សម្តេចតេជោ ហ៊ុន សែន សម្រេចឲ្យពលករជាង២០០នាក់ ដែលកំពុងស្នាក់នៅប្រទេសម៉ាឡេស៊ី អាចត្រឡប់មកកម្ពុជា បើសិនម៉ាឡេស៊ីបញ្ជាក់ថាគ្មានជំងឺកូវីដ១៩

53

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅល្ងាចថ្ងៃទី២៧ ខែមេសា ឆ្នាំ​២០២០​នេះ បានបញ្ជាក់ថា នៅពេល​នេះរាជរដ្ឋាភិបាល សម្រេច ឲ្យពលករខ្មែរជាង​២០០នាក់ ដែលកំពុង​ស្នាក់នៅ​ប្រទេស​ម៉ាឡេស៊ី អាចត្រឡប់​មក​កម្ពុជា បើសិនអាជ្ញាធរ​ម៉ាឡេស៊ី​បញ្ជាក់ថា គ្មានជំងឺកូវីដ១៩ទេនោះ។

សម្តេចតេជោ ហ៊ុន សែន បញ្ជាក់ថា ប្រសិនបើពលករ​ខ្មែរដែល​កំពុង​ស្នាក់​នៅម៉ា​ឡេស៊ី ត្រូវបាន​រកឃើញ​ថាមាន​ជំងឺកូវីដនោះ តម្រូវឲ្យ​ព្យាបាលនៅ​ទីនោះ​​រហូតសះស្បើយសិន ទើបអនុញ្ញាត​ឲ្យត្រឡប់​មកកម្ពុជាវិញ។ ដោយឡែកសម្រាប់បងប្អូន ដែលគ្មានជំងឺកូវីដ១៩ ពេល​មកដល់​កម្ពុជា ក៏ត្រូវ​ធ្វើ​ចត្តាឡីស័ក១៤ថ្ងៃ (រស់នៅដាច់ដោយឡែក) សិន ដើម្បីតាមដានសុខភាពជាបន្ត។

សម្តេចតេជោ ហ៊ុន សែន បានសរសេរក្នុង Page Facebook យ៉ាងដូច្នេះថា «អរគុណកូនក្មួយ​នៅម៉ាឡេស៊ី ដែលយោគយល់ដល់វិធានការទប់ស្កាត់ជំងឺឆ្លងកូវីដ-១៩ នៅកម្ពុជា។ មក​ទល់​ថ្ងៃនេះក​ម្ពុជានិងពិភពលោកកំ​ពុងសកម្ម​នាំគ្នាប្រយុទ្ធប្រឆាំងនឹងជំងឺឆ្លង​កូវីដ​-​១៩​។​ ហើយមកទល់​ពេលនេះ ពិភពលោកក៏មិនទាន់​រកឃើញថ្នាំព្យាបាល​ជំងឺកូវីដ-១៩ ដ៏កាចសាហាវនេះនៅឡើយទេ។

រាជរដ្ឋាភិបាលកម្ពុជា សូមអរគុណកូនក្មួយពលករជាង​២០០នាក់ ដែលក្នុងនោះ​ក៏មានកូនក្មួយ​អ្នកទោសចំនួន៧៣នាក់ផងដែរ ដែលត្រូវបាន​ផ្អាកការធ្វើដំណើរ វិលត្រឡប់មកកម្ពុជា កាលពីពេលថ្មីៗ​ក្នុងពេល​ដែលប្រទេស​យើងកំពុងដា​ក់បម្រាមតឹ​ងរឹងក្នុងការធ្វើដំណើរ​។ ប៉ុន្តែនៅពេល​នេះបម្រាម​ការធ្វើដំណើរ ក្នុងប្រទេស​ក៏បានលើក ដូច្នេះរាជរដ្ឋា​ភិបាល​កម្ពុជា បានសម្រេច​ឲ្យកូន​ក្មួយ​ពលករខ្មែរជាង​២០០នាក់ អាចវិលត្រឡប់មកកាន់មាតុប្រទេសវិញ។ ប៉ុន្តែសូមកូនក្មួយទុកពេលវេលា ឲ្យខាងអាជ្ញាធរម៉ាឡេស៉ី គេធ្វើតេស្តសុខភាពសិន ដើម្បីបញ្ជាក់ថា កូនក្មួយគ្មានសញ្ញាវិជ្ជមាននៃជំងឺកូវីដ-១៩។ យើងទាំងអស់គ្នា ទាំងអ្នកនៅក្នុងប្រទេស និងក្រៅប្រទេស គឺត្រូវមានការប្រុងប្រយ័ត្នជានិច្ច កុំនាំរោគឆ្លងពីក្រៅចូលក្នុង និងពីម្នាក់ទៅម្នាក់ ព្រោះជំងឺកូវីដ-១៩ នេះ គឺងាយឆ្លងខ្លាំងណាស់។

សូមកូនក្មួយកុំបារម្ភអ្វី ប្រសិនបើកូនក្មួយគ្មានជំងឺឆ្លងកូវីដ-១៩ទេ គឺកូនក្មួយអាច​វិល​ត្រឡប់​មកក​ម្ពុជាវិញបាន​ក្នុងពេលឆាប់ៗនេះ។ ផ្ទុយពីនេះ បើខាងម៉ាឡេស៊ីពិនិត្យឃើញមានកូវីដ-១៩ ទៅលើកូនក្មួយណា គឺត្រូវនៅសម្រាកព្យាបាល នៅទីនោះសិនរហូតដល់ជាសះស្បើយ ទើបអនុញ្ញាតឱ្យត្រឡប់មកកម្ពុជាវិញ។ ចំពោះកូនក្មួយដែលនឹងមកដល់កម្ពុជាវិញ គឺត្រូវធ្វើចត្តាឡីស័ក១៤ថ្ងៃ (រស់នៅដាច់ដោយឡែក) សិន ដើម្បីតាមដានសុខភាពជាបន្ត ហើយក៏មានការធ្វើចត្តាឡីស័ក១៤ថ្ងៃទៀតនៅតាមផ្ទះផងដែរ»៕