ភ្នំពេញ ថ្ងៃទី០៧ ខែមេសា ឆ្នាំ២០២០ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជាបានប្រកាសផ្អាកការឈប់សម្រាកក្នុងពិធីបុណ្យចូលឆ្នាំប្រពៃណីជាតិខ្មែរ និងអនុញ្ញាតឱ្យបន្ដធ្វើការងារជាប្រក្រតីទាំងស្ថាប័នរដ្ឋ និងឯកជន។
ថ្លែងក្នុងសន្និសីទសារព័ត៌មាន នាព្រឹកថ្ងៃទី០៧ ខែមេសា ឆ្នាំ២០២០ នៅវិមានសន្ដិ ភាព សម្ដេចតេជោ ហ៊ុន សែន បានបញ្ជាក់ថា ការសម្រេចផ្អាកពិធីបុណ្យចូលឆ្នាំខ្មែរនេះ គឺតម្រូវឱ្យស្ថាប័នរដ្ឋ និងឯកជនធ្វើការជាធម្មតា ហើយរដ្ឋនឹងធ្វើការសងថ្ងៃឈប់សម្រាកវិញក្នុងរយៈពេល៥ថ្ងៃនៃថ្ងៃធ្វើការ។ សម្ដេចតេជោបានបន្ដថា កន្លែងដែលមានសុវត្ថិភាពបំផុតនៅពេលនេះ នៅតាមរោងចក្រ នៅតាមក្រុមហ៊ុន នៅតាមស្ថាប័ន គឺជាកន្លែងដែលមានសុវត្ថិភាពបំផុត។ សម្ដេចតេជោបានលើកឡើងថា បើទុកបណ្ដោយឱ្យដើរលេង សភាការណ៍នេះ ក្រោយពិធីបុណ្យចូលឆ្នាំខ្មែរ អាចមានហានិភ័យខ្ពស់បំផុត។ សម្ដេចតេជោបានអះអាងថា រហូតមកដល់ពេលនេះ មេដឹកនាំនៅមិនទាន់មាននរណាម្នាក់មានគ្រោះថ្នាក់នោះទេ តែអ្វីដែលជាគ្រោះថ្នាក់គឺប្រជាពលរដ្ឋ សូម្បីតែឥឡូវមិនទាន់ដល់ពេលចូលឆ្នាំផង ចាប់ផ្ដើមជល់កែវគ្នាដោយលែងគិតអំពីគម្លាតសុវត្ថិភាពទៅហើយ។
សម្តេចតេជោបានចាត់ឱ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុពិភាក្សា និងប្រកាសឱ្យស្ថាប័ន រដ្ឋ និងឯកជនទាំងអស់ធ្វើការដោយមិនឈប់សម្រាកនោះទេ គឺធ្វើការជាម្មតា ហើយរដ្ឋនឹងផ្តល់ ឬសងថ្ងៃឈប់សម្រាកត្រឡប់វិញ នៅពេលណាដែលជំងឺកូវីដ-១៩ ផុតរលត់ នឹងត្រូវសងឱ្យឈប់សម្រាក០៥ថ្ងៃ។
សម្តេចតេជោបានថ្លែងបញ្ជាក់ថា “ខ្ញុំសូមបញ្ជាក់ជូនប្រជាពលរដ្ឋថាផ្អាកចូលឆ្នាំ ដើម្បី ទប់ស្កាត់កុំឆ្លងជំងឺកូវីដ-១៩ ពីអ្នកកើតទៅអ្នកមិនទាន់កើត ដែលជាវិធានការមួយ ហើយសង វិញថ្ងៃឈប់សម្រាកវិញនៅពេលក្រោយ”។ សម្ដេចតេជោក៏សូមអំពាវនាវដល់បងប្អូនប្រជាពលរដ្ឋ មន្រ្ដីរាជការ ក៏ដូចជាកម្មករ កម្មការិនី មានការយោគយល់ចំពោះការលំបាករបស់ប្រទេសជាតិ មិនមែនការលំបាកត្រឹមតែរបស់រាជរដ្ឋាភិបាលនោះទេ។ សម្តេចតេជោបានថ្លែងបន្ថែមថា បើអនុញ្ញាតឱ្យឈប់សម្រាកហើយមិនអនុញ្ញាតឱ្យទៅស្រុក ហើយបើទៅស្រុកហើយធ្វើឱ្យប្រជាពលរដ្ឋនៅជនបទខ្លាចនាំជំងឺទៅ បើអីចឹ្ចងមិនចាំបាច់ទៅទេ គឺនៅនឹង កន្លែងតែម្តង។ សម្តេចតេជោបន្ថែមទៀតថា រាជរដ្ឋាភិបាលបានសំណូមពរកាត់បន្ថយការធ្វើដំណើរទៅភូមិកំណើត ឬកន្លែងកម្សាន្តនានាដើម្បីចៀងវាងការនាំជំងឺទៅ ឬមេរោគទៅ ឬនាំពីទីក្រុងទៅជនបទ ឬជនបទទៅទីក្រុង។
សម្ដេចតេជោបានថ្លែងបញ្ជាក់ថា យើងហាមឃាត់នៃការប្រារព្វពិធីចូលឆ្នាំដូចជាការជួបជុំលេងល្បែងប្រជាប្រិយ ការជួបជុំគ្នាដែលមានមនុស្សច្រើ ដើរកម្សាន្ត ប៉ុន្តែការរៀបចំទទួលទេវត្តានៅធ្វើជាធម្មតា។ ជាមួយគ្នានេះ ការធ្វើបែបនេះដើម្បីទប់ស្កាត់ចំពោះអ្នកឆ្លងទៅអ្នកដែលមិនឆ្លង ដែលជាវិធានមួយនៃវិធានការផ្សេងទៀត៕