ និងដាំដើមឈើឡើងវិញឱ្យបានជាអតិបរិមា។ ម្យ៉ាងទៀត ព្រៃឈើមិនត្រឹមតែមានតម្លៃខាងសេដ្ឋកិច្ច និងសង្គមប៉ុណ្ណោះទេ ប៉ុន្តែបានជួយថែរក្សាលំនឹងបរិស្ថានធម្មជាតិ ធ្វើឱ្យធាតុអាកាសមានភាពល្អបរិសុទ្ធ រក្សានិយ័តភាពប្រភពទឹក ការពារទីជម្រាល និងការពារជីវៈចម្រុះទៀតផង។ ស្ថិតក្នុងបរិបទនេះ ព្រះករុណា ព្រះមហាក្សត្រ ស្នើឱ្យបងប្អូនជនរួមជាតិនៅគ្រប់មជ្ឈដ្ឋាន មេត្តារួមគ្នាការពារភ្លើងឆេះព្រៃ បញ្ចប់ការកាប់រានដីព្រៃឈើធ្វើជាកម្មសិទ្ធ ការកាប់ឈើខុសច្បាប់ ការបរបាញ់ ការដាក់អន្ទាក់ចាប់សត្វព្រៃ និងចូលរួមដាំដើមឈើឱ្យបានច្រើនជាអតិបរិមា ដើម្បីបង្កើនគម្របព្រៃឈើឡើងវិញ ការចូលរួមរបស់បងប្អូនជនរួមជាតិនេះ បានបង្ហាញពីស្មារតីទទួលខុសត្រូវលើជោគវាសនាអនាគតនៃធនធានព្រៃឈើយើង ដើម្បីកូនចៅយើងជំនាន់នេះ និងជំនាន់ក្រោយៗទៀត។
ព្រះអង្គបានមានព្រះរាជឱង្ការរំលឹកដែរថា ពិធីបុណ្យរុក្ខទិវា គឺកើតមានតាំងពីសម័យសង្គមរាស្ត្រនិយម នៅក្នុងឆ្នាំ១៩៥២ ដែលកាលនោះ ព្រះករុណាព្រះមហាវីរក្សត្រ ព្រះវររាជបិតាជាតិខ្មែរ ព្រះបិតាឯករាជ្យជាតិ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គតែងតែប្រោសព្រះរាជទានលើកទឹកចិត្ត និងយាងចូលរួមជាព្រះរាជាធិបតីដ៏ខ្ពង់ខ្ពស់ ក្នុងពិធីបុណ្យរុក្ខទិវានៅតាមបណ្ដាខេត្តនានា។ ព្រះករុណា ព្រះមហាក្សត្រ ក៏បានអំពាវនាវដល់ព្រះថេរានុថេរ គ្រប់ព្រះអង្គ គ្រប់ទីវត្តអារ៉ាម មន្ត្រីរាជការ ក្រសួងស្ថាប័ននានា អាជ្ញាធរមូលដ្ឋានគ្រប់លំដាប់ថ្នាក់ សិស្សានុសិស្ស គ្រប់គ្រឹះស្ថានសិក្សា បងប្អូនជនរួមជាតិទូទាំងប្រទេស បន្តប្រពៃណីដាំកូនឈើឱ្យបានសកម្ម នៅគ្រប់ទីកន្លែងថែមទៀត ព្រមទាំងបង្កើតឱ្យមានសួនដាំឈើ ដើម្បីឱ្យបងប្អូនប្រជាពលរដ្ឋរបស់យើង ចូលរួមដាំឈើ និងរុក្ខជាតិគ្រប់ប្រភេទ សម្រាប់ជីវិតរស់នៅដ៏សុខសាន្ត និងបានស្ថិតស្ថេរយូអង្វែងដល់កូនចៅរបស់យើងជំនាន់ក្រោយៗទៀត។ ការដាំឈើ និងរុក្ខជាតិគ្រប់ប្រភេទនេះ ពិតជាផ្ដល់នូវបុណ្យកុសលដ៏ប្រពៃ ដល់មនុស្សជាតិគ្រប់ៗរូប ហើយធ្វើឱ្យមូលដ្ឋានភូមិ ឃុំ មានទេសភាពពណ៌បៃតង និងរស់រវើកគ្រប់រដូវកាល។ ព្រះអង្គក៏បានអំពាវនាវដល់អង្គការជាតិ អន្តរជាតិ និងដៃគូអភិវឌ្ឍន៍ទាំងអស់ សូមមេត្តាបន្តជួយឧបត្ថម្ភគាំទ្រតាមគ្រប់រូបភាព ដល់ការគ្រប់គ្រង ការអភិវឌ្ឍន៍ និងការកែទម្រង់វិស័យព្រៃឈើនៅកម្ពុជា។
ឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា សម្រាប់ឆ្នាំ២០១៧នេះ ក្រសួងកសិកម្ម រុក្ខាប្រមាញ់ និងនេសាទ ដោយមានកិច្ចសហការល្អប្រសើរ ជាមួយក្រសួងព្រះបរមរាជវាំង អាជ្ញាធរខេត្តកណ្តាល បានកំណត់យកទីតាំងស្ថិតនៅភូមិក្រាំងក្រូច ឃុំទួលព្រេច ស្រុកអង្គស្នួល ខេត្តកណ្តាល ប្រារព្ធពិធីរុក្ខទិវាលើកទី២៧ នៅលើផ្ទៃដីទំហំ១០ហិកតា ហើយកូនឈើដែលត្រូវយកមកដាំ នៅក្នុងពិធីនេះ រួមមានប្រភេទឈើក្រញូង ធ្នង់ និងគីនីន សរុបចំនួន៨.៨៣០ដើម។ ឯកឧត្ដមរដ្ឋមន្ត្រីគូសបញ្ជាក់ថា គោលបំណងសំខាន់នៃពិធីរុក្ខទិវានេះ គឺដើម្បីបំផុសស្មារតីចូលរួមស្តារ និងដាំដើមឈើឡើងវិញ ធ្វើឲ្យប្រសើរឡើងនូវសោភ័ណភាព ទេសភាពធម្មជាតិ បរិស្ថាន រក្សានិយ័តភាពប្រភពទឹក ការពារទីជម្រាល និងជីវចម្រុះ ព្រមទាំងចូលរួមកាត់បន្ថយការបញ្ចេញឧស្ម័នទៅបរិយាកាស និងជួយទ្រទ្រង់ជីវភាពរស់នៅ សម្រាប់ប្រជាពលរដ្ឋរាប់លាននាក់ ដែលពឹងអាស្រ័យទៅលើផលអនុផលព្រៃឈើ។ ធនធានព្រៃឈើបានដើរតួនាទីយ៉ាងសំខាន់ ក្នុងការអភិវឌ្ឍសេដ្ឋកិច្ច សង្គម និងបរិស្ថាន ជាពិសេសបានផ្តល់សារប្រយោជន៍ជាច្រើនដល់សង្គមជាតិយើងតាំងពីដើម រហូតដល់បច្ចុប្បន្ន និងអនាគត។ ដូច្នេះ ពលរដ្ឋគ្រប់រូបមានភារកិច្ចថែរក្សាការពារប្រភពទ្រទ្រង់ជីវិតនេះ ដោយត្រូវចូលរួមថែរក្សាការពារអភិរក្ស និងអភិវឌ្ឍព្រៃឈើ ឲ្យមានប្រសិទ្ធិភាព និងនិរន្តរភាព ដើម្បីជាប្រយោជន៍ដល់មនុស្សជាតិយើងជំនាន់បច្ចុប្បន្ន និងជំនាន់ក្រោយៗទៀត៕
ដោយ ជឹម ណារី
