ភ្នំពេញ ថ្ងៃទី០៧ ខែមេសា ឆ្នាំ២០២០ — ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានប្រកាសឱ្យដឹងថា គិតរហូតមកដល់ពេលនេះមានមន្ត្រីរាជការ ដែលរាប់ទាំងសមាជិក សមាជិកាព្រឹទ្ធសភា រដ្ឋសភា រដ្ឋមន្រ្ដី រដ្ឋលេខាធិការ អនុរដ្ឋលេខាធិការ និងមន្រ្ដីរាជការគ្រប់ផ្នែក គ្រប់ថ្នាក់បានចូលរួមបរិច្ចាគថវិកាផ្ទាល់ខ្លួនសរុបចំនួន១,៥៨៦នាក់។ 
ថ្លែងក្នុងសន្និសីទសារព័ត៌មាន នាព្រឹកថ្ងៃទី០៧ ខែមេសា ឆ្នាំ២០២០ នៅវិមានសន្ដិភាព សម្ដេចតេជោ ហ៊ុន សែន បានគូសបញ្ជាក់ថា បើគិតជាប្រាក់ដែលមាននៅក្នុងដៃ រដ្ឋមន្ត្រីក្រសួងសុខាភិបាលគឺប្រមាណជាង១១លានដុល្លារអាម៉េរិក និងមានប្រាក់ចូលជាបន្តបន្ទាប់។ សម្ដេចតេជោបានបន្ដថា មន្រ្ដីរាជការអាចបរិច្ចាគប្រាក់ខែរបស់ខ្លួនចាប់ពីខែឧសភាតទៅ ដោយសារតែខែមីនា និងខែមេសា ក្រសួងសេដ្ឋកិច្ច និងហិរញ្ញវត្ថុបានរៀបចំបញ្ចេញប្រាក់រួចស្រាច់ហើយ សម្រាប់បើកប្រាក់ឧបត្ដម្ភចូលឆ្នាំខ្មែរ និងប្រាក់បៀវត្សរ៍។ ដូច្នេះ មន្រ្ដីរាជការអាចបរិច្ចាគថវិកាចាប់ពីខែឧសភាទៅ។ ចំពោះការបរិច្ចាគថវិកានេះ គឺមានករណីតែមួយគត់គឺរូបសម្ដេចចាប់ពីខែមីនា មេសា និងរហូតដល់ខែកញ្ញា។ សម្ដេចតេជោនាយករដ្ឋមន្រ្ដីបានបន្ថែមថា ទន្ទឹមនេះ មន្រ្ដីរាជការនៅតាមមូលដ្ឋាន ទាំងមន្រ្ដីកងទ័ព នគរបាល និងកងរាជអាវុធហត្ថ ព្រមទាំងមន្រ្ដីផ្សេងៗទៀតគឺសុទ្ធតែបានបង្ហាញនូវបំណងចង់ចូលរួមចំណែកបរិច្ចាគនូវថវិកា ចូលរួមប្រយុទ្ធប្រឆាំងនឹងជំងឺកូវីដ-១៩។
សម្ដេចតេជោបានលើកឡើងថា អ្វីដែលយើងត្រូវធ្វើនៅពេលនេះគឺមិនមែនជាចលនាទាមទារនោះទេ ប៉ុន្ដែនេះគឺជាទឹកចិត្ដរួមនៃការប្រយុទ្ធប្រឆាំងនឹងជំងឺដ៏កាចសាហាវនេះ។ សម្ដេចតេជោបានបញ្ជាក់បន្ថែមថា “ការធ្វើលើកនេះ គឺមិនដូចជាការបរិច្ចាកដូចពេលមុនៗនោះទេ ត្រូវធ្វើលិខិផ្ទាល់ខ្លួនម្នាក់មួយសន្លឹក ហើយធ្វើដោយខ្លួនឯងក្នុងការបរិច្ចាកថវិកានៃប្រាក់ខែរបស់ខ្លួន។ បើមិនអញ្ចឹងទេ វានឹងក្លាយទៅជារបៀបមួយដែលហៅថា ទាញចូលទៅតាមច្រកមេដឹកនាំ”។
សម្ដេចតេជោបានចាត់ទុកថា ថវិកាវាមិនសំខាន់នោះទេ ប៉ុន្តែទឹកចិត្តនៃការចូលរួមគឺជារឿងសំខាន់៕
ដោយ រិទ្ធី
