ភ្នំពេញ ថ្ងៃទី២៥ ខែវិច្ឆិកា ឆ្នាំ២០២០ — ក្នុងខណៈដែលរាជរដ្ឋាភិបាលកម្ពុជាបានផ្ដល់ជំនួយជាម៉ាស់ និងសម្ភារវេជ្ជសាស្តមួយចំនួនទៅកាន់ប្រទេសឡាវ និងមីយ៉ាន់ម៉ា ដើម្បីបង្ការនិងទប់ស្កាត់ការរីករាលដាលនៃជំងឺកូវីដ១៩ ក៏មានអ្នកខ្លះលើកឡើងថា ខ្លួនឯងដោះស្រាយមិនចេញផងទៅគិតដល់រឿងគេនោះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ថា ក្នុងឋានៈជាអ្នកដែលចូលរួមចំណែកនៅក្នុងសហគមន៍អន្តរជាតិ កម្ពុជាក៏មានកាតព្វកិច្ចចូលរួមជាមួយនឹងរដ្ឋដទៃទៀត ប្រជាជាតិដទៃទៀត ដើម្បីផ្ដល់ជំនួយតាមលទ្ធភាពដែលអាចធ្វើទៅបាន។
ថ្លែងក្នុងពិធីសំណេះសំណាលជាមួយក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្ដេចតេជោសែន នាព្រឹកថ្ងៃទី ២៥ ខែវិច្ឆិកា ឆ្នាំ២០២០ នៅវិមានសន្តិភាព សម្ដេចតេជោ ហ៊ុន សែន បានថ្លែងថា កន្លងមយើងបានជួយជំនួយដល់មិត្តឡាវនូវម៉ាស់ និងសម្ភារវេជ្ជសាស្ត្រមួយចំនួនទៀត ដែលមានតម្លៃ២លាន ២សែន២ម៉ឺន៤ពាន់ដុល្លារអាម៉េរិក ហើយនៅថ្ងៃទី២៦ ខែវិច្ឆិកា ស្អែកនេះឯកឧត្ដម រដ្ឋមន្ត្រីក្រសួងសុខាភិបាល នឹងដឹកជញ្ជូននូវម៉ាស់ និងសម្ភារវេជ្ជសាស្ត្រមួយចំនួនទៀតទៅផ្ដល់ឱ្យប្រទេសមីយ៉ាន់ម៉ា។ ប៉ុន្តែមានអ្នកខ្លះគេឌឺមកឱ្យសម្ដេចថា ខ្លួនឯងដោះស្រាយមិនចេញផងទៅគិតដល់រឿងគេ។ សម្ដេចតេជោបានលើកឡើងថា “សូមអ្នកនិយាយអ្វីនិយាយចុះ ក៏ប៉ុន្តែក្នុងឋានៈជាអ្នកដែលចូលរួមចំណែកនៅក្នុងសហគមន៍អន្តរជាតិ ខ្ញុំមានកាតព្វកិច្ចចូលរួមជាមួយនឹងរដ្ឋដទៃទៀត ប្រជាជាតិដទៃទៀត ដើម្បីផ្ដល់ជំនួយតាមលទ្ធភាពដែលអាចធ្វើទៅបាន”។ សម្ដេចតេជោគូសបញ្ជាក់ថា «កម្ពុជាមិនមែនគ្រាន់តែផ្ដល់ជំនួយផ្នែកវិស័យសុខាភិបាល ទៅឱ្យមិត្តឡាវ និងមីយ៉ាន់ម៉ានោះទេ ហើយខ្ញុំត្រៀមទុកដើម្បីធ្វើអន្តរាគមន៍ទៅប្រទេសទីម័រឡេស្តេថែមទៀត ហើយយើងមិនគ្រាន់តែផ្ដល់ជំនួយបែបនេះទេ យើងផ្ដល់ជំនួយជាអាយុជីវិត និងសាច់ឈាម ដោយបញ្ជូនកងទ័ពរបស់យើងទៅចូលរួមរក្សាសន្តិភាព ក្រោមឆ័ត្រអង្គការសហប្រជាជាតិទៀតផង។ ដូច្នេះ កម្ពុជាក្រតូចល្អិត ក៏ប៉ុន្តែចិត្តធំទូលាយ»។
សម្ដេចតេជោនាករដ្ឋមន្ត្រីក៏បានរម្លឹកពីព្រឹត្តិការណ៍៣វិច្ឆិកាថា បានពាក់ព័ន្ធដល់មនុស្សទាំងផ្ទាល់ និងប្រយោល មានចំនួន ១ ៨០២ នាក់ ដែលគ្របដណ្ដប់ដល់ទៅ១១ រាជធានីខេត្ត។ ដូច្នេះសម្ដេចអាចនិយាយបានដោយមោទនភាពថា សំណុំបញ្ហាដ៏សាំញ៉ាំ នៃព្រឹត្តិការណ៍៣វិច្ឆិកា មិនមែនជារឿងតូចតាចទេ គឺជារឿងធំណាស់ ប្រសិនបើយើងគ្មានយន្តការប្រតិកម្មរហ័ស ដោយក្រុមគ្រូពេទ្យ និងអាជ្ញាធរ ព្រមទាំងតួអង្គពាក់ព័ន្ធ យើងមិនអាចគ្រប់គ្រងនូវសភាពការណ៍នេះបានទេ។ សម្ដេចតេជោបានលើកជាឧទាហរណ៍ថា ប្រសិនបើយើងមិនប្រញាប់ប្រញាល់គ្រប់គ្រងសភាពការណ៍នេះបន្ទាន់ វានឹងអាចធ្វើឱ្យមនុស្សឆ្លងចូលទៅក្នុងសហគមន៍ ហើយពេលនោះហើយដែលបញ្ហាវានឹងបានកើត ក៏ប៉ុន្តែយើងបានកម្រិតត្រឹមតែមនុស្សចំនួន០៤នាក់តែប៉ុណ្ណោះដែលបានឆ្លង។ ដូច្នេះយើងបានកម្រិតឱ្យនៅតូច ហើយយើងដោះស្រាយបានបញ្ហានេះ តាមរយៈនៃការធ្វើចត្តាឡីស័កបានត្រឹមត្រូវទៅលើមនុស្សដែលពាក់ព័ន្ធ ដែលយើងបានគ្រប់គ្រងបាននូវសភាពការណ៍នេះ។ សម្ដេចតេជោក៏សូមយកឱកាសនេះថ្លែងនូវការអរគុណចំពោះក្រសួងសុខាភិបាល មន្ត្រីសុខាភិបាលគ្រប់រូប ក៏ដូចជាតួអង្គពាក់ព័ន្ធទាំងអស់ អាជ្ញាធរគ្រប់លំដាប់ថ្នាក់ ដែលបានចូលរួមទប់ស្កាត់ ហើយបញ្ចប់ទៅបានដោយជោគជ័យនៅព្រឹត្តិការណ៍៣វិច្ឆិកា ដែលសម្ដេចចាត់ទុកជាមហន្តរាយសុខភាពសាធារណៈ។ សម្ដេចតេជោក៏បានលើឡើងផងដែរថា បញ្ហាបច្ចុប្បន្នត្រូវមើលឱ្យឃើញ មិនថាប្រទេសដែលមានវិទ្យាសាស្ត្រជឿនលឿន អាចទប់ស្កាត់បាននោះទេ ជាក់ស្ដែង ឥឡូវ ប្រទេសដែលមានសេដ្ឋកិច្ចលូតលាស់ខាងវិស័យសុខាភិបាល មានការស្លាប់គរជើងគ្នា រកកន្លែងកប់ស្ទើរតែមិនបាន ឆ្លងរាប់ម៉ឺននាក់ ក្នុងមួយថ្ងៃ។ ដូច្នេះភាសា ដែលគេនិយាយថា សុខាភិបាលប្រទេសនេះ ទន់ខ្សោយ ប្រទេសនោះរឹងមាំ មិនទាន់ប្រាកដទេ គឺស្ថិតនៅក្រោមវិធីគ្រប់គ្រងសភាពការណ៍បានដូចម្ដេច គ្រាន់តែមានទៅលើការចាត់ចែងប្រជាជន មិនព្រមសហការក៏បានកើតឡើងនូវបញ្ហា។ ទន្ទឹមនេះ ប្រទេសនៅអឺរ៉ុបមួយចំនួន កំពុងធ្វើបាតុកម្ម ប្រឆាំងនឹងវិធានការបិទប្រទេស បិទតំបន់។ សំដៅលើបញ្ហាជាសកលនេះ សម្ដេចបានអះអាងថា ”ខ្ញុំមានមោទនភាព ចំពោះប្រជាជនកម្ពុជាយើង ដែលបានអនុវត្តន៍ តាមការណែនាំរបស់រាជរដ្ឋាភិបាល និងវិធានរបស់ក្រសួងសុខាភិបាល“។ សម្ដេចតេជោបន្តថា យើងត្រូវប្រុងប្រយ័ត្ន បើទោះបីជាព្រឹត្តិការណ៍៣វិច្ឆិកាបានកន្លងផុត ក៏ប៉ុន្តែយើងត្រូវតែច្បាស់លាស់ ត្រូវបន្តការខិតខំប្រឹងប្រែង ដើម្បីធានាថាកម្ពុជាមានជំងឺឆ្លងតិច ហើយគ្មានមនុស្សស្លាប់។ សម្ដេចតេជោបានបញ្ជាក់បន្ថែមថា និយាយរួមជំងឺកូវីដនៅប្រទេសរបស់របស់យើងនាំចូល១០០ភាគរយ មកចម្លងក្នុងស្រុក ហើយយើងទទួលការពិនិត្យព្យាបាលឱ្យជនបរទេសដោយការនាំចូល រាប់ទាំងខ្មែរយើងផងដែរ។ ដូច្នេះសម្ដេចមានមោទនភាពជាមួយនឹងការគ្រប់គ្រងសភាពការណ៍៕
ដោយ ជឹម ណារី
