ភ្នំពេញ ថ្ងៃទី១១ ខែវិច្ឆិកា ឆ្នាំ២០២០ — តាមបញ្ជាដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងសុខាភិបាល នឹងបញ្ចេញម៉ាស់ចំនួន ២ ០០០ ០០០ (ពីរលាន) ម៉ាស់ ក្រណាត់ពីឃ្លាំងយុទ្ធសាស្ត្ររបស់រាជរដ្ឋាភិបាល ជូនឯកឧត្ដមអភិបាលនៃគណៈអភិបាលរាជធានីភ្នំពេញ ដើម្បីចែកជូនដល់ប្រជាពលរដ្ឋដែលខ្វះខាតក្នុងសហគមន៍ក្រីក្រ ក្នុងរាជធានីភ្នំពេញ។ នេះបើតាមការឱ្យដឹងរបស់ក្រសួងសុខាភិបាលនៅថ្ងៃទី១១ ខែវិច្ឆិកា ឆ្នាំ២០២០។
បើតាមក្រសួងសុខាភិបាលបានឱ្យដឹងដែរថា គិតត្រឹមម៉ោង៧ព្រឹកថ្ងៃទី១១ខែវិច្ឆិកា ឆ្នាំ២០២០នេះ បានរកឃើញករណីវិជ្ជមានវីរុសកូវីដ-១៩ ថ្មីចំនួន០១នាក់ ទៅលើស្ត្រីជនជាតិអាម៉េរិក អាយុ៣៥ឆ្នាំ និងមិនមានករណីជាសះស្បើយនោះទេ។ ដូច្នេះមកដល់ថ្ងៃនេះ កម្ពុជាបានរកឃើញអ្នកមានវីរុសកូវីដ-១៩ សរុបចំនួន៣០១នាក់ ក្នុងនោះព្យាបាលជាសះស្បើយចំនួន ២៨៨នាក់ និងកំពុងសម្រាកព្យាបាលនៅមន្ទីរពេទ្យចំនួន ១៣នាក់។ ដោយឡែក នៅថ្ងៃទី១១ ខែវិច្ឆិកា ឆ្នាំ២០២០នេះដែរ ការធ្វើតេស្តអ្នកប៉ះពាល់ក្នុងព្រឹត្តិការណ៍៣វិច្ឆិកា មានចំនួនសរុប៣៦៥នាក់ ដែលនៅក្នុងចំនួននេះ មាន៣១៥នាក់ រួមទាំងវត្ថុសំណាកចំនួន២៣នាក់ដែលសល់ពីថ្ងៃទី១០ ខែវិច្ឆិកា ឆ្នាំ២០២០ ទទួលបានលទ្ធផល អវិជ្ជមានវីរុសកូវីដ-១៩ និងវត្ថុសំណាកនៅសល់ចំនួន៥០នាក់ទៀតនោះ ត្រូវធ្វើបន្តនៅថ្ងៃទី១២ ខែវិច្ឆិកា ២០២០។
ដូច្នេះគិតត្រឹមថ្ងៃទី១១ ខែវិច្ឆិកា ឆ្នាំ២០២០ ការធ្វើតេស្តអ្នកប៉ះពាល់ក្នុងព្រឹត្តិការណ៍៣វិច្ឆិកា មានចំនួនសរុប ១៤៨១នាក់(ទាំងតេស្តលើកទី១ និងលើកទី២) ដែលទទួលបានលទ្ធផលពីវិទ្យាស្ថានប៉ាស្ទ័រកម្ពុជា ដែលក្នុងចំនួននេះ អ្នកមានវិជ្ជមានវីរុសកូវីដ-១៩ មានចំនួន០៤នាក់ (បានរាយការណ៍ជូនសាធារណជនរួចហើយ) ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ចំនួនវត្ថុសំណាកនេះ មិនទាន់បានបូកបញ្ចូលចំនួន ៥០វត្ថុសំណាកដែលនៅសល់ ដែលត្រូវវិភាគនៅថ្ងៃទី១២ ខែវិច្ឆិកា ឆ្នាំ២០២០ ដោយសារមិនទាន់មានលទ្ធផលធ្វើតេស្តនៅឡើយទេ៕
ដោយ ជឹម ណារី
