ភ្នំពេញ ថ្ងៃទី២៤ ខែមីនា ឆ្នាំ២០២០ — សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអះអាងថា កម្ពុជាមិនទាន់សម្រេចក្នុងការបិទជើងហោះហើររបស់កម្ពុជាជាផ្លូវការនោះទេ គិតរហូតមក ដល់ពេលនេះ បើទោះបីជាមានវិបត្តិជំងឺផ្លូវដង្ហើមកូវីដ-១៩ នៅលើសកលលោកយ៉ាងណាក៏ដោយចុះ។ 
ថ្លែងក្នុងពិធីជួបសំណេះសំណាលជាមួយមន្ត្រីនគរបាលអន្តោប្រវេសន៍ នៅអាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៤ ខែមីនា ឆ្នាំ២០២០ សម្ដេចក្រឡាហោម ស ខេង បានចាត់ទុកការបិទជើងហោះហើរពីបណ្តាប្រទេសមួយចំនួនលើពិភពលោកក៏ដូចជាប្រទេស ជិតខាងក្បែរកម្ពុជាយើងនេះ សុទ្ធតែជាវិធានការជួយយើងពីការចម្លងមេរោគកូវីដ-១៩ ដ៏កាចសាហាវនេះ។ សម្ដេចក្រឡាហោមបានលើកឡើងថា ដោយសារតែវិបត្តិជំងឺកូវីដ-១៩នេះ បាន ធ្វើឱ្យប្រទេសខ្លះធ្វើការបិទជើងហោះហើរទាំងស្រុងតែម្តង ខណៈដែលប្រទេសមួយចំនួននៅតែបន្តបើកជើងហោះហើរ ប៉ុន្តែមានកម្រិតតិចតូច។ ដោយឡែកសម្រាប់កម្ពុជាឯណេះ ជាក់ស្តែងព្រលានយន្តហោះនៅខេត្តសៀមរាប នៅថ្ងៃទី២៤ ខែមីនានេះ មានរបាយការណ៍មកថា មិនមានជើងហោះហើរនោះទេ។ ដូច្នេះបើទោះបីជាកម្ពុជាមិនបិទជើងហោះហើរ ប្រទេសដទៃគេបិទ គឺវាដូចតែគ្នានោះទេ ហើយអ្វីដែលប្រទេសទាំងនោះធ្វើវាជាវិធានការដើម្បីជួយប្រជាជនរបស់ពួកគេ។ សម្ដេចក្រឡាហោមបានបញ្ជាក់ថា ការបិទជើងហោះហើររបស់ប្រទេសទាំងនោះក៏ជាផ្នែកមួយជួយកម្ពុជាផងដែរចំពោះការរីករាលជំងឺកូវីដ-១៩នេះ។ សម្ដេច ក្រឡាហោមបានបន្ដថា សម្រាប់កម្ពុជា យើងមិនយកវិធានកាបិទជើងហោះហើរមុននោះទេ ពីព្រោះការធ្វើដំណើរតាមផ្លូវអាកាសនេះ គឺវាមានទៅមានមក បានន័យថា ប្រជាជនយើងទៅគេ ប្រជាជនគេមកយើង។ សម្ដេចក្រឡាហោមបានថ្លែងបញ្ជាក់ថា “ការបិទព្រលានយន្ដហោះយើងអត់មានទេ ហើយបិទព្រំដែន យើងបានជជែងជាមួយថៃ និងវៀតណាមដែរ បានស្រុះគ្នា។ រីឯព្រលានយន្ដហោះនៅដដែលទេ ទាំង៣ ទាំងភ្នំពេញ កំពុងសោម និងសៀមរាប។ ប៉ុន្ដែបើសិនណាគេបិទ ប្រទេសគេមិនឱ្យយន្ដហោះមក ដូចតែយើងបិទ ដូចគ្នាទេ ហើយយើងបន្ដតាមដានថែមទៀត។”
សម្ដេចក្រឡាហោមបានបន្ថែមថា បើទោះបីជាកម្ពុជាមិនប្រកាសបិទជើងហោះហើរក៏ដោយចុះ ហើយជំងឺកូវីដ-១៩នេះ វាកាន់តែរីករាលដាលខ្លាំងនោះ គឺកម្ពុជាមិនចាំបាច់ប្រកាសបិទនោះទេ បណ្តាប្រទេសដែលមានជើងហោះហើរមកកម្ពុជា គឺគេនឹងបិទតែម្តង ហើយកម្ពុជាក៏ត្រូវបិទដោយស្វ័យប្រវត្តិផងដែរ៕
ដោយ ចាន់ សុធីវង្ស
